Türkiyə Təhsil Naziri Yusuf Tekin açıqlayıb ki, "Kurtuluş Savası" ifadəsi yeni dərsliklərdən çıxarılacaq. Nazir səbəb kimi isə həmin vaxt dövlətin ərazilərinin çox kiçildiyini, bunun bir qurtuluş olmadığını göstərib.

Türkiyədə bu qərara böyük etirazlar davam edərkən əvvəlki yazımda da qeyd etdiyim kimi bu qərar Ərdoğanın Osmanlını bərpa siyasətinin növbəti nümunəsidir. Siyasət oxuması olan hər kəs başa düşür.

Yadınızdadırsa, biz uşaq olanda, torpaqlarımız işğal altında ikən dərsliklərdə Birinci Qarabağ Müharibəsinə xüsusi yer verilirdi. O dövrdə təhsil almış hər kəs bir gün torpaqlarımızın işğaldan azad ediləcəyi günün arzusuyla böyüdülüb. Ermənistan isə işğal etdiyi torpaqlardan daha da cəsarətlənərək "Böyük Ermənistan" yaratmağı xəyal edirdi. Həmin dövrdə Heydər Əliyevin idarə etdiyi dövlətin hərbi gücü zəif olsa da, diplomatik yollarla Ermənistanı tam blokadaya aldı. Bu siyasəti davam etdirən İlham Əliyev ordunu gücləndirdikdən sonra müharibə başladıb torpaqlarımızı işğaldan azad etdi. Yəni, bizə uşaqlıqdan aşılanan intiqam günü gəlib yetişdi.

Bu gün artıq ermənilər "Böyük Ermənistan" xülyasından vazkeçib. Artıq Ermənistandakı dərsliklərdə "Böyük Ermənistan" arzusundan bəhs edilməyəcək.

Azərbaycanda isə şagirdlərə "Qan Yaddaşı" əvəzinə torpaqlarımızın azad olunduğu zəfər tarixləri öyrədilir. Bunun ən böyük səbəbi xalqını işğalla barışmayan şəkildə yetişdirən, zamanı çatanda onu dövlətin müdafiəsinə qaldıra bilən dövlət siyasətidir.

Türkiyəyə qayıtsaq, bu dövlət 100 illik tarixində heç vaxt Ərdoğan qədər uzun müddət vəzifədə qalan liderə sahib olmayıb. Xalq isə hər zaman Osmanlı həsrəti ilə yaşayıb. Ərdoğan hakimiyyətə gələndən dini siyasət aparır, Osmanlı ənənələrinin bərpasına çalışır. Türkiyədə yaşayanlar bu siyasəti daha dərindən hiss edir.

Tarix Ərdoğana Türkiyəni Osmanlı sərhədlərinə qaytarmağa imkan verəcəkmi, yaşayıb görəcəyik. Ancaq bir həqiqət var ki, Ərdoğan böyük hissəsi cahil olan Türkiyə xalqı ilə heç vaxt hesablaşmayıb, dini əlində təsir gücü kimi istifadə edərək həmişə öz siyasətini yürüdüb. Və bu siyasətin mahiyyəti gün keçdikcə daha aydın görülür.

Hətta Ərdoğanın məhkəmə vasitəsiylə CHP-in başına keçirdiyi Kılıçdaroğlu belə "devlet aklının yanındayız" sözünü bu gün boşuna demir. Dövlət Bağçalı lap əvvəldən Ərdoğan tərəfə keçib. Bu adamlar bu gün açıqca Ərdoğanın tərəfindədirsə, dünən müxalifət kürsüsündə olarkən də Ərdoğanın adamı, planın bir parçası olduqlarını bir az zəkası olan hər kəs anlayır.

Kütlələr bu gün üçün fərqli düşünə bilər, ancaq liderlər həmişə gələcəyi hesablayaraq qərarlar alır, öz gedişlərini ona uyğun edir, kütlələr də o qərarla hesablaşmağa məcbur olur. Ərdoğanın siyasəti davam etdirilsə 1923-cü ildə Atatürkün qəbul etməyə məcbur olduğu Türkiyə sərhədləri 100 il sonra güclənərək Səlcuqluların, Osmanlıların sərhədlərinə qovuşa, Türkiyə yeni bir dövlət olaraq ortaya çıxa bilər. Özü də daha az müharibəsiz, daha az gurultulu bir yolla..

O ki qaldı müxalifətin hay-küyünə; 13 il Kılıçdaroğlunun Türkiyənin başına keçəcəyinə inanan bir tərəfin nə qədər uzaqgörən olduğu keçmişlərindən bəllidir...