Xəbər verdiyimiz kimi, Ermənistanın Baş naziri Nikol Paşinyan iyulun 24-də Rusiyaya işgüzar səfərə gedəcək.

Səfərlə bağlı Redaktor.az-a danışan politoloq Yusif Bağırzadə bildirdi ki, Paşinyanın Rusiyaya səfəri hər nə qədər ekoloji sammitdə iştirakla bağlı olsa da, səfər çərçivəsində Rusiya-Ermənistan münasibətlərinin müzakirə olunacağına da şübhə yoxdur:

"Rusiya baş naziri ilə görüşdə iki ölkə arasında münasibətlərin hazırkı vəziyyəti, Ermənistanın Aİ üzvlüyü ilə əlaqədar məsələlərin münasibətlərə təsirləri və o cümlədən, Azərbaycanla Ermənistan arasında aparılan sülh danışıqlarının vəziyyəti və Zəngəzur dəhlizi ilə bağlı məsələlər müzakirə oluna bilər. Paşinyan üçün indiki mərhələdə Rusiyaya səfər, qarşıda gələn seçkilərdə Rusiyadan gözlənilən təzyiqləri və eləcə də, müdaxiləni minimallaşdırmaq baxımından əhəmiyyətli olsa da, Rusiya tərəfinin Paşinyan hakimiyyətinə münasibətində hər hansı dəyişikliyə səbəb olmayacaq. Ümumiyyətlə isə müşahidələr göstərir ki, Paşinyanın Rusiyaya səfərləri ancaq Rusiya ilə Azərbaycan arasında münasibətlərdə gərginlik olduğu vaxt baş tutur. Biz bunu 9 May paradında iştirakda da görmüşük".

Siyasətçi səfərin Azərbaycana təsirindən də bəhs etdi.

"Bu səfərin Azərbaycana təsirlərinə gəldikdə isə, düşünmürəm ki, hər hansı birbaşa təsiri olsun. Bizim hər iki ölkə ilə bağlı gündəliyimiz bəllidir. Ermənistanla Zəngəzur dəhlizi, sülh sazişi, delimitasiya prosesi ilə bağlı gündəliyimizin olduğu kimi, Rusiya ilə də AZAL təyyarəsinin vurulmasına görə məsuliyyəti qəbul etmək, ölkəmizə qarşı aparılan kampaniyaya son qoyulması və Rusiya ərazisində azərbaycanlılara qarşı hücumların dayandırılması gündəmdədir. Ermənistanla olan gündəlikdəki məsələlərə dair Rusiya tərəfindən Paşinyana hər hansı təzyiqlərin olma ehtimalı təbii ki, var. Amma Ermənistanın sülh sazişinə olan ehtiyacı, eləcə də tranzit ölkəyə çevrilmə istəyini nəzərə alsaq, düşünmürəm ki, bu səfər özündə bizim maraqlarımızın əleyhinə hansısa razılaşmaları ehtiva etmiş olsun", - deyə Yusif Bağırzadə əlavə etdi.