Hazırda Azərbaycan Texniki Universitetinin III kursunda təhsil alan tələbə atasını məhkəməyə verib ki, onun xərclərinə görə onu pulla təmin eləsin.
Bizimyol.info xəbər verir ki, bununla əlaqədar məhkəmədə iddia qaldıran tələbə atasından aylıq 300 manat pul tələb edib. Tələbə bildirib ki, valideynləri 2023-cü ildə məhkəmə qərarı ilə boşanıb. Nikahları pozularkən o, anasının himayəsində saxlanılıb. Onun 18 yaşı 2024-cü il martın 15-də tamam olub. O, yetkinlik yaşına çatana qədər atası aliment ödəyib. Lakin 18 yaşı tamam olandan sonra onun üçün alimentin ödənilməsi dayandırılıb.
Hazırda Azərbaycan Texniki Universitetində təhsil aldığını qeyd edən tələbənin sözlərinə görə, anası və azyaşlı qardaşı ilə birlikdə kirayə evdə yaşayır. Maddi çətinlikləri var. Xüsusən təhsil alması ilə əlaqədar əlavə vəsaitə ehtiyac duyur.
Ata isə bu tələblə razılaşmayıb. Atanın vəkili məhkəməyə etiraz ərizəsi təqdim edib. Orada göstərib ki, onlar boşananda maaşı cəmi 345 manat idi. Həmin vaxt həyat yoldaşının aylıq maaşı isə 700 manat idi. Buna baxmayaraq, o, 345 manatlıq maaşından aliment ödəyirdi:
“Təhsillə əlaqədar əlavə xərclərə ehtiyac olduğu göstərilir, lakin əsaslandırılmır. Məsələ burasındadır ki, o, dövlət hesabına - ödənişsiz ali təhsil alır. Halbuki, 18 yaşı tamam olandan sonra valideynlərinə məxsus mənzilin satılmasına həmin mənzildə qeydiyyatda olan şəxs kimi, özü razılıq verib. Əmlakın satışından əldə olunan vəsait də onun razılığı ilə anasına təqdim olunub”. O, əlavə edib ki, hansı əlavə xərcdən söhbət getdiyi məlum deyil.
Məhkəmə tələbənin iddiasını təmin etməyib. Qərarını da belə əsaslandırıb ki, valideynlərin əlavə xərclərə cəlb olunması 2 yolla - tərəflər arasında saziş əsasında və ya məhkəmə qaydasında mümkündür. Tərəflər razılığa gələ bilməyəndə, yaxud bağlanmış sazişdə müstəsna hallarla bağlı xərclərin ödənilməsi qaydası müəyyən edilmədikdə məhkəmə qərar verir.
Qanun müəyyən edir ki, valideynlərin əlavə xərclərə cəlb edilməsi aliment öhdəliyindən fərqli olaraq, yalnız müəyyən əsaslar olduğu halda mümkündür. Məsələn; yetkinlik yaşına çatıb-çatmamasından asılı olmayaraq ağır xəstə və şikəst olan uşaqlara, habelə yetkinlik yaşına çatsa da, əmək qabiliyyəti olmayan və maddi yardıma ehtiyacı olan övladlara göstərilən kənar xidmətin haqqının ödənilməsi və s. hallarda.
Bu halda, atasından pul tələb edən tələbənin sağlamlığı ilə bağlı heç bir problem yoxdur. Ona görə də məhkəmə atanın üzərinə artıq yetkinlik yaşına çatmış övlada əlavə ödəniş etmək öhdəliyi qoymağı məqbul hesab etməyib.
