İran Prezidenti Məsud Pezeşkianın Ermənistana səfəri gözlənilir. Bununla bağlı İran xarici işlər nazirinin müavini Səid Xətibzadə bildirib.

Pezeşkianın İrəvana səfərindən gözləntilər nədir?

Redaktor.az-a danışan politoloq Elçin Xalidbəyli bildirdi ki, Məsud Prezşkianın Ermənistana səfəri bəzi önəmli məqamlar baxımından böyük maraq doğurur:

"Çünki son vaxtlar Ermənistan İranın maraqlarına ciddi problemlər yarada biləcək istiqamətdə addımlar atmağa başlayıb. Bu addımların sırasında Zəngəzur dəhlizinin açılması prosesində Amerika Birləşmiş Ştatları ilə yaxından əməkdaşlıq məsələsi də var. Hətta belə ehtimallar var ki, səhnə arxasında Amerika Birləşmiş Ştatları Ermənistanla Zəngəzur dəhlizinin icarəyə götürülməsi məsələsini müzakirə edir. Bu da o deməkdir ki, Amerika Birləşmiş Ştatları tezliklə Zəngəzur dəhlizi üzərindən İran sərhədləri boyunca yerləşmiş olacaq. Bu da təbii ki, İranın maraqlarına tamamilə ziddir. Çünki Amerika Birləşmiş Ştatları əgər bu hədəfinə çatarsa, o zaman İran sərhədləri ilə birbaşa təmas məkanına çıxmış olacaq. Təbii ki, belə bir situasiyada rəsmi İrəvan üçün də müəyyən problemlər yaranır".

O bildirdi ki, İran Ermənistanın ən ciddi dəstəkçiləri sırasında yer alır:

"Rəsmi İrəvan indi əlindən gələni etməyə çalışır ki, İranda bu məsələ o qədər də ciddi qıcıq doğurmasın. Hətta Paşinyan hakimiyyəti israrla yayılan xəbərləri təkzib eləməklə İranı arxayınlaşdırmağa çalışır. Rəsmi İrəvanın əsas hədəfi ondan ibarətdir ki, Zəngəzur dəhlizi ətrafında baş verən hadisələr İranın Ermənistana verdiyi dəstəyi zəiflətməsin. Yəni bu baxımdan rəsmi İrəvan İran Prezidentinin Ermənistana səfərindən bütün bu məsələləri yoluna qoymaq baxımından istifadə eləmək niyyətindədir. Eyni zamanda İran prezidentinin də Ermənistana səfəri İran üçün kifayət qədər ciddi əhəmiyyət daşıyır. Çünki bu səfər çərçivəsində rəsmi Tehran Ermənistanın Zəngəzur dəhlizi ilə bağlı atmağa hazırlaşdığı addımları müzakirə edə bilər və xüsusilə də rəsmi Tehranı narahat eləyən bəzi suallara cavab tapmağa çalışa bilər. Yəni hər iki tərəf narahatlıq doğuran mövzuların müzakirəsinə ümid bəsləyə bilər".

Müsahibimizin sözlərinə görə, Ermənistan necə Rusiyaya xəyanət etmişdisə, yaxın gələcəkdə İrana qarşı da bir xəyanət yolu tutacaq və İranı da qərbə satacaq:

"Yəni bu baxımdan İran-Ermənistan münasibətlərinin indiki səviyyəsinin davam etməsi o qədər də uzun çəkməyəcək. Böyük ehtimalla yaxın gələcəkdə İran-Ermənistan münasibətlərinin pozulması qaçılmaz xarakter daşıyacaq", - deyə Elçin Xalidbəyli vurğuladı.