Ermənistan Baş Naziri Nikol Paşinyan xalqa müraciətində bildirib ki, Qarabağ məsələsi Vaşinqton razılaşması ilə bağlanıb və bu olmadan sülh mümkün deyildi. O, Qarabağın illərlə Ermənistanın müstəqilliyinə maneə kimi istifadə olunduğunu deyib. Baş nazir həmçinin qeyd edib ki, Qarabağı tərk edən ermənilərin Azərbaycana qayıtması qeyri-real və sülh üçün təhlükəlidir.
Mövzu ilə bağlı Redaktor.az-a açıqlamasında Milli Məclisin deputatı Hikmət Babaoğlu bildirdi ki, Paşinyan ilk dəfədir mövcud siyasi reallıqdan çıxış edir və elan etdiyi “real Ermənistan” məqsədlərinə bir qədər də yaxınlaşmış olur.
"Onun Qarabağla bağlı səsləndirdiyi fikirlər, xüsusilə də Qarabağda yaşayan ermənilərin Azərbaycanı könüllü tərk etdikdən sonra geri qayıtmasının mümkünsüzlüyü barədə açıqlaması təqdirəlayiqdir. Bu, bugünkü siyasi gerçəklikdən irəli gələn bir zərurətdir. Əks halda Ermənistan Azərbaycanla sülh əldə edə bilməz. Paşinyan anlayır ki, bunun əksini iddia etmək Azərbaycanla sülhü pozmaq deməkdir. Azərbaycanla sülh pozularsa, bu Ermənistan dövlətinin sonunu gətirə bilər. Buna görə də onun bu mövqeyi realist yanaşma kimi dəyərləndirilə bilər. Lakin əsas məsələ ondadır ki, Paşinyan bir siyasətçi olaraq bu fikirlərə erməni ictimaiyyətini inandıra bilməlidir. O, tərəfdarlarının sayını artırmalı, cəmiyyətdə dəstək qazanmalıdır. Belə olduğu halda Ermənistan cəmiyyəti sülhə daha yaxın olar".
Millət vəkili əlavə etdi ki, sülh hər nə qədər siyasi hadisə sayılsa da, eyni zamanda ictimai-psixoloji hadisədir.
"Məsələnin hüquqi-siyasi tərəfi həll olunsa da, ictimai şüurda dəyişiklik baş verməzsə, əldə edilən razılaşmalar daim şübhə altında qalacaq və yarımçıq görünəcək. Bu isə sülhün təhdid altında olması deməkdir. Məncə, Paşinyanın son açıqlaması həm də bu istiqamətə xidmət edir.
Digər mühüm məqam Paşinyanın çağırışıdır. O, deyir ki, əgər bu mövqeyə qarşısınızsa, inqilab edin. Paşinyan yaxşı bilir ki, yorğun düşmüş, öz ambisiyalarının qurbanına çevrilmiş və iqtisadi cəhətdən təcrid olunmuş erməni cəmiyyətinin yeni bir inqilab etmək potensialı yoxdur. Buna görə də o, əslində erməniləri Azərbaycanın yaratdığı reallıqla barışmağa səsləyir. Bu, sülhə gedən yolda vacib addımlardan biridir. Amma əsas məsələ hələ də qarşıdadır. Yəni Ermənistan Konstitusiyasının dəyişdirilməsi və Paşinyanın da vurğuladığı kimi, ərazi iddiası mahiyyətini daşıyan fikirlərin hüquqi-siyasi sənədlərdə aradan qaldırılması lazımdır. Yalnız bu halda sülhün yolu tam açılmış olacaq", - deyə Hikmət Babaoğlu vurğuladı.
