Göyçay rayonu, Qaraxıdır kənd sakiniZamanova Radə Emin qızı tərəfindən ölkə rəhbərliyinə müraciət ünvanlanıb. Bir nüsxəsi də "DİA-AZ"a daxil olan müraciətdə deyilir:
"Mən, Zamanova Radə Emin qızı, Göyçay rayonu Qaraxıdır kənd sakini olaraq mətbuat vasitəsilə ölkə rəhbərliyinə və aidiyyəti qurumlara müraciət etmək məcburiyyətində qalmışam.
Mətbuat vasitəsilə Azərbaycan Respublikasının Prezidenti cənab İlham Əliyevdən, Birinci vitse-prezident Mehriban xanım Əliyevadan və Azərbaycan Respublikası Ali Məhkəməsinin sədri cənab İnam Kərimovdan xahiş edirəm ki, uzun illərdir davam edən bu ədalətsizliyə son qoyulması üçün mənə köməklik göstərilsin.
Mən Göyçay rayonu Potu kəndində yerləşən 0,11 hektar torpaq sahəsini 23 iyun 2008-ci il tarixdə Potu kənd sakini Talıbova Qətibə Nurməmməd qızından notarial qaydada almışam. Torpaq sahəsi 12.06.2008-ci il tarixli MH 0004464 nömrəli Daşınmaz Əmlakın Dövlət Reyestrindən çıxarışa və plan-ölçüyə əsasən mənə satılıb və bunun üçün 16 550 manat pul ödəmişəm.
Alqı-satqı müqaviləsi Ucar rayon Dövlət Notariat Kontorunun dövlət notariusu E.Ə.Cəlalov tərəfindən təsdiqlənib. Yəni torpaq sahəsi tam qanuni əsaslarla əldə olunub.
Mülkiyyət hüququmun dövlət qeydiyyatına alınması üçün DƏDRX-nin 16 saylı Ərazi İdarəsinə müraciət etsəm də, 31 iyul 2015-ci ildə mənə əsassız olaraq imtina cavabı verildi.
Bununla bağlı məhkəməyə müraciət etdim və Şəki İnzibati Məhkəməsinin 16 oktyabr 2015-ci il tarixli, 2-1(84)-772/2015 saylı qərarı ilə iddiam tam təmin edildi. Həmin qərarla torpaq sahəsi üzərində mülkiyyət hüququmun dövlət qeydiyyatına alınması cavabdeh qurumun üzərinə qoyuldu.Lakin təxminən 10 ildir ki, bu məhkəmə qərarı icra edilmir.
Hazırda “Daşınmaz Əmlakın Dövlət Kadastrı və Reyestri” PHŞ-nin 16 saylı Ucar Ərazi İdarəsi məhkəmə qərarının icra olunmamasını Şəki İnzibati Məhkəməsində baxılan başqa bir inzibati işlə əsaslandırır.
Həmin işdə sübut kimi təqdim edilən müayinə-baxış aktı isə başqa şəxsə ayrılmış 0,06 ha torpaq sahəsinə aiddir, mənim torpağım isə 0,11 ha-dır, sənəddə tarix yoxdur, koordinatlar natamamdır, ilkin texniki əsaslandırma mövcud deyil.
Bu sənəd açıq-aşkar qanunsuz və saxtadır və hüquqlarımı ciddi şəkildə pozur.
Ən acınacaqlısı isə odur ki, iş adamı Ömərov Vüqar Muxtar oğlu mənə məxsus torpaq sahəsini saxta sənədlər əsasında zəbt edərək üzərində böyük villa inşa etdirib. Halbuki, torpaq sahəsi ilə bağlı qanuni alqı-satqı müqaviləm və məhkəmə qərarım var.
Mənim artıq dövlət orqanlarında döymədiyim qapı qalmayıb. Məhkəmə qərarı icra edilmir, torpağım faktiki olaraq əlimdən alınıb və hüquqlarım tapdanır.
Bu səbəbdən mətbuat vasitəsilə Azərbaycan Respublikasının Prezidenti cənab İlham Əliyevdən, Birinci vitse-prezident Mehriban xanım Əliyevadan və Azərbaycan Respublikası Ali Məhkəməsinin sədri cənab İnam Kərimovdan xahiş edirəm ki, məhkəmə qərarının icrası təmin edilsin, saxta sənədlərlə torpaq zəbt edənlər məsuliyyətə cəlb olunsun, mənim mülkiyyət hüquqlarım bərpa edilsin".
