Son günlər yerli mediada Əmək və Əhalinin Sosial Müdafiəsi Naziri Sahil Babayevin yaxın günlərdə Maliyyə naziri vəzifəsinə təyin olunacağı barəsində şayiələr gəzirdi ki, artıq bu söhbətlərə də dünən təsdiqini tapmaqla son qoyuldu.
Sahil Babayev Maliyyə naziri təyin olundu.
Bu barədə Prezident İlham Əliyev 06.02.2025-ci il tarixində sərəncam imzalayıb.
Belə yerdə deyiblər, "buraları bay elədi, qaldı Maliyyə Nazirliyi"...
"DogruXeber.az" bildirir ki, demək olar ki, ƏƏSMN-ə tabe bütün idarələr əvvəllər də "rüşvətxor" fəaliyyətləri ilə vətəndaşlar arasında davamlı narazılıqlar yaradırdılar. Lakin, 2020-ci ildə baş verən ikinci vətən müharibəsindən sonra sanki bu idarələrdə rəhbər vəzifələrdə çalışanlarda insanlara - xüsusilə də müharibə veteranları və qazilərə qarşı bir kin, aqressiya yarandı.
2021-ci ilin əvvəlində güya saxtakarlığın qarşısının alınması məqsədilə çoxsaylı insanlara pensiya və ünvanlı sosial yardımların verilməsi dayandırıldı. Onlara yenidən müraciət etmələri və təkrar komissiyadan keçmələri tövsiyyə edildi. Kimlərin ki, yaxınları, qohumları Dövlət Sosial Müdafiə fondları, məşğulluq və ƏƏSMN-nin digər idarələrində çalışırdısa, onlar bu yaxınlığın bəhrəsi olaraq, yenə də əvvəlki qayda ilə dövlətin büdcəsindən yararlanmaqda davam etdilər, bir çox həqiqi ehtiyaclı insanlar isə DSMF, məhkəmə qapılarında qalmaqdan yorulub, susdular.
Yeri gəlmişkən, yuxarıdakı "qohumluq, yaxınlıq" ifadəsini təsadüfi işlətmədik. Dövlət Sosial Müdafiə Fondunun İdarə heyətinin sədri Himalay Məmişovun keçmiş iş yoldaşlarının, dostlarının və onlara yaxın olan bir neçə şəxslərin Mil-muğan Regional DSMF-da nə cəlala sahib olduqlarından əvvəllər də bəhs etmişdik. Həmçinin, barəsində narazılıqlar daha da artdıqdan, idarənin içərisindən əldə etdiyimiz məlumata görə daxili nəzarət fəaliyyətində nöqsanlar aşkar etdikdən sonra Rafael Məmmədovun işindən azad edilərək, Gəncə-Daşkəsən Regional DSMF-na rəhbər təyin olunduğu barəsində məlumat vermişdik. Amma, Gəncəyə çatar-çatmaz orada da bir neçə işçiləri səbəbsiz işindən azad edib, yanına öz "komandası"nı yerləşdirib, daha bir" meydangir"lik nümayiş etdirdi.
Belə çıxır ki, kimin Himalay Məmişov kimi yaxını olsa, olduğu hər yerdə, "Burda mənəm, Bağdadda kor xəlifə" deməkdə sərbəstdir.
Rafael Məmmədov Himalay Məmişova, Himalay Sahil Babayevə güvənərək, siravi vətəndaşların haqq və hüquqlarını heçə saymaqda davam edirlər.
Lap, nağıl qəhrəmanlarında olduğu kimi - "nəvə nənədən, nənə babadan"...
Əlqərəz...
Sahil Babayevin rəhbərliyi altında fəaliyyət göstərən bir çox idarə və müəssisələrin qanqaraldıcı fəaliyyətlərini saymaqla bitməz, amma bizi bu mövzuya təkrar qayıtmağa vadar edən ciddi səbəblərimiz var.
Təsəvvür edin ki, illər ərzində hər cür saxtakarlığı sınaqdan keçirən. Dövlət Tibbi ekspertiza və Reabilitasiya Agentliyinin hərbi komissiyası illərdir özünün hərbiyə yararsız olduğunu dediyi gənci, 25 yaşında özü özünə zidd olaraq sağlam çıxarıb, indi hərbiyə yararlıdır deyir.
"DogruXeber.az" xəbər verir ki, redaksiyamıza Cəbrayıl rayonunun Horovlu kənd sakini - eyni zamanda birinci vətən müharibəsində 5 ilə yaxın ön cəbhədə xidmət edən - müharibə bitdikdən sonra ailəsinin təkidinə rəğmən "mən vəsiqə üçün, müavinət üçün döyüşməmişəm ki, vətənimi qorumuşam" deyə, dövlət tərəfindən verilən kiçicik müavinətdən də yaralanmağı özünə çox görən Əsgərov Hikmət Talıb oğlu tərəfindən müraciət daxil olmuşdur.
O, müraciətində bildirir ki, "2000-ci il təvəllüdlü oğlum Əsgərov Nihat Hikmət oğlu uşaq yaşlarında ağır xəstəliklər keçirdiyi üçün çənə dişləri tamamilə yararsız haldadır. Bu səbəbdən də bütün dişləri protezlə əvəz olunmuşdur və eyni zamanda travmatologiya institutunun rəyinə əsasən verilən sənədlərdə bel onurğa sütununda 17 dərəcə deformasiya və əyrilik, həmçinin döş-qəfəs şişkinliyi, üçüncü dərəcəli kifozun olduğu qeyd edilmişdir. Məhz bu səbəblə də oğlum Nihat Əsgərov rəsmən hərbi xidmətə yararsız hesab olunmuş və aparılmamışdır.
Ötən il hərbi xidmətlə bağlı bir sıra qanunlara edilən dəyişikliklərdən sonra xidmətə aparılmayan şəxslərin yenidən hərbi komissiyadan keçmələri tələb edilmişdir. Belə olan halda, oğlum Nihat Əsgərov da prosedurlara uyğun olaraq, Respublika Klinik Xəstəxanasında, Travmatologiya institutunda lazımi müayinələrdən keçmiş, əvvəlki verilən diaqnozlar, hətta mövcud xəstəlikləri daha da ağırlaşmış həddə öz təsdiqini tapmışdır."
Valideyin Hikmət Əsgərov daha sonra qeyd edir ki," Bu mərhələlərdən sonra, yekun olaraq Dövlət Tibbi-Sosial Ekspertiza və Reabilitasiya mərkəzində keçirilən qeyri-obyektiv müayinə nəticəsində ədalətsiz qərar verərək, oğlumun hərbiyə yararlı olduğu qeyd edilmişdir.
Bu ədalətsiz qərara etiraz olaraq, rəsmi ərizəmlə mərkəzə müraciət edib, komissiyanın yenidən və mənim iştirakımla keçirilməsini tələb etdim. Lakin, təəssüflər olsun ki, bizə heç bir xəbərdarlıq edilmədən müraciətimizin nəzərə alınmaması və verilən ədalətsiz qərarın qüvvədə saxlanılmasına dair Cəbrayıl rayon Hərbi Komissarlığına məlumat verilmişdir".
Onu da əlavə edək ki, valideyn Hikmət Əsgərov mövcud xəstəlikdən əziyyət çəkən - piyada uzun yol yeriməkdə, ayaq üstə bir neçə dəqiqədən artıq dayanmaqda çətinlik yaşayan, döş qəfəsinin sıxılıraq, nəfəsinin darlanması, bel nahiyəsininin şiddətli ağrıması səbəbilə oturmağa, yaxud uzanmağa məcbur olan övladını özəl Yasamal Hospitalında müayinə etdirmişdir.
Hospitalın həkimi radioloq Qeyrət Nəsirovun etdiyi müayinə nəticəsində məlum olmuşdur ki, döş kifozu əhəmiyyətli dərəcədə atıb (56 dərəcə ölçülür).
Belin fizioloji lordozu dərinləşib.
Nəticə: Hiperkifoz (Scheuermann xəstəliyi yönündə araşdırılması tövsiyyə edilir).
Hiperlordoz (postural olması inkar edilmir).
Gördüyünüz kimi, həm dövlət, həm özəl xəstəxanaların etdiyi müayinələrin nəticələri üst-üstə düşdüyü halda, Tibbi Sosial - Ekspertiza və Reabilitasiya Agentliyinin hərbi komissiyası ya işinə məsuliyyətsiz yanaşaraq, sözün əsl mənasında başdansovdu müayinə aparıb, ya da məqsədli şəkildə çağırışçı sayını bu cür təmin etməyə çalışır.
Maraqlıdır, Nihat Əsgərov səhhətindəki bu qədər ciddi problemlərlə hərbiyə gedərsə və xidmət zamanı xəstəliyi səbəbilə Allah qorusun, hər hansı bir bədbəxt hadisə baş verərsə bu agentlik və eləcə də agentliyin tabe olduğu qurumun (ƏƏSMN) rəhbəri Sahil Babayev bu məsuliyyətdən hansı formada yayınmağı planlaşdırıblar ?
P.S: Qeyd edək ki, vətəndaş Hikmət Əsgərovun müraciətilə bağlı artıq ölkə başçısı İlham Əliyevə tərəfimizdən rəsmi müraciət göndərilib.
Ümidvarıq ki, ən qısa zamanda məsələ kökündən həll olunacaq və saxta əməllər törətməyə meyilli şəxslər qanunla müəyyən edilmiş qaydada cəzalandırılacaq.
Mövzunu davam etdirəcəyik.
