Ötən gün azərbaycanlıların Rusiyanın Yekaterinburq şəhərində OMON-çular tərəfindən həbs olunduğu və öldürülməsi cəmiyyətdə böyük hiddətə səbəb olub.

Gununsesi.info-ya açıqlamasında Milli Məclisin deputatı, Azərbaycan-Rusiya parlamentlərarası əlaqələr üzrə işçi qrupunun üzvü Azər Badamov bildirib ki, Rusiya Azərbaycana qarşı qeyri-dost davranışlarını davam etdirir:

“Keçən il təyyarəmizin vurulmasından sonra dəfələrlə tələb etməyimizə baxmayaraq, Rusiya günahını öz üzərinə alaraq kompensasiyaların ödənilməsi istiqamətində heç bir addım atmadı. Bu ilin fevral ayında isə düşünülmüş şəkildə ölkəmizə qarşı kiber hücumlar təşkil olundu. Rusiya yenə də bu məsələ ilə bağlı rəsmi bir cavab vermədi. May ayında Astraxan vilayətinin qubernatorunun dəvəti ilə səfərə gedən nümayəndə heyətimizin tərkibində olan mənə, Milli Məclisin deputatına qarşı qabaqcadan xəbərdarlıq edilmədən qara siyahıya salınaraq heç bir əsas olmadan deportasiya olunmağım Rusiyanın növbəti qeyri-dost addımı idi”.

Azər Badamov soydaşlarımıza qarşı zorakılıq edən Rusiya hüquq-mühafizə orqanlarının hərəkətlərini heç bir qanuna sığmadığını bildirib:

“Yekaterinburq şəhərində yaşayan azərbaycanlılara və etnik azərbaycanlı olan Rusiya vətəndaşlarına qarşı zor işlədilərək qətlə yetirilməsi və həbslərin aparılması heç bir qanunun çərçivəsinə sığışmayan hərəkətlərdir. Guya ki, 24 il əvvəl baş vermiş bir ciynayət hadisəsinə görə həbslərin aparıldığı qeyd olunur. Burda sual olunur ki, 24 il əvvəl baş vermiş cinayət hadisəsi niyə indi Rusiyanın istintaq komitəsinin yadına düşdü? Heç bir müqavimət göstərilmədiyi halda OMON-un qapıları qıraraq mənzilə daxil olması və azərbaycanlılara işgəncələr verərək alçaldılmasının məqsədi nədir? Təbii ki, soydaşlarımızın vəhşicəsinə qətlə yetirilməsi və 50-dən çox soydaşımızın həbs olunması cəmiyyətimizdə böyük hiddətlə qarşılanmışdır. Düzdür, ola bilər ki, insanın cinayəti olsun. Amma polisin tələblərinə tabe olaraq heç bir müqavimət göstərilmədiyi halda soydaşlarımızın belə aşağılanması və işgəncələrə məruz qalması qəbul olunmazdır”.

Millət vəkili Azərbaycan XİN-in dərhal reaksiya verdiyini bildirərək qeyd edib:

“XİN məsələyə dərhal reaksiya verdi və qanunları ayaq altına ataraq azərbaycanlılara qarşı qeyri insani davranışları edənlərin cəzalandırılmasını tələb etdi. Təbii ki, bu çox düzgün addım idi. Baş verən hadisə onu göstərir ki, Rusiyada miqrantlara qarşı münasibət heç də qanunlarla idarə olunmur. Rusiya İstintaq Komitəsinin rəhbəri Aleksandr Bastırkinin qeyd etdiyi kimi Rusiya dövləti miqrantlara qarşı saxta ittihamlar işlədərək şantaj olunaraq onları müharibəyə göndərilməsi üçün müqavilələrə imza atmağına məcbur edilir. Bu da miqrantların və qeyri rus vətəndaşlarının Rusiyada yaşamalarını çətinləşdirir. Təbii ki, qonşu respublikalardan olan miqrantlara qarşı belə özbaşınalıqların edilməsi Rusiyanın qonşu respublikaları ilə münasibətlərində çatlar yaradır. Dünyada onsuz da tərəfdarlarını itirdiyi halda qonşu dövlətlərə qarşı belə təzyiq vasitələrindən istifadə edilməsi Rusiyanın təklənməsinə gətirib çıxaracaq”.