Goranboy rayonunda özbaşınalıq ən yüksək həddə çatıb. Vəziyyət belədir ki, hazırkı məqamda icra başçısı Nizaməddin Quliyev rayonu bir-birinə vurmaqla yanaşı, həm də əhalinin başına min bir oyun gətirir. Elə bu səbəbdəndir ki, Goranboydakı bütün yas və toylarda ancaq icra başçısının insanlara qan uddurmasından bəhs olunur.
Millət necə tarac olur-olsun...
Sabirin bu şerindən bir misra tamamilə Nizaməddin Quliyevə xas olan cəhətdir. Çünki icra başçısı olaraq rayonda yalnız özünü düşünməklə məşğul olan bu şəxs, başqalarının bədbəxtliyi üzərində öz xoşbəxtliyini qurmaqla məşğuldur.
Son günlərin ən geniş müzakirə mövzularından biri olan taxıl sahələrinin biçilməsi problemi Goranboyda da yaşanır. Aldığımız məlumata görə, sakinlərin əkdiyi əkin sahələri artıq məhv olmaq üzrədir. Çünki insanlar taxılı biçmək üçün kombayn tapa bilmirlər. Nəticədə, yağan yağış və təbii şərait taxılın məhsuldarlığını aşağa salmaqdadır. Bizimlə söhbət edən Goranboy sakinləri bildiriblər ki, yayın ikinci ayı olmasına baxmayaraq, rayondakı taxıl sahələrinin böyük bir qismi hələ də biçilməmiş qalıb. Bununla bağlı dəfələrlə İcra Hakimiyyətinə yardım üçün müraciət etmələrinə baxmayaraq, onlara heç bir köməklik göstərilməyəcəyi bildirilib.
Əldə etdiyimiz məlumata görə, icra başçısı Nizaməddin Quliyev və onun müavini Baxış Abdullayevin Goranboyda minlərlə hektar zəmiləri var. Həmin sahələr isə vaxtında və itkisiz biçilərək, məhsulu yığılıb. Səbəb isə icra başçısı və müavininin göstərişi ilə rayondakı kombaynların yalnız onlar üçün işləməsi olub. Nəticədə, minlərlə hektar taxıl zəmilərinin biçilməsi xeyli vaxt aparıb və digər sakinlərin əkdikləri məhsullar isə batmaqdadır. Üstəlik, Nizaməddin və Baxış cütlüyü əhaliyə kombaynlardan istifadə üçün imkanlar da yaratmayıblar. Çünki onların başqa rayonlarda da taxıl zəmiləri olduğuna dair məlumatlar var və kombaynlar da həmin ərazilərə göndərilib.
Paqonometr və metr arasındakı fərq
Əslində, Nizaməddin Quliyev çox “savadlı” adamdır. O qədər “savadlı”dır ki, paqonometrlə metr arasındakı fərqi illərdən bəri hələ də müəyyənləşdirə bilməyib. Halbuki bunlar ayrı-ayrı ölçü vahidləridir ki, bu ölçülər üzrə görülən işlərin də qiyməti tamam fərqlidir.
Qeyd edək ki, prezident İlham Əliyevin göstərişinə əsasən rayonlarda iş görən fəhləsindən tutmuş, icraçıya qədər hər bir şəxsin haqqı vaxtlı vaxtında və tam şəkildə verilməlidir. Dövlət başçısı bununla bağlı icra başçılarına da xəbərdarlıq etmişdi ki, sahibkarları incidən şəxs ona qarşı çıxmış sayılır. Amma Nizaməddin Quliyev üçün deyəsən, bunun heç bir əhəmiyyəti yoxdur. Çünki o, artıq prezidentin göstərişinə qarşı çıxıb və bildiyini etməkdədir. Məsələn, Goranboyun icra başçısı bu müddət ərzində yüzlərlə fəhlənin haqqını kəsərək, onların zəhmətinin haqqını öz bildiyi şəkildə hesablayır. Belə ki, bu şəxs hələ də paqonometrlə metr arasında fərqi bilmədiyindən görülən işlərə görə yalnız kvadratmetr üçün pul ödəyir. Digər işlər üçün isə qətiyyən nə pul verir, nə də ayırd edə bilmədiyindən məsələnin üzərinə gəlir. Üstəlik, onu da deyir ki, “paqonometr”lə “metr” arasında heç bir fərq yoxdur.
Bundan əlavə Nizaməddin Quliyev rayonda abadlıq və yenidənqurma işlərini həyata keçirən sahibkar Müqayis Verdiyevi də həbs etdirərək, onu şərləməyi bacarıb. Məsələnin də mahiyyəti budur ki, gördüyü işin müqabilində qanunla ona verilməli olan 156 min manat pulu ödəməkdən imtina edib. Və bunun da başlıca səbəbi oğlu Ramal Quliyevin dövlət büdcəsindən ayrılmış pulları mənimsəməsidir ki, atası da oğlunun işlərini ört-basdır etmək üçün sahibkarı həbs etdirib.
Hər iki fakt təsdiq edir ki, Goranboyun icra başçısı birmənalı olaraq dövlət başçısına qarşı çıxır və onun tapşırıq və göstərişlərinə məhəl qoymur. Əks təqdirdə, nə iş adamlarını həbs etdirər, nə də fəhlənin haqqını kəsməzdi.
Ramal Quliyev atasını yenə xərcə saldı
Ötən günlərdə xəbər vermişdik ki, icra başçısının oğlu Ramal Quliyev baş verənlərdən dolayı ölkədən qaçmalı olub. Daha doğrusu, Nizaməddin Quliyev oğlunun adının daha çox hallanması səbəbindən Ramalı ölkədən çıxarıb ki, bir müddət xaricdə yaşasın. Amma gələn xəbərlərdə deyilir ki, Ramal Quliyev atasını yenə ciddi şəkildə xərcə salıb və dövlət başçısının bu yaxınlarda Goranboy üçün ayırdığı 1 milyon manatın da başına daş salınması üçün tədbirlər görülür.
Məlumatda deyilir ki, Ramal Quliyev Rusiyadadır və orada bir neçə nəfərlə istirahət edir. Həmin şəxslərdən birinin aktrisa və ya şou biznes əhlindən olduğu bildirilir. Qeyd edilir ki, Rusiyada keyf çəkən icra başçısının oğlu hesabıdakı bütün pullarla yanaşı, özü ilə apardığı nəğd pulları da xərcləyərək, Bakıdakı dostlarından da bir xeyli borc alıb. Məsələnin üstü açılan kimi isə Nizaməddin Quliyev bərk əsəbiləşib və təzyiqi qalxıb. Hətta iş o yerə çatıb ki, səhhətində yaranmış problemlə əlaqədar icra başçısı Bakıya gələrək, tanınmış klinikalardan birində müayinə olunub.
Məlumatda deyilir ki, Ramal Quliyevin dostundan aldığı bir neçə yüz min dollar pul məsələsinin üstü isə həmin şəxsin icra başçısına borca bağlı müraciət etməsi nəticəsində açılıb. Bildirilir ki, borcun məbləğindən xəbər tutan Nizaməddin Quliyevin elə iş yerindəcə halı xərəb olub və Baxış Abdullayevin yardımı ilə onu xəstəxanaya aparıblar.
Qeyd edək ki, bu Ramal Quliyevin ilk əməli deyil. O hələ Mingəçevirdə Kapitalbankın yerli filialına rəhbərlik edərkən 500 min manat pulun da “başına daş salmışdı”. Həmin vaxt atası onu vəziyyətdən çıxarmağı bacarmışdı. Ardından isə Goranboyda həyata keçirilən tikinti işlərinə nəzarət edən “Fəqan-Xidmət” MMC-yə rəhbərlik etməsi və büdcə pullarını da mənimsəməsi böyük yeyintilərə yol açıb ki, hal hazırda Nizaməddin Quliyevin həmin borcları ödədiyi deyilir. Üstəlik, işi ört-basdır etmək üçün sahibkar Müqayis Verdiyevi həbs etdirmişdi.
1 milyon manat da belə getdi
Qeyd edək ki, bu yaxınlarda prezidentin mərəncamı ilə dövlət büdcəsindən Goranboyun abadlaşdırılması üçün əlavə olaraq 1 milyon manat pul ayrılıb. Həmin pulun yalnız rayonda abadlıq və yenidənqurma işlərinin yekunlaşdırılması üçün nəzərdə tutulduğu deyilir. Çünki icra başçısı Nizaməddin Quliyevin heç bir iş görməməsi və indiyə qədər ayrılmış 6 milyon manatın mənimsənilməsi bu işləri yarımçıq saxlayıb. Bakıdan gələn nümayəndələr isə vəziyyəti belə görüb ona yardımçı olmağa çalışıb.
Amma görünən odur ki, 1 milyon manat da rayona sərf olunmayacaq. Əvvəla icra başçısı oğlunun borclarını bağlamaq üçün bir neçə yüz min manatından keçməlidir. Ardından isə yerdəqalan pulun işləri yekunlaşdırmağa sərf etmədiyi dəqiq məsələdir. Belə olan təqdirdə, Nizaməddin Quliyev daha optimal yol tapıb. O, ayrılan pulları da götürüb, icra başçılığından birdəfəlik getməyi qərarlaşdırıb. Ona görə də, icra başçısının sərəncamını gözlədiyinə dair məlumatlar var.
