Bu günə qədər dərc etdiyimiz araşdırmalarda Elm və Təhsil Nazirliyində formalaşan qruplaşmanın dövlət satınalmaları üzərindən on milyonlarla manat dövlət vəsaitinin talamasına dair ciddi fakt və sübutlarla çıxış etmişik. Təkzibolunmaz faktlar göstərir ki, nazirin dostları və sinif yoldaşlarından ibarət qruplaşmanın əsas üzvləri olan Tural Ayvazlı, Valeh Mirzalıyev, Elnur Əliyev və başqaları bütün maliyyə dövriyyəsinə nəzarəti ələ keçirərək dövlət büdcəsinin səmərəsiz, şəxsi maraqlarına xərclənməsi ilə məşğuldurlar.

Korrupsiya şübhəsi doğuran çoxmilyonluq tender

Bu dəfə Elm və Təhsil Nazirliyinin tabeliyindəki Təsərrüfathesablı Əsaslı Tikinti və Təchizat İdarəsi (VÖEN 1500016711) ilə “Təhsildə İnnovativ Texnologiyalar Əlavə Təhsil Mərkəzi” MMC (VÖEN 1402405651) arasında 23 may 2024-cü ildə (038-B/24 nömrəli) bağlanan satınalma müqaviləsindən danışacağıq.

Nazirliklə müqavilə bağlayan şirkətin təsisçisi həmin Nazirlikdə idarə rəisi vəzifəsini tutur

Təhsildə İnnovativ Texnologiyalar Əlavə Təhsil Mərkəzi” MMC (VÖEN: 1402405651 ) 30 avqust 2012-ci ildə Bakı şəhəri Lokal Gəlirlər Baş İdarəsində dövlət qeydiyyatına alınıb. Reyestr məlumatlarına görə, şirkətin nizamnamə kapitalı cəmi 100 manatdır. MMC-nin hüquqi ünvanı Bakı şəhəri, Nəsimi rayonu, Hüseynbala Əliyev küçəsi, ev 4, mənzil 105 göstərilir. Şirkətin qanuni təmsilçisi isə Emin Əlövsət oğlu Axundovdur. Reyestr məlumatlarının dəyişiklik tarixçəsinə əsasən, MMC-nin Xanlarov Vüsal Tərlan oğlu tərəfindən təsis edildiyi göstərilir.

Bəs Vüsal Xanlarov kimdir? Elm və Təhsil Təhsil Nazirliyində Təhsil Sisteminin İnformasiyalaşdırılması İdarəsinin rəisi…

Yəni Nazirlik milyonlarla manatlıq müqavilə bağlayır, müqavilənin qarşı tərəfində dayanan şirkətin təsisçisi isə həmin Nazirlikdə idarə rəisidir. Başqa sözlə, dövlət vəsaiti hesabına satınalma aparan qurumun əməkdaşı eyni zamanda bu satınalmadan gəlir əldə edən şirkətin təsisçisidir. Bu faktın özü tenderin şəffaflığını birbaşa sual altına qoyur.

Qeyd edək ki, haqqında danışdığımız 038-B/24 nömrəli müqavilənin predmeti STEAM əsaslı tədrisin təşkili xidmətlərinin satın alınmasıdır. Satınalan təşkilatı - nazir Emin Əmrullayevin dostu və sinif yoldaşı Valeh Taleh oğlu Mirzalıyev, təchizatçı şirkəti isə onun qanuni təmsilçisi Emin Əlövsət oğlu Axundov təmsil edib. Satınalan təşkilatın hüquqi ünvanı Bakı şəhəri, Nərimanov rayonu, Seyid Yəhya Bakuvi küçəsi 18, təchizatçı şirkətin hüquqi ünvanı isə Bakı şəhəri, Nəsimi rayonu, Hüseynbala Əliyev, ev 4, mənzil 105 kimi göstərilib.

Müqavilənin şərtləri təchizatçı şirkət üçün kifayət qədər böyük həcmli öhdəliklər nəzərdə tutur. Məlumata görə, müqavilənin ümumi dəyəri isə milyonlarla manat təşkil edib.

300 min manat “Training Plus” MMC-nin hesabına köçürülüb və sonradan nağdlaşdırılıb?

Araşdırmamız daha bir diqqətçəkən müqaviləni ortaya çıxarıb. “Təhsildə İnnovativ Texnologiyalar Əlavə Təhsil Mərkəzi” MMC ilə “Training Plus” MMC (VÖEN: 1308571521) arasında 25 oktyabr 2024-cü ildə 038-24140 nömrəli xidmət müqaviləsi bağlanıb.

Müqavilədə sifarişçi qismində Emin Əlövsət oğlu Axundovun rəhbərlik etdiyi “Təhsildə İnnovativ Texnologiyalar Əlavə Təhsil Mərkəzi” MMC, icraçı qismində isə Elnarə Rəşadət qızı Qasımlının rəhbərlik etdiyi “Training Plus” MMC göstərilib.

Nizamnamə kapitalı cəmi 10 manat olan bu şirkət Bakı şəhəri, Yasamal rayonu, Əsəd Əhmədov küçəsi, ev 27D, mənzil 192 ünvanında qeydiyyatdadır.

Müqavilənin predmeti STEAM təhsili üzrə “Rəqəmsal bacarıqlar” və “Səriştə əsaslı suallarla işləmə yollarının öyrədilməsi” mövzusunda təlimlərin təşkilidir. Bu xidmət üçün dövlət vəsaitindən 300 min manat ayrılıb. Burada əsas müəmma 300 min manatın sonrakı taleyi ilə bağlıdır.

Redaksiyamıza daxil olan məlumata görə, müqavilə üzrə nəzərdə tutulan 300 min manat “Training Plus” MMC-nin hesabına köçürülüb və həmin vəsaitin sonradan nağdlaşdırıldığı iddia olunur.

Məsələnin bütün detalları, o cümlədən pulun sonrakı hərəkəti hüquq-mühafizə orqanları tərəfindən bank əməliyyatları və maliyyə sənədləri əsasında yoxlanılmalıdır.

Korrupsiya şübhəsini gücləndirən əsas məqam isə 300 min manatlıq xidmətin iqtisadi əsaslandırılmasının və ciddi internet resursu olmayan “Training Plus” MMC-yə bu məbləğin ödənilməsinin aydın olmamasıdır.

Xüsusi qeyd: Bu vəsait qarşılığında neçə təlim keçirilib, neçə iştirakçı və təlimçi cəlb olunub, təlimlərin müddəti və keçirildiyi ünvanlar, təlimçilərin ixtisası, xərclərin strukturu və nəticələrin necə qiymətləndirildiyi açıqlanmalıdır.

Biz sosial şəbəkələrdə və internet resurslarında müqavilələrdə göstərilən tarixlərə uyğun olaraq bu təlimlərin keçirildiyini təsdiqləyən hər hansı məlumat tapa bilmədik.

Əgər dövlət vəsaitləri talanmayıbsa, o zaman….

Naziri Emin Əmrullayevin dostlarından xahiş edirik ki, 300 min manatlıq xidmətin faktiki göstərildiyini təsdiqləyən sənədləri: təhvil-təslim aktlarını, iştirakçı siyahılarını, davamiyyət cədvəllərini, təlim proqramlarını, foto-video materiallarını, təlimçi müqavilələrini, əməkhaqqı ödənişlərini və yekun hesabatları ictimaiyyətə açıqlasınlar.

Əgər bu sənədlər açıqlanmayacaqsa, ortaya çıxan sualların hüquq-mühafizə orqanlarının diqqətindən kənarda qalması da doğru olmazdı. Baş prokuror yanında Korrupsiyaya qarşı Mübarizə Baş İdarəsinin əvvəlki araşdırmalarımızda ortaya qoyduğumuz faktlarla birlikdə bu məsələləri də hüquqi baxımdan qiymətləndirməsi məqsədəuyğun görünür.

Aşağıdakı sualların cavablandırılması vacibdir:

1. 038-B/24 nömrəli əsas müqavilə və satınalma şərtləri subpodratçı cəlb edilməsinə icazə verirmi?

2. Satınalan təşkilat “Training Plus” MMC-nin prosesə cəlb edilməsindən xəbərdar olubmu?

3. Şirkətin cəlb edilməsi ilə bağlı satınalan təşkilatın yazılı razılığı alınıbmı?

4. “Training Plus” MMC-yə ödənilən 300 min manat əsas müqavilədə nəzərdə tutulan konkret hansı iş və ya xidmətin icrasına görədir?

5. Bu xidmətlərin dəyəri əsas təchizatçının ilkin qiymət təklifinə daxil edilibmi?

6. “Training Plus” MMC-nin texniki imkanları, təlimçi heyəti və resursları 300 min manatlıq bu həcmdə xidməti göstərməyə kifayət edirdimi?

Nağdlaşdırma nə vaxt pul yuyulması şübhəsi yaradır?

Şirkətin hesabından pul çıxarılması öz-özlüyündə cinayət və ya pul yuyulması demək deyil. Lakin xidmətin faktiki göstərilmədiyi, sənədlərin saxtalaşdırıldığı, qiymətin şişirdildiyi və vəsaitin sonradan vəzifəli və ya əlaqəli şəxslərə qaytarıldığı müəyyən edilərsə, bu əməliyyatlar mənimsəmə, korrupsiya və cinayət yolu ilə əldə edilmiş vəsaitlərin leqallaşdırılması şübhəsi yaradır.

Suallarımız sadədir, sənədləri göstərin. Əgər göstərə bilmirsinizsə, bu sualların cavabını biz araşdırmağa davam edəcəyik.

Yenə də Elnur Əliyev…

Elm və Təhsil Nazirliyində şəffaflığı şübhə doğuran o qədər layihələr var ki, təkcə bu araşdırma ilə kifayətlənmirik. Məsələn, reyestr məlumatlarına görə, Elnur Qəzənfər oğlu Əliyevin təsisçisi olduğu “Peşəkar Təlim və İnkişaf Mərkəzi Əlavə Təhsil Müəssisəsi” MMC (VÖEN: 1802977201) 21 aprel 2016-cı ildə dövlət qeydiyyatına alınıb. Şirkətin nizamnamə kapitalı 100 manat, hüquqi ünvanı Bakı şəhəri, Xətai rayonu, Xocalı küçəsi, ev 64, qanuni təmsilçisi isə Mehtiyev Nəcməddin Saday oğlu kimi göstərilir. Reyestr məlumatlarında şirkətə 2016-2024-cü illərdə vergi hesabatlarının vaxtında təqdim edilməməsi ilə bağlı dəfələrlə maliyyə sanksiyası tətbiq edildiyi də qeyd olunur.

“Milyonerlər məhəlləsi”ndə yeyilən milyonlar

Araşdırdığımız digər şirkətlər sırasında “Edupark” MMC (VÖEN: 2004997201) və “Innovatıve Business Pruducts” MMC (VÖEN: 1002491601) də var. Bu şirkətlərin Elm və Təhsil Nazirliyinin müxtəlif strukturları ilə xidmət və sifarişlər üzrə münasibətləri ayrıca araşdırma mövzusudur.

Eyni zamanda, Təhsil İnstitutunun tabeliyində olan Təhsil Texnologiyaları Mərkəzi (VÖEN: 2000489501) ilə bağlı da ciddi suallar mövcuddur. Mərkəzin rəhbəri Emin İbrahimov və onun nazirliyin müxtəlif strukturları ilə əlaqələri, eləcə də STEAM, icma əsaslı məktəbəqədər təhsil və peşə təmayüllü siniflər layihələri çərçivəsində dövlət vəsaitlərinin necə xərcləndiyi də ayrıca araşdırma mövzusudur.

Bu sualların cavablarını sənədlər üzərindən axtaracağıq. Növbəti araşdırmalarımızda həmin vəsaitlərin hansı şirkətlərə, hansı əsaslarla və hansı şəxslərin iştirakı ilə yönəldildiyini konkret faktlarla təqdim edəcəyik.