Qarabağda ləğv edilmiş qondarma rejimin sonuncu rəhbəri Samvel Şahramanyanın vəkili Roman Yeritsyan təxribatçı açıqlama ilə çıxış edib.

“Cebheinfo.az”-ın məlumatına görə, Yeritsyan Samvel Şahramanyanın 26 sentyabr 2023-cü ildə imzalanmış “Dağlıq Qarabağ Respublikasının buraxılması haqqında” fərmanının qüvvədən düşdüyünü bildirib. O bildirib ki, Şahramanyan İrəvana köçdükdən sonra başqa “fərman” verərək eyni hüquqi əsaslarla “DQR”-in ləğvi haqqında fərmanı qüvvədən salıb:

“Əziz həmvətənlər, əminəm ki, bir çoxlarınız “Artsax prezidenti” Samvel Şahramanyanın ikinci erməni “dövləti”nin ləğvi haqqında fərmanı hansı motivlərlə imzaladığını bilirsiniz və ya başa düşürsünüz. Bəziləriniz də heç bir məmurun, o cümlədən dövlət başçısının fərmanla dövləti ləğv etmək səlahiyyətinin olmadığını anlayır. Lakin cəmiyyətin müxtəlif dairələri “Artsax”ın ləğvi haqqında fərmanın hüquqi akt kimi hətta qüvvəyə minməməsinə də məhəl qoymayaraq, onu fəal şəkildə manipulyasiya edərək, Şahramanyanı “Artsaxı ləğv edən prezident” adlandırıb və s.”

Vəkil Yeritsyan bildirib ki, Samvel Şahramanyan “Artsax”ın buraxılması haqqında 26 sentyabr tarixli fərmanını qüvvədən salan 659-N saylı “fərman” verib və bu barədə Ermənistanın hakimiyyət orqanlarına rəsmi məktubla məlumatlandırıb. “Nə “Artsax”ın ləğvi haqqında “fərman”, nə də yeni “fərman” hüquqi qüvvəyə malik olsa da, həm “Artsax Konstitusiyası”na, həm də daha yüksək hüquqi qüvvəyə malik digər normativ aktlara zidd olduğundan qüvvəyə minməyib. Ona görə də hər hansı nəticələrə səbəb ola bilməz və hamıdan “ləğv edilmiş Artsax” haqqında danışmağı dayandırmağı xahiş edirəm”.

Vəkil “Qarabağ səhifəsinin bağlanmadığını və geri dönəcəklərini” qeyd edib. Göründüyü kimi, Şahramanyan vəkil Yeritsyanın vasitəsilə qondarma rejimin bərpası məsələsini gündəmə gətirmək istəyir. Çünki Şahramanyan Azərbaycan ərazisində erməni separatizminin bərpasının qeyri-mümkün olduğunu yaxşı bilir. İşğaldan azad edilmiş ərazilərdə Azərbaycanın dövlət suverenliyi və konstitusion hüququ tam bərqərar edilib.

Vaxtilə uydurma rejimin yaradılmasına rəhbərlik etmiş hərbi cinayətkarların bir çoxunun hazırda Bakıda məhkəmə prosesi keçirilir. Mayın 21-də Şahramanyanın “prezident” kimi səlahiyyət müddəti başa çatır. Çox güman ki, Şahramanyan “DQR”-in ləğvi haqqında fərmanının qüvvədən düşdüyünə dair iddiaları ortaya atmaqla ermənilərin yaddaşında qondarma rejimin buraxılmasına imza atmış adam kimi qalmaq istəmir.

Böyük ehtimalla, Şahramanyan ləğv edilmiş rejimin rəhbəri postuna mayın 21-də keçiriləcək “prezident” seçkilərində namizəd kimi iştirak etməyəcək. Əvvəla o, bunun hər hansı siyasi perspektivi olmayan mənasız bir addım olduğunu yaxşı dərk edir.

Vaxtilə Qarabağda yaşamış erməni əhali oradan könüllü köçüb və geri qayıtmaq istəmir. Yəni, separatçıların keçmiş rəhbəri ermənilərin Qarabağa dönməyəcəyinin fərqindədir. Ona görə də separatçı rejimin bərpasına ümid bəsləmək illüziyadan başqa heç nə vəd etmir. Üstəlik, qondarma rejimin rəhbərliyində qalmaq Şahramanyanı Ermənistan hakimiyyətinin hədəfinə gətirir. Ermənistana köçdükdən sonra onun barəsində cinayət işi açılıb, avtomobili müsadirə edilib.

Şahramanyan üçün bu təzyiqlərdən xilas olmağın yeganə və ən düzgün yolu “prezident”liyinə son verməkdir. Bununla yanaşı, vəkil Yeritsyanın açıqlaması mayın 21-də keçirilməsi nəzərdə tutan saxta seçkilərə hesablanmış siyasi manipulyasiya məqsədi də daşıya bilər. Belə ki, Şahramanyan “seçkilər”in keçirilməsinə əsas yaratmaq üçün qondarma rejimin ləğv edilmədiyini, mövcudluğunu davam etdirdiyinə dair görüntü yaratmağa çalışır.

Bu cür siyasi fonun yaranmasından Ermənistandakı siyasi qüvvələr də öz maraqları üçün istifadə etməyə çalışırlar. Revanşist müxalifət 2026-cı ildə keçiriləcək parlament seçkilərində qondarna rejimin qalıqlarına “Qarabağ klanı”nı yenidən gücləndirmək və radikalları eks-prezident Robert Köçəryanın ətrafında cəmləmək vasitəsi kimi baxır.

Görünür, son günlər Ermənistan Baş Prokurorluğunun Köçəryanın əmlakını müsadirə etmək üçün məhkəmə iddiası qaldırmasından dərhal sonra uydurma rejimin yaşadığına dair məsələnin gündəmə gəlməsi Paşinyan hökumətinə qarşı bir təzyiq vasitəsidir.

Baş nazir Nikol Paşinyan qondarma rejimin Ermənistandakı fəaliyyətini öz hakimiyyətinə qarşı təhlükə hesab etsə də, hələlik separatçı rejimin nəzarətdən çıxmamaq şərtilə mövcudluğuna şərait yaradır. Paşinyan bu siyasi “kart”ı daha çox Qərbi azərbaycanlıların öz yurdlarına qayıtmasına qarşı müqavimət vasitəsi kimi əlində saxlamağa çalışır.

Lakin prlament seçkiləri yaxınlaşdıqca qondarma rejimin qalıqlarının Paşinyan üçün problem yaratmağa çalışacağı gözlənilir ki, nəticədə Baş nazirin separatçılara qarşı yenidən sərt tədbirlərə əl atacağı istisna edilmir.

Müşfiq Abdulla
“Cebheinfo.az”