Ermənistan Baş naziri Nikol Paşinyan Azərbaycanın Ermənistan Konstitusiyasının dəyişdirilməsi ilə bağlı növbəti tələbinə razılıq verib. Bu barədə “Hraparak” qəzeti məlumat yayıb.

Nəşr bildirib ki, söhbət Azərbaycan və Türkiyəyə qarşı ərazi iddialarının yer aldığı Müstəqillik Bəyannaməsinə istinadın Ermənistan Konstitusiyasından çıxarılmasından gedir: “Bunu Vaşinqton Sazişinin birinci bəndi sübut edir. Orada bildirilir: ”Sülh müqaviləsi paraflandıqdan sonra biz sazişin imzalanması və yekun ratifikasiyası istiqamətində gələcək fəaliyyətlərin davam etdirilməsinin zəruriliyini qəbul etdik və ölkələrimiz arasında sülhün qorunması və möhkəmləndirilməsinin vacibliyini vurğuladıq".

Bu razılaşmadan sonra Bakı bəyan elədi ki, Paşinyana ev tapşırığı veriblər: o, Konstitusiyanı dəyişməlidir və sülh sazişi bundan sonra imzalanacaq" (Teleqraf).

Qəzet ardınca qeyd edir ki, Konstitusiya İslahatı Şurası uzun fasilədən sonra həftələr öncə iclas keçirib. “Əldə etdiyimiz məlumata görə, şura tezliklə yeni Konstitusiyanın mətninin hazırlanması üçün aktiv şəkildə iclaslar keçirəcək”, - məlumatda bildirilir.

Bəs Paşinyan Əliyev və Trampın əsas “Ev tapşırığı”nı hansı tarixdə reallaşdıracaq?

“Ermənistanın Baş naziri Nikol Paşinyanın ölkəsinin Konstitusiyasından Azərbaycan və Türkiyəyə qarşı ərazi iddialarını əks etdirən müddəaların çıxarılmasına razılıq verməsi, uzun illərdir bölgədə gərginliyə səbəb olan təxribatçı yanaşmadan imtina istiqamətində mühüm addımdır. Ermənistanın Müstəqillik Bəyannaməsinə istinadla ərazi iddialarını Konstitusiya səviyyəsində qoruması beynəlxalq hüququn prinsiplərinə, xüsusilə də dövlətlərin ərazi bütövlüyü prinsipinə ziddir. Bu səbəbdən həmin müddəaların ləğvi regionda davamlı sülhün bərqərar olması üçün zəruri şərtdir”. Bunu “Yeni Müsavat”a Milli Məclisin deputatı Vüqar İskəndərov deyib.

Deputat bildirib ki, Vaşinqton Sazişinin birinci bəndində də vurğulandığı kimi, sülh müqaviləsinin paraflanmasından sonra onun imzalanması və ratifikasiyası üçün zəruri addımların atılması tərəflərin öhdəliyidir: “Ermənistan Konstitusiyasındakı təxribatçı müddəaların aradan qaldırılması, bu öhdəliyin real icrası və sülh prosesinin irəliyə aparılması üçün əsaslı zəmin yaradacaq. Bu baxımdan hesab edirəm ki, Ermənistanın ”ev tapşırığı"nı tez bir zamanda yerinə yetirməsi vacibdir. Çünki hər hansı siyasi manevr və ya gecikmə cəhdləri, təkcə sülh gündəliyinə zərbə vurmaqla qalmayacaq, həm də Ermənistanın beynəlxalq etibarlılığını ciddi şəkildə sarsıdacaq. Sülhün imzalanması üçün bu addımın gecikdirilmədən atılması bölgədə sabitlik və qarşılıqlı etimad mühitinin möhkəmlənməsi baxımından həlledici əhəmiyyət daşıyır".

V.İskəndərov qeyd edib ki, Azərbaycan sülhün əldə olunması üçün bütün addımları atmağa hazırdır: “İndi top Ermənistanın tərəfindədir. Paşinyan hökuməti siyasi iradə nümayiş etdirərək bu dəyişiklikləri reallaşdırmalı, xalqını əsassız iddiaların əsiri olmaqdan qurtarmalıdır. Yalnız bundan sonra bölgədə etibarlı sülh və əməkdaşlıq mühiti formalaşa bilər”.

AMİP liderinin köməkçisi, politoloq Əli Orucov məsələlərə bu cür aydınlıq gətirdi: “Azərbaycanla Ermənistan arasında sülh sazişinin imzalanması və dövlətlərarası münasibətlərin qurulmasında əngəl olan iki vacib məsələ var. Biri fəaliyyəti olmayan ATƏT Minsk Qrupunun buraxılması və Ermənistanın Konstitusiyasında Azərbaycana qarşı ərazi iddialarının aradan qaldırılması idi. Lakin İrəvan hər vəhclə Bakının haqlı tələblərini icra etmək istəmirdi. Bu da nəticə etibarı ilə sülh sazişini imzalamağı yubadırdı. 8 avqustda Ağ Evdə prezident Trampın vasitəçiliyi ilə Azərbaycan və Ermənistan arasında aparılan görüşlərdə və imzalanan tarixi sənədlərdə nəhayət ki, Paşinyan şərtləri qəbul etmək məcburiyyətində qaldı. ATƏT Minsk Qrupu demək olar ki, buraxılıb. Hər iki tərəf bununla bağlı quruma birgə müraciəti ünvanlayıb. Lakin konstitusiya dəyişikliyinin bir qədər uzun proses olacağı gözlənilir. Bunun üçün ilk növbədə ciddi hazırlıqlar tələb olunur. Erməni cəmiyyətini inandırmaq lazımdır ki, onların konstitusiyası işğalçı ruhludur, başqa dövlətlərin ərazilərinə iddia edilir. Bu təkcə Azərbaycanın şərti kimi qəbul edilməməlidir, beynəlxalq hüquq normaları və prinsiplərindən irəli gəlir. Bir dövlətin ərazisinə konstitusiya ilə iddia edərək həmin dövlətlə sülh sazişi imzalamaq və diplomatik əlaqələr qurmaq absurd səslənir. Gələcəkdə imzalanacaq həmin sənədlərin özü də davamlı sabitliyə və təhlükəsizliyə tam təminat vermir. Nəzərə almaq lazımdır ki, erməni müxalifəti, həmçinin kilsə sülh sazişinə qarşı çıxmaqdadır və onlar bu yolu bloklamaq üçün hər cür vasitəyə əl atırlar. Rusiya da həmin qüvvələri açıq şəkildə müdafiə etməkdədir. Odur ki, Paşinyan müsbət nəticəni almaq üçün təbliğat aparatını gücləndirib erməni cəmiyyətini Konstitusiya dəyişikliyinin vacibliyinə inandırmağı bacarmalıdır. Mövcud durum isə qaneedici deyil və Konstitusiya dəyişikliyində üstünlük Bakının diktəsi kimi qəbul edilir. Qarşıda isə Ermənistanda parlament seçkiləridir və indiki hakimiyyət nisbi üstünlüyə malikdir. Odur ki, Paşinyan seçki öncəsi referenduma getməyə tərəddüd edərdi. Ehtimallardan biri odur ki, seçkini udub növbəti qısa mərhələdə referenduma start verilsin. Lakin Birləşmiş Ştatların və Qərbin güclü dəstəyini hiss edərsə, o zaman uzağı 2026-cı ilədək Konstitusiya dəyişikliyini həll edər. Məncə, Baş nazir üçün yaxın prioritet hakimiyyətini qorumaqdır. Erməni kilsəsinə qarşı total hücum da, Moskvanın əlaltılarını əzməklə bağlı sərt tədbirləri də məhz parlament seçkilərinə hesablanıb. Əsas odur ki, sülh sazişi paraflanıb, Ermənistan sazişdən irəli gələn müddəaları qeyd şərtsiz icra etməlidir və edəcək də. Əks təqdirdə fəlakətlə üzləşə bilər”.

“Yeni Müsavat”