Arıçılıq Habil İbrahimovun ailə peşəsidir. Astaranın Miki kəndindən olan arıçının 120 arı ailəsi var. O deyir ki, balı Avropa bazarına çıxarmaq istəyir, lakin etdiyi müraciətlər cavabsız qalıb.
Habil İbrahimov deyir ki, arılara müntəzəm qayğı göstərmək və onlara bələd olmaq lazımdır. Onun əsasən limon ağaclarından ibarət sitrus bağı da var. Ancaq əsas gəlir yeri arılarıdır.
Hökumət son illər bu sahəyə diqqəti artırdığını bildirir. Kənd Təsərrüfatı Nazirliyi deyir ki, arıçılara subsidiyalar verilir, ölkədə bal yarmarkaları təşkil olunur. Bununla belə, hələ də arıçılar öz məhsullarını ölkədən kənara çıxara bilmədiklərini deyirlər.
Kənd təsərrüfatı üzrə mütəxəssis Vahid Məhərrəmov deyir ki, Azərbaycan yetərincə bal istehsal edə bilmir. Bu da istehsalın aşağı səviyyədə olması ilə bağlıdır:
“Azərbaycan yetərincə bal istehsal edə bilmir. Yəni digər ölkələrlə müqayisədə azərbaycanlılar daha az bal istehsal edir. Bu da onunla bağlıdır ki, istehsal aşağı səviyyədədir. İkincisi, Azərbaycanın istehsal etdiyi bal baha başa gəlir, maya dəyəri, satış qiyməti yüksəkdir. Digər ölkələrlə – Gürcüstanla , Rusiya ilə müqayisədə təxminən 2 dəfə, İranla müqayisədə isə hətta 5 dəfə baha başa gəlir. Üçüncü səbəb odur ki, Azərbaycanda Avropa standartlarına uyğun bal istehsal edilmir, yəni eyni növ bal tələb olunur. Azərbaycanda isə təsərrüfatlar xırda olduğu üçün onların tələbinə uyğun səviyyədə bal istehsal edə bilmirlər”.
Arıçı Habil İbrahimov bildirir ki, problemlə bağlı Kənd Təsarüfatı Nazirliyinə nə qədər müraciət etsələr də, səs-soraq yoxdur:
“Müraciətlərimizə qarşılıq heç bir səs-soraq yoxdur”. //meydan.TV//
