“İdarənin vəziyyəti hər gün pisləşir, bu da işçilərin psixologiyasına mənfi təsir göstərir”

“Siyəzənneft” Neft-Qaz Çıxarma İdarəsinin işçisi Əliyev Zamiq Qüdrət oğlu tərəfindən “Hürriyyət”in redaksiyasına şikayət məktubu daxil olub. Saytımız vasitəsilə Prezident İlham Əliyevə müraciət edən şikayətçinin məktubunu olduğu kimi dərc edirik:

“Cənab Prezident!

“Siyəzənneft” NQÇİ-nin rəisi Rauf Alməmmədov idarəyə təyin olunandan bizim işlədiyimiz Ataçay sahəsinin bağlanılması üçün tədbirlər görür.

R.Alməmmədov idarəyə təyin olunandan bəri sahələrin inkişafı, perspektivin artması, işçilərə yüksək motivasiya verilməsi, stressin azaldılması və s. ilə əlaqədar heç bir müsbət addım atılmayıb. Məqsəd sadəcə işin gedişatına əngəl olmaq, işçilərin motivasiyasını aşağı salmaq, işçi ilə rəhbər arasında gərginliyi artırmaq olmuşdur.

Xatırladım ki, bizim sahə sutkalıq neft tələbatını lazımi qaydada ödəmək qabiliyyətindədir. Üstəlik, sahənin “Siyəzənneft”ə hansısa ziyanı yoxdur. Lakin, əfsusalar olsun ki, hər dəfə rəhbər şəxs bizim sahənin bağlanmasını gündəmə gətirməklə, dövlətə böyük xeyir verəcəyini düşünür. Bu minvalla idarənin başqa sahələrini də bağlamaq, ləğv etmək üçün özündə bir cəsarət eldə etmiş olur.

Hörmətli Prezident!

Rauf Alməmmədov Bu cür gediş etməklə rəhbər şəxslərdən “bərəkallah” eşidəcəyini, mükafat əldə edəcəyini düşünür və bu da ona stimul verir. Halbuki, o, idarəyə ilk təyin olunanda mənə yazmışdı ki, "Mən işçilərin rifahının yüksəldilməsi üçün çalışıram". Halbuki, bu cür mənfi siyasət və qara düşüncə ilə işçinin rifahının yüksəldilməsi münkün deyil. Çünkü bu davranış birbaşa ümumilikdə idarənin məhv edilməsinə, işçilərin sayının azaldılmasına, maddi-sosial vəziyyətin daha da pisləşməsinə gətirib çıxarır. Bu da kütləvi narazılığa, dövlətin siyasətinin kölgə altına salınmasına və dövlətə qarşı təxribata səbəb olur.

Cənab Prezident!

Sizdən xahiş edirəm ki, bu məsələ ilə bağlı müvafiq qurumlara tapşırıq verin. Bu sahənin bağlanılması üçün Rauf Alməmmədov əlindən gələni edir. Rəhbər şəxs idarənin irəli getməsi, işçilərin inkişaf etdirilməsi, hasilatın artırılması, özünün dediyi kimi, işçinin rifahının yüksəldilməsi üçün cəhd etməlidir. Lakin bu adam tam əksini nümayiş etdirir.

Onu da deyim ki, idarənin vəziyyəti hər gün pisləşir, bu da işçilərin psixologiyasına mənfi təsir göstərir. İşçilərdə psixoemosianal gərginlik yaradılır. Bunun səbəbi də yarıtmaz idarəetmə və səriştəsiz kadırlardır.

Hörmətli Prezident!

Sizdən xahiş edirəm ki, “Siyəzənneft"in xeyri üçün qərarlar verilməsi, bizim hazırda işlədiyimiz Ataçay sahəsinin qorunub saxlanılması üçün idarə rəisi Rauf Alməmmədova göstəriş verəsiniz. Bizim istədiyimiz odur ki, R.Alməmmədov dövlətə qarşı təxribata son qoysun”.