“İndiki vəziyyətdə beynəlxalq korrekt naminə imzalanacaq sülh sazişi Azərbaycana lazım deyil. Yəni bu vəziyyətdə Azərbaycan sülh sazişinə imza atsa, həm özümüzü aldadarıq, həm də gələcək nəsillərə problem saxlayarıq. Odur ki, bizə real sülh lazımdır, sənəd üzərində sülh lazım deyil”.

Bunu “Reytinq” qəzetinə açıqlamasında hərbi ekspert Azad İsazadə deyib.

“Əvvəla, biz əmin deyilik ki, Ermənistanın baş naziri Nikol Paşinyan sülh sazişini imzalayandan sonra nə qədər hakimiyyətdə qalacaq və imzasına nə dərəcədə hörmət edəcək.

İkincisi, sülh sazişi imzalandıqdan sonra hansısa qüvvə Ermənistanda hakimiyyətə gəldikdə həmin sazişə sadiq qalacaqmı, yoxsa bunu inkar edəcək?

Odur ki, bizim üçün ən vacibi erməni cəmiyyətinin sülh istəməsi və bunu sübut etməsidir: Ermənistan konstitusiyasının dəyişdirilməsi və Azərbaycana qarşı ərazi iddiasından imtina ilə. Bu halda düşünərik ki, ən azından erməni cəmiyyətinin bir hissəsi Azərbaycanla sülh istəyir və bu məqsədlə referunduma gedir, ana qanunlarını dəyişdirir və s.”,- deyə hərbi ekspert vurğulayıb.

A. İsazadə əlavə edib ki, əgər erməni cəmiyyətinin ən azı bir hissəsində belə istək yoxdursa, bu zaman formal sülh sazişi imzalamaq əhəmiyyətsizdir: “Bizə real sülh lazımdır, kağız üzərində sülhü əhəmiyyətli saymıram. Sadəcə, sənəd üzərində sülh imzalanarsa, bəzi dövlətlər açıqlama verəcək, bu durumu tərifləyəcək və s. Real sülh problemin birdəfəlik həlli deməkdir. Əsl sülh isə Azərbaycan qədər Ermənistan üçün də vcibdir”.

Müsahibimiz qeyd edib ki, sülh olmayana qədər Ermənistan blokada vəziyyətində qalacaq:

“Azərbaycan bölgədə böyük layihələr həyata keçirir, kommunikasiyalar qurur, eləcə də İran və Gürcüstan üzərindən paralel kommunikasiyalar yaradır. İran üzərindən Naxçıvana çıxış üçün körpülər salınır, Türkiyə ilə quru əlaqələr üçün Gürcüstanın imkanlarından istifadə olunur. Diqqətlə baxdıqda görürük ki, əslində proseslərdən kənarda qalan Ermənistandır”.