Elə sənət adamları var ki, onlar ömrünün bir dövründə bir işlə məşğul olur, ancaq alınmır. Əgər həqiqətən də istedadları varsa, başa düşürlər, başqa sahəyə keçid edirlər və uğurlu olurlar. Ancaq bu məsələnin müğənni, aktrisa Məleykə Əsədovaya heç bir dəxli yoxdur.
Onun ifalarında, rollarında insanı ən çox təsirləndirən məqam odur ki, heç nə təsirləndirmir.
O, olduğu hər yerdə uğursuz olmağı özünə məqsəd seçmiş, istedadasızlıq libasını isə əyninə biçmişdir.
Mənə elə gəlir ki, hətta təsadüfən də onun hansısa bir işi alınan fason olanda, ortabablığa yaxınlaşanda pis olur, ağlayır, küsür ki, axı belə olmamalı idi, məndə nə üçün alındı?
Ömrün bir çağında həm mahnı oxuyub, həm də aktrisalıq edən Məleykə Əsədova hər iki sahədə xüsusi istedadsızlığı, maraqsız olmağı, heç bir şəkildə alınmamağı ilə seçilir.
Bir məsəl var, “filankəsi heç torpaq da qəbul eləmir”. Bu misal, Məleykə Əsədovanı da səhnə qəbul eləmir. Səhnə özü özünü atır aşağı ki, bəsdir üstümə çıxdın, düş, bizdə alınmır, bacarmırsan, Məleykə.
Doğrudan da Azərbaycan səhnəsində başa düşülməyən, varlığı və yoxluğu heç cür hiss edilməyən bir sənət adamı məhz Məleykə Əsədovadır.
Heç bilmirsən, o, uzun illərdir ki, nə və niyə oxuyur?
Dərinə gedən, onu heç ciddi-ciddi pisləmək də olmur. Pisləmək üçün də ortada nəsə olmalıdır. Ancaq ortada təsadüfdən, boşluqdan təkcə adı məşhurlaşan bir Məleykə Əsədova adı var.
Elə müğənnilər, aktrisalar var ki, onlar sənətinə görə olmasa da, yaxşı- pis şəxsiyyətlərinə, hansısa mənalı-mənasız xüsusiyyətlərinə görə seçilir, adama maraqlı gəlirlər.
Ancaq Məleykə Əsədova heç bir əlamətinə görə seçilmir. Deputat Günay Ağamalı Milli Məclisdə nə qədər maraqsızdırsa, Məleykə xanım da burada maraqsızdır. Şou-biznes kimi qaynar bir məkanda, aktrisalıq kimi bir sahədə bu qədər maraqsız olmağı, bəlkə də, ancaq Məleykə Əsədova özü qazana bilərdi elə.
Tək-tük qadın sənətçilərdəndir ki, hərdən nazlanmağı da adamın əsəbinə toxunur. Hətta onun haqqında pis-pis şayələr də çıxmır. Çıxsa belə, adamın inanmağı gəlməz.
Ümumiyyətlə, bəzi sənətçilər var, onları sevənlər də olur, nifrət edənlər də. Deməli, təsir buraxırlar. Amma Məleykə Əsədova haqqında insanların reaksiyası adətən belə olur:
“Booo, başşıma xeyir, Allah, sən saxla”.
Məleykə xanım səhnəyə çıxanda zalda qəribə bir atmosfer yaranır. Heç kim nə baş verdiyini anlamır.
O, adını kimsə çəkəndə ötəri yada düşən adamdır. O qədər maraqsızdır ki, adı çəkiləndə yada Məleykə Abbaszadə belə düşür, özü yox. Çox güman, Abbaszadə də ondan yaxşı oxuyur, rol alsa, dah ayaxşı aktrisa olar.
Bundan başqa, Məleykə Əsədova heç qalmaqallarla da yadda qala bilmir. Yaşamağına qalmaqal yaşayır, ancaq yadda qalmır, maraqlı olmur.
Doğruda da, qəribədir. Məsələn, bəzi adamlara baxanda düşünürsən ki, bu adam sənətə necə gəlib? Ancaq Məleykə Əsədovaya baxanda belə düşünmürsən. Bilirsən ki, azıb. Elə bil, uzaq yoldan gəlib, deyib, qoy dincimi alım, ancaq necəsə qalıb burda. Heç kim də heç nə deməyib. Deyinlər də “Əşşi qalıb da, işiniz yoxdur” deyib keçib.
Hazırda Məleykə Əsədova sənətin itkin düşənləri siyahısındadır. Heç vaxt da tapılmayacaq. Qəsdən axtarmayacaqlar onu.
O oxuyanda da, rol ifa edəndə də ona görə yadda qalmır ki, insanın bədəni avtomatik olaraq özünümüdafiə mexanizmi keçir.
Gözlər elə bilir, selikli qişaya nəsə olacaq, beyin elə bilir, bu dəqiqə dağılacaq, qulaqlar pərdədən qorxur. Məleykə Əsədova səhnəyə çıxanda deyirlər ki, “başlı başın saxlasın”.
İllər keçir, dövrlər dəyişir, janrlar dəyişir, səslər dəyişir, səhnələr yenilənir, amma Məleykə Əsədova dəyişmir. Sanki 1998-ci ildə televizorda donub qalmış bir kadrdır. O vaxt necə maraqsız idisə, o vaxt necə uğur qazana bilmirdisə, indi də elədir.
Bəlkə də, onun ən böyük uğuru uzun illərdir sənətdə olub, hələ də heç kim tərəfindən tam olaraq müzakirə edilməməsidir. Bu, adi bacarıq deyil.
Şou-biznes dediyin yer qalmaqal, emosiyalar, ehtiras, dava, barışıq məkanıdır. Amma Məleykə xanım həmin dünyanın içində sanki ASAN Xidmətdə xarici passport almaq üçün növbə gözləyən adam kimi tənhadır. Çünki passportu alıb hələ uzun müddət də heç yerə getməyəcəyini bilir o adam. Elə belə alır. Məleykə xanım da elə belə, elə bu cür var.
Onun Niyaməddin Musayevlə civ-civ səs ilə oxuduğu “Azərbaycan qızıyam” mahnısını çox adam eşidib.
Məleykə Əsədova olmağına Azərbaycan qızıdır, ancaq mən onu Azərbaycan sənətçisi kimi görə bilmirəm.
Ümumiyyətlə, mən onu görə bilmirəm.
Orxan Saffari
