"Bank of Baku-nun reklamlarında vəd etdiyi şərtlər reallıqla üst-üstə düşmür və bu, istehlakçıların aldadılması deməkdir. Rəsmi olaraq 2050 AZN əmək haqqı alan şəxs olaraq, 30.000 AZN məbləğində krediti 59 ay müddətinə və 16.5% illik faizlə götürmək istədim. Bu, ayda təxminən 745 AZN ödəniş deməkdir və bu da ümumi gəlirin cəmi 36.34%-ni təşkil edir. Nə kredit tarixçəmdə gecikmə var, nə də əvvəlki öhdəliklərim qalır. Buna baxmayaraq, mənə zamin tələbi qoyuldu və hər dəfə fərqli, əsassız səbəblərlə imtina cavabı verildi”.
Hurriyyet.az xəbər verir ki, sözügedən şikayət “Facebook” sosial şəbəkəsinin Azərbaycan seqmentində məşhur olan “AzBank klubu” qrupunda dərc olunub.
Nicat Rüstəmli adlı istifadəçi qeyd edib ki, “Bank of Baku”nun reklamlarındakı “5%-dək endirim” təklifinə realda əməl olunmur:
“Bankın reklamlarında "5%-dək endirim", "bizdən sərfəli kredit" kimi cəlbedici ifadələr səsləndirilir, amma realda bu şərtlər tətbiq olunmur. Tanış çevrəmdə də bir çox insan eyni problemlə qarşılaşıb – normal gəliri olan şəxslərə də qeyri-müəyyən cavablar verilir və sonda sadəcə vaxt itkisilə nəticələnir”.
