Rusiya Federasiya Şurası Rusiya və İran arasında hərtərəfli strateji tərəfdaşlıq haqqında müqavilənin ratifikasiyası haqqında qanunu təsdiqləyib.
Rusiya parlamentinin yuxarı palatasının bu gün keçirilən plenar iclasında bu ilin yanvarın 17-də imzalanmış Rusiya və İran arasında imzalanan Hərtərəfli Strateji Tərəfdaşlıq haqqında müqavilənin ratifikasiyası haqqında qanuna baxılıb.
Federasiya Şurası Dövlət Dumasının aprelin 8-də ratifikasiya etdiyi Müqaviləni təsdiqləyib.
Politoloq Əhəd Məmmədli "Sherg.az"a deyib ki, Rusiya və İran arasında tərəfdaşlıq danışıqları uzun müddət getsə də, nəticə gözlənilən kimi olmadı:
"Hərtərəfli Strateji Tərəfdaşlıq haqqında müqavilənin əsas məğzi odur ki, İran və ya Rusiya hər hansı dövlətlə müharibəyə girsə, qarşı tərəfə yardım etməyəcək. Onsuz da uzun müddət ki, bu iki dövlət müttəfiqdir. Məsələn, Rusiya-Ukrayna müharibəsində İran Ukraynaya dəstək vermir. Həmçinin İran ABŞ-la və ya digər dövlətlərlə münaqişə yaşayarsa, Rusiya həmin ölkəyə yardım etməyəcək. Lakin digər tərəfdən İran İsraillə problemlər yaşasa da, Rusiya bu dövlətlə münasibətləri qoruyub saxlayır. Hətta Suriyada Bəşər Əsəd dövründə İsrail və Rusiya Tehrana qarşı birgə hərəkət edirdilər ki, İranın təsiri Suriyada azalsın. Bu mənada əslində Rusiya-İran əlaqələrində də problemlər və suallar var. Ona görə də sözügedən müqaviləni güclü, o cümlədən qəti razılaşma hesab etmirəm. Moskva və Tehran tərəfdaşlıq haqqında müqavilənin guya bölgəyə sülh, əmin-amanlıq gətirəcəyini bəyan edirlər. Amma əslində bu, yalnız onların maraqlarına cavab verir".
Politoloq əlavə edib ki, Rusiya və İran özlərinin istəklərinin diqtə edildiyi yerlərdə birgə hərəkəti üstün tuturlar:
"Necə ki Suriyada, eyni zamanda Cənubi Qafqazda illərdir bunun şahidi oluruq. Lakin hazırda hər iki bölgədə Türkiyənin varlığı onlara imkan vermir. Bu mənada tarix boyu Rusiya və İranın tərəfdaşlığı həm də Türkiyəyə qarşı olub . Çünki Türkiyə bu dövlətlərin maraqlarına zərbə endirdi. Elə tərəfdaşlığın bir məqsədi də toparlanıb açıq yox, gizli şəkildə gələcəkdə rəsmi Ankaraya qarşı addımlar atmaq, adekvat cavab verməkdir. Odur ki, Türkiyə və Azərbaycan hazırlıqlı olmalı və bu birlikdəliyi pozmağı bacarmalıdır".
