Bakı şəhəri, Xətai rayonu, Rəfiq Məmmədov küçəsi, 3A sakini Quliyev Elman Əmralı oğlu tərəfindən “Hürriyyət”in redaksiyasına şikayət məktubu daxil olub. Şikayətçi bildirir ki, Əmək və Əhalinin Sosial Müdafiəsi Nazirliyinin tabeliyində olan Dövlət Sosial Müdafiə Fondu pensiyaçılara qarşı haqsızlıq edir:

“Mən, Quliyev Elman Əmralıoğlu, yazaraq şikayətimin işıqlandırılması üçün sizdən kömək istəyirəm.

Qeyd edim ki, 2014-cü ildən güzəştli şərtlərlə təqaüdə çıxmışam. 2020-ci ildə 6 ilim tamam olduğuna görə pensiyam yenidən hesablanıb. Həmin vaxtı nazirliklə heç bir problemim olmayıb.

2025-ci ildə 70 yaşım tamam olduğu üçün iş yerindən – Bakı şəhəri 6 saylı ASAN Xidmət Mərkəzindən, avadanlıq üzrə baş mütəxəssis vəzifəsindən azad olundum. Səbəb kimi isə, yaş həddinin olduğunu bildirdilər.

Sənədlərimi DOST Mərkəzinə təqdim etdim. Məqsədim fondda yığılmış məbləğin pensiyamın üzərinə əlavə olunması idi.

Bu proses bir qədər çəkdi, amma iyul ayında tamamlandı. 03.07.2025-ci ildə məktub gəldi ki, sizin fonda 873 manat borcunuz var. Bildirdilər ki, 2018-ci ildə nazirlikdə düzgün hesabat getməyib.

DSMF-də savadsız bir adamı niyə işə götürüblər ki, bu gün mənim kimi onlarla insanın pensiyasından kəsilir?! Bunu biz hesablamırıq ki, öz işçiləri hesablayıb. Belə bir ciddi səhvə görə, nə üçün biz əziyyət çəkməliyik?! Nə qədər insanı bu yolla dövlətdən narazı salırlar. Bu pensiya elə bir məbləğdir ki, sadəcə, iynə-dərmanı görür. Bir də belə saxtakarlıqla kəsiləndə özümüzə heç nə qalmır.

Mənim razılığım olmadan, 820 manat artıq tutulub. Qalan 52 manat 73 qəpik üçün məndən razılıq ərizəsi tələb olundu. Dedilər ki, yazsan da tutulacaq, yazmasan da.

Birdən-birə 820 manat vəsaitin pensiyadan tutulması düzgün addım deyil. Misqalnan verdikləri pensiyaya da bəziləri göz tikir. İnsanların pensiyalarından kütləvi şəkildə tutulmalar baş verir, elə bil səlib yürüşüdür. Bu pullar hardasa fırlanır, kimlərəsə xidmət edir. 8% indeksasiya da, artım da gözə görünmür. Məncə, bu sistem araşdırılmalı, şəffaflıq təmin olunmalıdır. Bu qədər adamın narazılığı var, amma nəticə yoxdur.

Mənim fikrimcə, bu qurumda nəsə oyun gedir. Bu pensiyanı 1 nəfər hesablamır ki, deyək, onun səhvi olub. Eni-uzunu omayan bir qurum necə belə bir səhv edə bilər?! Deməli, bu, biz vətəndaşları təngə gətirmək üçün bir oyundur”.