İran Silahlı Qüvvələrinin Baş Qərargah rəisi Səid Əbdülrəhim Musəvi Ermənistan Təhlükəsizlik Şurasının katibi ilə görüşündə sərt bəyanatlar səsləndirib. O, Ermənistan-Azərbaycan sülh prosesinə dəstək verdiklərini desə də, bölgəyə xarici güclərin müdaxiləsini açıq şəkildə tənqid edib.

Musavat.com xəbər verir ki, general Musəvi bildirib ki, Ermənistanla Azərbaycan arasında imzalanacaq sülh sazişi Cənubi Qafqazda sabitlik və təhlükəsizliyi təmin edə bilər:

“Bu proses həmişə İran İslam Respublikası tərəfindən alqışlanır. Biz bölgədə barışın və mehriban qonşuluğun tərəfdarıyıq.”

İran rəsmisi eyni zamanda ABŞ-ın və digər qeyri-regional güclərin Cənubi Qafqazdakı fəaliyyətini kəskin şəkildə tənqid edib:

“ABŞ da daxil olmaqla xarici qüvvələrin iştirakı bölgə üçün ciddi narahatlıq faktorudur. Tarixi təcrübə göstərir ki, Amerikanın Cənubi Qafqazdakı fəaliyyəti yalnız mənfi nəticələrə gətirib çıxarıb. Bu risklərin azaldılması üçün uyğun mexanizmlər yaradılmalıdır.”

Ermənistan Təhlükəsizlik Şurasının katibi isə cavabında 8 avqustda imzalanan “Dördtərəfli sülh kəsişməsi” layihəsini yüksək qiymətləndirib və Sünik dəhlizi üzərində milli suverenliyin qorunmasının Ermənistan üçün qırmızı xətt olduğunu bildirib. O, bu məsələnin İranla münasibətlərə mənfi təsir göstərməməsi üçün çalışacaqlarını vurğulayıb.

Beləliklə, Tehran rəsmisinin Paşinyanın nümayəndəsinə açıq şəkildə dediyi bu fikirlər, İranın bölgədə ABŞ-ın rolunu qəbul etmədiyini və yalnız regional əməkdaşlıq formatını dəstəklədiyini bir daha ortaya qoyur.