Bu yaxınlarda qafqaznews.org saytında “İmprotex Motors 2 dəfə “atır”..? başlıqlı məqalə dərc olunmuşdu. Məqalə vəkil İlham Məmmədovun redaksiyamıza müraciətindən bəhs edirdi: “ Mənim adını hələ demək istəməyən müştərim dələduzların qurbanı olub. 12 aprel 2013-cü ildə mənim müştərim Ayna Sultanovanın heykəli yaxınlığında yerləşən avtosalona gedir və orada satışa qoyulmuş BMW markalı avtomobil onun xoşuna gəlir. Həmin avtomobil Dövlət Gömrük Komitəsinin müstəntiqi, Qobustan RİH-nin başçısı Adil Məmmədovun oğlu Aqil Məmmədova məxsus olub. Və mənim müştərim Aqillə görüşüb. Aqil bildirib ki, avtomobili 60 min manata satır və bu qiymət mənim müştərimə sərf edib. Razılaşmadan sonra mənim müştərim avtomobili alqı-satqıdan öncə BMW-nin Azərbaycanda rəsmi dileri olan Improtex Motors şirkətində texniki baxışdan keçməyi təklif edir. Və Aqil Məmmədov razılaşır”.
Vəkilin bizə bildirdiyinə görə, texniki baxışdan sonra Improtex Motors şirkətinin növbə rəisi Həsən Ağaverdiyevin mənim müştərimə təqdim elədiyi aktda avtomobilin biraz texniki nasaz olduğu göstərilib ki, onu da şirkətdə asanlıqla aradan qaldırmaq olar. Alqı-satqıdan sonra abtomobilin yeni sahibi tanış avtomobil ustasına müraciət edir: “ Avtomobilə baxışdan sonra usta bildirib ki, alınan avtomobil oğurluqdur. Avtomobilin kodu saxtalaşdırılıb. Bundan başqa avtomobilin siqnalizasiya sistemi sındırılıb. Bu sistem şirkətə imkan verir ki, oğurlanmış avtomobili harda olsa da yerini müəyyən eləsin. Bundan sonra mənim müştərim Improtex Motors şirkətinə gedərək yoxlamanı keçirmiş ustadan izahat tələb edir. Usta mənim müştərimə bildirib ki, mən yoxlama vaxtı bu nasazlığı gördüm və bu barədə növbə rəisi Həsən Ağaverdiyevə məlumat verdim”. Məmmədovun bizə dediklərinə görə, Həsən Ağaverdiyev ustanın dediklərini təsdiq edib: “Ancaq Ağaverdiyev ustanın dediklərini nəzərə almayıb”. Vəkil onu da bildirib ki, mənim təkidli tələblərimə görə, 1 il sonra 5 aprel 2014-cü il tarixdə Bakı Şəhər Baş Polis İdarəsində cinayət işi açıldı və iş Həbib Həbibliyə tapşırıldı. Müxbirimizlə söhbətində Həbib Həbibli cinayət işinin açıldığını təsdiq eləyib. Avtomobilin keçmiş sahibi, Qobustan RİH başçısının oğlu Aqil Məmmədov müxbirimizlə söhbətində bildirib ki, mən bu avtomobili Improtex Motors-un rəsmi dileri Ülvi Nəsibovdan almışam.
Ülvi Nəsibov isə qafqaznews.org-a bildirib ki, Aqil Məmmədovun aldığı avtomobilin bütün sənədləri qaydasında idi: “ Avtomobili satış üçün salona qoyanda texpasport və yol polisində qeydiyyatla bağlı sənəd tələb olunur. Bu sənədlər var idi. Bundan başqa Aqil Məmmədov avtomobili alandan sonra Improtex Motors şirkətinin servisinə müraciət elədi və yoxlamadan keçdi. Niyə hansısa ciddi nasazlıq ortaya çıxmadı?”. Nəsibovun sözlərinə görə, avtomobili salonda satışa qoymazdan öncə texniki pasportu və Baş Dövlət Yol Polis İdarəsi tərəfindən verilmiş qeydiyyat sənədləri tələb olunur. Vəkil İlham Məmmədovun qafqaznews.org-a bildirdiyinə görə, Aqil Məmmədov avtomobili alarkən həmin BMW X6 BDYPİ-də qeydiyyatdan keçib və dövlət nömrəsi 10 UF 414-dir: “ Məlumdur ki, avtomobilə dövlət nömrəsi BDYPİ tərəfindən verilir. Biz istintaq vaxtı dəfələrlə tələb elədik ki, BDYPİ-ə müraciət edib nəsələyə aydınlıq gətirsinlər. Ki, oğurluq maşına necə dövlət nömrəsi verilib. Ancaq Həbib Həbibli bizim tələbimizi yerinə yetirmədi”. Həbibli isə qafqaznews.org-a bildirib ki: “ Bu yalandır. Mən BDYPİ-ə sorğu göndərmişəm ki, oğurluq maşına necə dövlət nömrəsi verilib?”. Bakı Şəhər Baş Polis İdarəsinin mətbuat xidmətinin rəhbəri Qalib Arif isə sualımıza sualla cavab verdi: “ Axı, BDYPİ oğurluq maşına necə dövlət nömrəsi verə bilər?”.
Onun sözlərinə görə, avtomobilə dövlət nömrəsi veriləndə yol polisinin əməkdaşları ona texniki baxış keçirirlər. Biz BDYPİ-nin həmin avtomobilə dövlət nömrəsi verməzdən öncə texniki baxış keçirib-keçirmədiyini öyrənmək qərarına gəldik. İdarənin axtarış şöbəsinin rəisi Yaşar Kərimov bildirdi ki: “Elə şey ola bilməz. Biz oğurluq avtomobilə dövlət nömrəsi verə bilmərik”. Yaşar Kərimov həm də maraqlandı ki, qafqaznews.org haradan öyrənib ki, 10 UF 414 nömrəli maşın oğurluqdur. Müxbirimiz isə ona bildirib ki, bu barədə bizə Bakı Şəhər Baş Polis İdarəsindən deyiblər. Yaşar Kərimov bir daha təkrar elədi ki, biz oğurluq maşına dövlət nömrəsi verə bilmərik.
Hüquq müdafiəçisi, “Peşəkar Hüquqşünaslar” İctimai Birliyinin sədri Tağı Hüseynov isə bildirdi ki: “ Avtomobilə dövlət nömrəsi verməzdən öncə texniki baxışdan keçməlidir. Reallıqda isə Azərbaycanda avtomobillərin çoxu texniki baxışdan keçmir. Yol polisinin bəzi əməkdaşları dövlət nömrəsi almaq üçün guya texniki baxışdan keçməklə bağlı saxta sənəd verirlər. Bu isə rüşvət müqabilində olur”.
