Ermənistanın Baş naziri Nikol Paşinyan Azərbaycana paralel şəkildə Qarabağ ermənilərinin qayıdışı və azərbaycanlıların Qərbi Azərbaycana qayıdışı məsələlərini bağlamağı təklif edib. O, bu iki mövzunu paralel bağlamaq üçün birgə yol xəritəsi qəbul etməyə çağırıb.
Mövzu ilə bağlı Redaktor.az-a açıqlama verən politoloq Yusif Bağırzadə bildirdi ki, Paşinyanın bu təklifi növbəti manipulyasiya cəhdidir və tarixi faktları inkar etmək üzərində qurulub:
"Azərbaycanlıların Qərbi Azərbaycana qayıdışını, Qarabağ ermənilərinin qayıdışı ilə paralel şəkildə təqdim etmək çox təhrikedici və anlaşılmazdır. Azərbaycanlıların Qərbi Azərbaycana qayıtması, əslində, bir xalqın doğma yurduna geri dönməsi haqqıdır. O torpaqlara ki, həmin torpaqlar sovetlər dövründə Azərbaycandan qoparılaraq Ermənistan birləşdirilib. 1980-ci illərin sonunda və 1990-cı illərin əvvəlində Ermənistandan zorla qovulmuş azərbaycanlılar, beynəlxalq hüquq baxımından öz yurdlarına geri dönmə haqqına malikdirlər. Lakin Paşinyan, bu tarixi haqqı qəsdən inkar edir və onu Qarabağ ermənilərinin mövcud vəziyyəti ilə eyniləşdirir. Halbuki Qərbi Azərbaycandan zorla qovulmuş yüz minlərlə soyadışımızla, Qarabağa sonradan köçürülmüş və işğal dövründə də Suriya və Livandan gətirilərək həmin ərazilərə yerləşdirilmiş və 2023-cü ildə Qarabağı könüllü tərk etmiş 15-20 min erməninin vəziyyətini eyniləşdirmək qətiyyən mümkün deyil. Odur ki, Paşinyanın Qarabağ ermənilərinin qayıdışı ilə azərbaycanlıların Qərbi Azərbaycana qayıdışını bir tutması, ikili bir yanaşmadır və bu, tarixi faktlara, beynəlxalq hüquqa və gerçəkliyin təhlilinə ziddir".
Müsahibimizin sözlərinə görə, azərbaycanlıların Qərbi Azərbaycana qayıtması, onların öz doğma yurdlarına dönməsi hüququdur, həm də bu hadisə bir çox beynəlxalq təşkilat və dövlətlər tərəfindən dəstəklənir:
"Paşinyanın hər iki "qayıdış" məsələsini bərabərləşdirməsi, regionda dayanıqlı sülh və etimad qurulmasına da əngəl yaradır. Digər bir tərəfdən ortaya bir sual da çıxır. Qarabağ ermənilərinin qayıdışının real olmadığını bildirən Paşinyan niyə bu mövqeni dekabrın 2-də Avropa İttifaqı ilə Ermənistan arasında “Strateji Gündəlik” adlı sənədin imzalanması zamanı ortaya qoymadı. Axı həmin sənəddə Qarabağ erməniləri “qaçqın və didərgin düşmüş” şəxslər olaraq göstərilir və onların qayıdışının vacibliyi qeyd olunur. Bu fakt özü də sübüt edir ki, Paşinyan Qarabağ ermənilərinin qayıdış məsələsinin bağlanmalı mövzu olması ilə bağlı dediklərində səmimi deyil. Odur ki, Paşinyanın bu məsələ ilə bağlı təkliflərinə ciddi yanaşmağa da ehtiyac yoxdur".
