Qanunsuz tikintilərlə ad çıxarmış Xəzər rayonunun "qətiyyətli" rəhbəri Elşən Salahov, görünür ki, yazılan yüzlərlə tənqidi məqaləni, çəkilən video-reportajları, sakinlərin şikayətlərini ya görmür, ya eşitmir, ya da sadəcə çox “arxayındır”. Arxayınlıq isə yəqin özünün deyil, sistemin ona verdiyi “toxunulmazlıq hissindən” qaynaqlanır.

Bəli, Salahov bu qədər səs-küyə, sosial mediada dolaşan minlərlə narazılığa, media orqanlarının üst-üstə yazdığı faktlara rəğmən heç nə olmamış kimi kreslosunda əyləşib, "tikinti" işlərini "kənd təsərrüfatı inkişaf planı" adıyla davam etdirir. Onun üçün nə şikayət önəmlidir, nə də palçıqlı yollar, nə Binənin çökən infrastrukturu, nə də qazsız, işıqsız, suyu olmayan tikili sahələri. Çünki burada əsas məsələ... daşın haradan daşındığı deyil, daşın altından nə qədər “şirinlik” çıxdığıdır.

Əslində, bu bir növ siyasi möcüzədir: neçə illərdir eyni rayon, eyni problem, eyni adlar, eyni qanunsuzluqlar — amma heç bir hüquqi nəticə yoxdur. Xəzər rayonu artıq tikinti ilə yox, “toxunulmazlıqla” böyüyür. Elə bil ki, bu ərazi Azərbaycan Respublikasının xəritəsindəki "idarəetmədən kənar zona" elan olunub.

Şəffaflıq? Yoxdur.
Cavabdehlik? Heç o da yoxdur.
Əvəzində isə villalar var, obyektlər var, “torpağın bəxti açılıb” deyə, 5-10 günə təyinatı dəyişən hektar-hektar ərazilər var.

Ən maraqlısı isə odur ki, artıq bu qanunsuzluqlar o qədər sistematik xarakter alıb ki, hətta yerli sakinlər belə “bura Xəzərdir, burda belə şeylər adidir” deyib, vəziyyətlə barışırlar. Sanki qanunsuzluq qanuni, cavabsızlıq isə cavabdır.

Bu arada, media yazır, sakin danışır, sosial şəbəkələr guruldadır — amma Elşən Salahovun kabinetində səssizlik hökm sürür. Elə bil səsi udan xüsusi akustik sistem quraşdırılıb. Əsl "səmərəli idarəçilik" modelidir: xalq danışır, o isə “dinləməzlik bacarığını” inkişaf etdirir.

Və burada diqqət mərkəzinə daha bir ad gəlir: Şəhərsalma və Arxitektura Komitəsinin (ARXKOM) rəhbəri Anar Quliyev. Görəsən, Xəzər rayonundakı hektar-hektar təyinat dəyişikliyi, kənd təsərrüfatı torpaqlarında villa və obyektlərin baş alıb getməsi ARXKOM-un planlaşdırmasından kənar baş verir? Yoxsa bu “strategiya” komitənin razılığı və ya səssiz razılığı ilə həyata keçirilir? Əgər belə deyilsə, bəs komitə niyə bu qədər genişmiqyaslı özbaşınalığa göz yumur? Axı bu qədər baş verənlər fonunda, Anar Quliyevin sükutu da Salahovun “təhlükəsizliyinə” xidmət edir.

İndi isə sual budur: bütün bu tənqidlərə, faktlara, video sübutlara baxmayaraq, hansısa hüquqi reaksiya veriləcəkmi? Yoxsa, Xəzər rayonu öz “torpaq böyükləri”, “qohum tikinti briqadaları” və “görünməz idarəçiləri” ilə təkamül yolunu davam etdirəcək?

Görünən odur ki, Salahovun tikinti siyasətində dəyişən tək şey torpağın təyinatıdır. Qalan hər şey olduğu kimi... hətta lap olduğu kimidir!

DogruXeber.az