Bu mövzu bizi çoxdan maraqlandırır. Mən Baş nazir Paşinyanla hələ çox əvvəl – Ermənistanın sazişin şərtlərini qəbul etdiyi vaxtdan danışmışam. Həmçinin fürsətim olub Azərbaycan hakimiyyəti ilə də bu barədə danışam – onlara bildirmişəm ki, biz bu məsələ ilə bağlı irəliləmək istəyirik, siz də maraqlısınız ki, aydınlıq və sabitlik olsun və Ermənistan bu istiqamətdə olduqca vacib bir addım atıb.
Bu sözləri Avropa Şurasının Baş katibi Alen Berse Avropa Birliyinin Ermənistan və Azərbaycan arasında razılaşdırılmış sülh sazişinin imzalanması prosesinə dair "Birinci kanal"a verdiyi müsahibəsində danışıb.
“Avropa Şurası bu qərarın reallaşmasını necə təmin edə bilər?” sualına cavab olaraq Berse bildirib ki, bu məsələ onların diqqətindədir:
“Düşünürəm ki, Avropa Şurası bu mövzularda dialoq platforması təklif etməklə də rol oynayır. Məsələn, az öncə Türkiyədə idim, burada da bu məsələ, Ermənistanın qonşusu olaraq, gündəmdə idi. Türkiyədə də sülh sazişinin tez bir zamanda imzalanmasının vacibliyindən danışdım.
Risklərdən biri odur ki, bu müzakirə Cənubi Qafqazda çox vacib olsa da, dünyada bir qədər unudula bilər. Bizim məqsədimiz bu məsələnin əhəmiyyətini xatırlatmaq, müzakirələri davam etdirmək və nəhayət, bir son nöqtəyə çatmaqdır – əgər belə demək mümkündürsə, Azərbaycana dostcasına təzyiq göstərməklə”.
O qeyd edib ki, proses yavaş getsə də, irəliləyiş var.
“Son aylarda kifayət qədər irəliləyiş əldə olunub. Hazırkı problemimiz prosesin çox yavaş getməsidir, lakin hər halda irəliləyiş var. Əgər hər şey tamamilə dayansaydı, bu məni narahat edərdi. Yəni bu hərəkəti saxlamaq lazımdır ki, hər şey imzalanmaya doğru getsin – ümid edirəm, bu mümkün qədər tez baş verəcək”, – deyə Avropa Şurasının baş katibi bildirib.
Politoloq Elçin Xalidbəyli Sherg.az-a deyib ki, AŞ-nin Baş katibinin açıqlaması kifayət qədər məntiqsiz, absurd və qərəzli xarakter daşıyır:
"Alen Bersenin fikirlərində ermənipərəst mövqenin yenidən ön plana keçməsi, aktivləşməsinə olan cəhdləri müşahidə edirik. Azərbaycan və Ermənistan arasında sülh sazişinin imzalanması AŞ-yə aidiyyəti olan bir məsələ deyil. Çünki ümumiyyətlə Qərbin hər hansı bir qurumu, o cümlədən dövləti Cənubi Qafqazdakı sülh prosesində vasitəçilik göstərmir. Ən önəmli məqam ondan ibarətdir ki, Azərbaycan Prezidenti İlham Əliyevin israrla Ermənistana qəbul etdirdiyi ikitərəfli danışıqlar formatı uğurla nəticələnib. Həmçinin rəsmi Bakı sülh danışıqlarına kənar şəxslərin müdaxiləsinin qarşısını aldı. Bu uğurda Azərbaycandan başqa hər hansı dövlətin və ya beynəlxalq qurumun payı yoxdur".
Analitik qeyd edib ki, Bersenin fikirləri pozitiv məzmunlu proseslərə kobud müdaxilə xarakteri daşıyır:
"Azərbaycana heç bir dostcasına təzyiq göstərməyə ehtiyac yoxdur. Rəsmi Bakı hər hansı xarici gücün və ya dövlətin təzyiqlərinə boyun əyəcək deyil".
