Bakının Suraxanı rayonu, Yeni Günəşli qəsəbəsi, A-B massivində yerləşən “Sahil-S İnşaat” MTK-nın sakinləri tərəfindən Parlamentin İnsan Hüquqları Komitəsinin sədri, Sosial Tədqiqatlar Mərkəzinin rəhbəri Zahid Oruca müraciət ünvanlayıb. "DİA-AZ" siyaset.info-ya istinadla həmin müraciəti təqdim edir:
"Hörmətli millət vəkili Zahid Oruc, ilk növbədə qeyd etməliyik ki, “Sahil- S İnşaat” MTK-dan mənzil alan 165 ailə illərdir üzləşdiyi problemlərin həlli və hüquqlarının bərpası uğrunda hüquqi mübarizə aparır. Məsələ ilə yaxından tanış olan bir millət vəkili kimi bilirsiniz ki, şirkət rəhbərliyinin qanunsuz və dələduz hərəkətləri ucbatından indiyə qədər 165 ailənin mülkiyyət hüquqları pozulub. Belə ki, MTK rəhbəri Taley Alaverdiyev və şəriki Pənah Kərimovun bir mənzili bir neçə vətəndaşa satmasının ifşa olunması, onların istintaqa cəlb edilməsi həm də binada xeyli problemlərin yarımçıq qalmasına səbəb olub.
MTK rəhbərliyində olan şəxslərin həbsindən sonra biz sakinlər banklardan kredit və borc götürərək bu binanın yarımçıq qalan işlərinin başa çatdırılması istiqamətində işlər görmüşük. Yəni tikintinin tamamlanması, liftlərin quraşdırılması və digər infrastrukturun reallaşdırılması kredit götürdüyümüz vəsaitlər hesabına mümkün olub. Lakin binada tikintinin yekunlaşdırılması ilə sakinlərin problemləri tam həllini tapmayıb. Təbii ki, mənzillərin su, işıq və qazla təmin olunması ən vacib həllini gözləyən məsələlərdən olub. Ona görə də kommunal infrastrukturun bu gün fasiləsiz təmin olunmasında köməklik göstərilməsi üçün Sizə müraciət ünvanlamışdıq.
Hörmətli millət vəkili Zahid müəllim, biz binamızın qaz, su və işıq kimi həyati əhəmiyyətli, gerçəkləşməsi müşkül görünən problemlərinin həllində verdiyiniz dəstəyə görə bir daha Sizə minnətdarıq. Bu yaxşılığınız heç zaman danıla və unudula bilməz. Çünki məhz parlamentin ən fəal, fədakar üzvlərindən və komitə sədrlərindən biri kimi bizim bu həyati problemlərimizin həlli üçün böyük əmək sərf etmisiniz. Biz onu da bilirik ki, siz millət vəkili olaraq Suraxanı rayonunu təmsil etmirsiniz. Bununla belə, paytaxtın Xətai rayonundan deputat olsanız da, seçiciləriniz olmasaq da (bunu çox arzulayardıq), problemlərimizin həllinə sidq-ürəklə yanaşmısınız, öz şəxsi çətinliyiniz kimi baxmısınız və fərq qoymadan sadəcə, Azərbaycan vətəndaşlarının məsələsi kimi mövqe sərgiləmisiniz.
Bu səbəbdən də biz əvvəllər həm publik olaraq, həm Sizə göndərdiyimiz məktublarda təşəkkürümüzü bildirmişik, bu gün də mənzillərimizdə yanan işıq, qaz, gələn suyun təminatında verdiyiniz əməyə görə minnətdarıq. Eyni zamanda, onu da çox yaxşı bilirik ki, təkcə millət vəkili olaraq deyil, həm də Prezident tərəfindən göstərilən etimadı – böyük bir missiyanın icrasını doğultmaqdasınız. Söhbət Sosial Tədqiqatlar Mərkəzində İdarə Heyətinin sədri olaraq bu illər ərzində göstərdiyiniz yüksək səviyyəli fəaliyyətdən gedir.
Siz və komandanız olduqca böyük bir iş görür, ictimai rəyin öyrənilməsi, əhalinin sosial qayğılarının və çağırışlarının qiymətləndirilməsi istiqamətində önəmli araşdırmalar, tədqiqatlar aparır, sorğular keçirir və nəticələri obyektiv şəkildə möhtərəm Prezidentimizə təqdim edirsiniz. O baxımdan, əhalinin sosial problemlərinin həlli ilə bağlı sizin Mərkəzin verdiyi sorğunun nəticələri mühüm rol oynamaqdadır. Bu problemlər sırasında tikinti sektorunda baş verənlərin də diqqətdə saxlanılması sizin və komandanızın əsas tədqiqat istiqamətlərindən biri olub.
Hörmətli millət vəkilimiz, biz sakinlərin Sizə bu müraciətimizin səbəbi indiyə qədər verdiyiniz xüsusi dəstəyi vurğulamaqla yanaşı, son problemin - hüquqi məsələmizin də həllində köməklik göstərməyinizi xahiş etməkdir. Bizim İnsan Hüquqları Komitəsinin sədri və STM rəhbəri olaraq, məhz Sizin bu problemin də həllində mühüm köməyinizin olacağına inamımız var.
Belə ki, bütün bu hadisələrdən sonra binanın mənzillərinə Çıxarış (kupça) ala bilmirik. Hazırda ən böyük problemimiz də məhz mənzillərin Çıxarışının olmamasıdır. Bu səbəbdən ciddi hüquqi əngəllərlə üzləşmişik. Çünki götürdüyümüz kreditləri qaytarmaq üçün mənzilləri satmaq istəyirik. Ancaq mənzillərin Çıxarışı olmadığına görə notariuslar alqı-satqını həyata keçirmirlər. Bu da borclarımızı qaytarmaq üçün mənzillərimizi satmaqda ciddi hüquqi maneə yaradıb.
Ümumiyyətlə isə təkcə mənzillərin satışı deyil, hər bir sakin mülkünün Çıxarışlı olmasını arzulayır. Bu həm də müxtəlif idarələrdə zəruri sənədləşmə, mənzillərin qeydiyyatına düşmək, övladlarımızın yaxınlıqdakı təhsil ocaqlarına yazdırılması və digər çətinliklərin aşırılmasında mühüm məsələdir.
Hörmətli Zahid müəllim, bu səbəbdən bizə Çıxarışların verilməsi üçün bir millət vəkili olaraq məsələni müvafiq qurumlara çatdırmağınızı, həllində köməklik göstərməyinizi, Milli Məclis tribunasında problemi qaldırmağınızı xahiş edirik.
Biz inanırıq ki, binamızın qaz, su və işıq problemlərinin həllində göstərdiyiniz dəstəyi eynilə Çıxarış alınmasında da əsirgəməyəcəksiniz. Bu da 165 ailənin sevincinə, Yeni il ərəfəsində bayram hədiyyəsinə çevrilə bilər. O səbəbdən, hörmətli deputatımızın binamızın sonuncu probleminin həllində də yardım əlini uzadacağına böyük ümid bəsləyirik. Göydə Allah, yerdə dövlətimizin, onun rəhbərliyinin və sizin əməyinizin sayəsində bu problemin də həllini tapacağına inanırıq!"
