Ağdam rayon sakini, hazırda Xəzər rayonu, Şüvəlan qəsəbəsində yerləşən Maşınqayırma pansionatında müvəqqəti məskunlaşan Məmmədov Mikayıl Mehdi oğlu tərəfindən Hurriyyet.az saytının redaksiyasına məktub daxil olub. Şikayətçi saytımız vasitəsilə Qaçqınların və Məcburi Köçkünlərin İşləri üzrə Dövlət Komitəsinin sədri Rövşən Rzayevə müraciət edir:
“Hörmətli Rövşən Razayev!
Mən, Məmmədov Mikayıl Mehdi oğlu, bir neçə dəfə rəhbərlik etdiyiniz quruma müraciət etmişəm. Təəssüf ki, müraciətlərim cavabsız qalıb.
Bilirsiniz ki, cənab Prezidentin tapşırığına əsasən, işğaldan azad olunmuş ərazilərə könüllü köçmək istəyən keçmiş məcburi köçkünlərə imkan yaradılmalıdır. Amma artıq dəfələrlə köç karvanı yola salınsa da, bizim ərizələrə baxılmır.
Ağır vəziyyətdə yaşayırıq. İllərdir Maşınqayırma pansionatında məşkunlaşmışıq. Oğlumun, qızımın və öz ailəm burada acınacaqlı şəkildə yaşayırıq.
Ağdərə rayonunun Vəngi kəndinə köçmək üçün dəfələrlə müraciət etmişik. Komitədə olan zaman bizi Sizin qəbulunuza yazmırlar. Müavininiz Eldar Zeynalov da xahişimizi icra etmir.
Sizdən xahiş edirəm, müraciətimizi cavabsız qoymayın”.
