İsmayıllı rayonunun Kürdmaşı kənd məktəbində uzun illərdir müəllim işləyən Dilşad xanımı generalın adı ilə aldadıb, pulunu ələ keçiriblər. O, Müdafiə Nazirliyinin Hərbi Hava Qüvvələri komandanının müavini, Hava Döyüş komandiri, general-mayor Zaur Rüstəmovun adı ilə aldadılaraq, dələduzluğun qurbanı olub.

Bizimyol.info xəbər verir ki, İsmayıllı rayonundan olan general Zaur Rüstəmov vaxtilə Dilşad xanımın şagirdi olub. Dilşad xanım düşünüb ki, hazırda kənddə bir çox məsələlərdə olan kömək edən, işsizliyə görə dolanışığında çətinlik çəkən qohumu İlqar Mustafayevə iş tapmaqda bəlkə keçmiş şagirdi Zaur Rüstəmov onlara yardım edə bilər. Nəzərə alıb ki, Zaur Rüstəmov müəllimi kimi həmişə ona hörmətlə yanaşıb. Bu səbəbdən də generalın telefon nömrəsini axtarmağa başlayıb ki, İlqar Mustafayev üçün iş məsələsində ondan kömək istəsin.

Dilşad xanımın bu niyyətindən Kürdmaşı kəndində yaşayan Vüsal xəbər tutub və ona zəng edərək, generalın adı ilə danışıb. Özünü general Zaur Rüstəmov kimi təqdim edərək deyib ki, nəsə kömək lazımdırsa, etməyə hazırdır. Dilşad xanım da iş tapmaq məsələsində köməklik istəyib. O isə cavabında deyib ki, heç bir problem yoxdur. Bir neçə gün sonra isə zəng edərək bildirib ki, özünə yox, ətrafındakı uşaqlara 2500 manat pul göndərmək lazımdır. Dilşad xanım onun dediyi kart hesabına bu məbləği göndərib. Üstündən bir müddət keçsə də, iş düzəlməyib. Əvəzində “general” zəng edərək, daha 3000 manat istəyib. Dilşad xanım bundan şübhələnib, onunla görüntülü danışmaq istəyib. O isə imtina edib.

Bundan sonra Dilşad xanım ona zəng gələn nömrəni kənd sakinlərindən biri vasitəsilə yoxlatdırıb. Öyrənib ki, həmin nömrə kənd sakini Vüsala məxsus imiş. O, Vüsalgilə gedib, baş verənləri onun anasına danışıb, 2500 manatını tələb edib. Anası baş verənlərdən xəbərsiz olduğunu bildirib. Pulun qaytarılmasını bir müddət gözləyəndən sonra qaytarılmadığını görüb, polisə şikayət edib.

Araşdırmalar zamanı məlum olub ki, Vüsal başqa bir şəxsə qarşı da qızı üçün müavinət düzəltmək adı ilə 1500 manat alaraq dələduzluq edib. O, cinayət məsuliyyətinə cəlb ediləndən sonra hər iki zərərçəkmişin pulunu qaytarıb, onlarla barışıq əldə edib. Lakin məhkəmə onun 2 il 6 ay azadlıqdan məhrum edilməsi barədə hökm çıxarıb.