Masazırda MTK-ların tikdiyi evləri ipoteka ilə almaq istəyirsinizsə, aylıq ödəyəcəyiniz məbləğin üzərinə 400-500 manat da gəlin. Deyəcəm niyə. Azı 150-200 manat yolpulu və əlbəttə ki, korlanan əsəblərinizə görə, yaxşı bir psixoloq lazım olacaq desəm, yəqin, MTK-ların acığına getməz.
Yaxın oturun...
Lent.az Masazırda MTK-ların tikdiyi binalardan reportajı təqdim edir.
"20 Yanvar" metrosunun çıxışındayam. Adı hələ də "manatlıq" qalan, amma artıq 2 manata aparan taksilərdən birinə minirəm. Tıxaca görə təkcə metro ərazisindən çıxmaq 15 dəqiqədən çox vaxt alır. Jurnalist olduğumu və Masazırdakı problemlərdən reportaj hazırlamağa getdiyimi öyrənən sürücü yol uzunu danışmaq üçün bəhanəsini tapır!
- Hansı problemi deyəsən? 1 deyil, 2 deyil. İşıq sönən kimi camaat qalır soyuqda. Yollar pis gündə, kanalizasiya sistemi yox. Yağış yağan kimi adam ürəyinə qədər palçığa batır...
Belə uzun və tıxaclı yolun böyük hissəsini sürücünün şikayətləri ilə gedirik. Masazırın girişinə çatırıq. Qarşı oturacaqda oturan xanım ödənişini edib düşür. Keçib onun yerində otururam. Gözlə görülən problemlər bizi "Masazır" yazısı ilə birgə qarşılayır. Lakin bu problemlərdən başqa bir reportajımızda bəhs edəcəyik. Nəhayət, "İkinci Araz" deyilən yerdə taksidən düşürəm.
Diqqətimi ilk çəkən sıx tikilən binalar olur. Təxminən yarım hektar ərazidə 3-4 bina tikilib. Palçıqlı, gölməçəli küçələrdən keçib binanın "həyətinə" yaxınlaşıram - Siyavuş Aslan 1 ünvanı. Daha doğrusu, həyətə yox, dar bir araya. Həyətdə nəyinki uşaq meydançası, park, ağac, heç maşın parkinq etmək üçün yer də yoxdur. Kimsə övladını, ya nəvəsini günəşli havada gəzdirmək istəsə, məcburən binanın ərazisindən çıxıb üfunətli "lehmə vannası" da qəbul etməli olacaq. Çünki binanın həyətinə gün düşmür. MTK-lar aldıqları ərazidə maksimum bina tikib daha çox qazanmaq üçün gün işığı düşməyə yer buraxmırlar.
Əlində zibillə binadan çıxan orta yaşlı kişiyə yaxınlaşıram. Salamlaşıb binayla bağlı söhbətə girişirəm:
- Nə qədər müddətdir bu binada yaşayırsız?
- Avqust ayından bəri... 5 aydır.
- Necədir? Deyirlər, qaz probleminiz var.
- Elə biz özümüzü "qaz" yerinə qoyublar. Ona görə. Demişdilər ki, 2022-ci ilin avqust ayında bina hazır olacaq. 2023-cü ilin yayında isə qazlar veriləcək. Binanın istifadəyə verilməsi 1 il gecikdi, yəni 2023-cü ildə verdilər. Amma qaz vermədilər. 3 ilə yaxındı ki, hər dəfə deyirlər, hazır olacaq, sənədləri aparmışıq, indi çəkilir, qaz borularını gətirmişik... Belə-belə başımızı piyləyirlər.
- Bəs istiliyiniz nə ilə təmin olunur?
- Kondisioner yandırırıq. MTK-nın özünün transformatoru var, işığı oradan verir. Bu yaxınlarda iki gün işıq olmadı, qalmışdıq soyuqda... Evdə kurtka ilə gəzirdik. Əslində, MTK özü də bilirdi ki, bura qaz verilməyəcək. Çünki belə bina, belə tikili olmur. Camaatı aldadıb ev satmaqla deyil ki. Gərək adam pulu elə qazansın ki, sonra onu yeyə bilsin.
Bina sakini ilə birlikdə zibil qutularına doğru addımlayıram ki, zibil əlində gözləməsin. Burada yeni binalar da tikilir... Oralara da gələcəm.
Bəhruz bəy deyir ki, bina tam hazır olmamış MTK-lar onu satmağa başlayırlar. Bina işıqla təmin olunur və sayğacları çəkib deyirlər, qaz da yaxın zamanda veriləcək. İnsanlar düşünür ki, işıq çəkilib, demək, qaz da bu yaxınlarda veriləcək. Bir növ simulyasiya edirlər.
Məsələ ilə bağlı binanı tikən “Masazır Residence”-ə sorğu ünvanladıq. MTK-dan Lent.az-ın sorğusuna cavab olaraq bildirib ki, hazırda qaz çəkilir:
“Birincisi, biz qaz idarəsi deyilik. İkincisi isə, hazırda qaz çəkilir”.
"Azəriqaz" İB-nin İctimaiyyətlə əlaqələr və korporativ kommunikasiya şöbəsinin əməkdaşı Novruz Məmmədzadə Lent.az-ın sorğusuna cavab olaraq bildirib ki, Siyavuş Aslanov küçəsi 1 ünvanında yerləşən MTK-nın qazlaşdırılması məqsədilə əvvəlcə ilkin texniki şərt alınmalıdır:
“Texniki şərt əsasında müvafiq lisenziyaya malik podratçı təşkilatla müqavilə bağlanır və layihə smeta sənədləri podratçı tərəfindən hazırlanır. Qaz xətlərinin və qaz sayğaclarının quraşdırılması işləri başa çatdıqdan sonra layihə müvafiq qurumlarla razılaşdırılır. Prosesin yekun mərhələsində qazın verilişi üçün Azəriqaz İstehsalat Birliyinin Sumqayıt regional qaz istismarı idarəsinə müraciət edilməsi tələb olunur”. Bu deyilənlərin Azərbaycan dilində anlamı odur ki, ortada müqavilə yoxdursa, nə qaz? Bəs MTK deyirdi çəkilir? Deyəsən bizi də bina sakinləri ilə səhv salıblar.
...Bir xeyli gedəndən sonra zibil qutusuna çatırıq. Bəhruz bəy zibili qutuya atıb çirkli olduğu üçün əli ilə deyil, biləyi ilə qarşıdan gələn qonşusuna salam verib mənimlə tanış edir:
- Jurnalistdir. Gəlib bizim problemlərdən yazmağa. Bayaqdan danışırıq.
- Allah köməyi olsun. Adım Yusifdi. Danışdın da MTK başımıza necə oyun açır? Neçə adam var ki, satıb bu binalardan çıxmaq istəyir. Amma "kupça" yoxdur deyə, 5-10 min aşağı qiymət təklif edirlər, ya da heç sata bilmir. MTK deyir, gəl, evi sataq, amma filan qədər məbləğ bizə çatacaq. Bir növ "maklerlik" edirlər, satdıqları evdən ikinci dəfə pul qazanırlar.
- Niyə buradan ev aldız?
- Biz hardan bilək başımıza belə oyun gətirəcəklər? - Yusif bəy bir siqaret yandırıb davam edir - İllərdir kirayədə idim, istədim evim-eşiyim olsun. Mərkəz tərəflərdə evlər bahadı. Şirnikləndirdilər ki, burada ucuzdur, yaxşı evlər var, gəlib aldım. Hardan biləydim belə edəcəklər? Elə yolpulu bir dünya pul tutur. Özüm "28 May" metrosu tərəfdə işləyirəm. 6-da işdən çıxıram, saat 8-9-a ancaq gəlib çatıram. Səhər də işə getmək üçün 2 saat tez çıxıram...
- Qubaya daha tez çatmaq olur... - heyrət içində reaksiya verirəm.
Hazırda yeni tikintinin getdiyi əraziyə gəlirəm. Demək olar ki, burada da binalar eyni sıxlıqda tikilir. Və görünən odur ki, eyni problemlər təkrarlanmağa məhkumdur.
İnsanlar kirayədən canını qurtarmaq, özlərinin evlərinin olmasını istəyirlər. Minlərlə insan bu səbəbdən burada məskunlaşır, ev alır. Nəticədə, Masazır yüklənir, infrastruktur sistemi çökür, problemlərin ardı-arası kəsilmir. Nəticə isə peşmanlıq və məyusluqdur. MTK-lar isə bunu qazanc yerinə çevirirlər...
