Hazırda Ermənistan cəmiyyətində və siyasi sistemində baş verən proseslər ölkənin gələcək kursunu müəyyən edəcək həlledici mərhələyə daxil olduğunu göstərir. Siyasi qarşıdurmaların kəskinləşməsi, daxili parçalanma və xarici təsirlərin artması fonunda 2026-cı il parlament seçkiləri təkcə hakimiyyətin dəyişməsi deyil, həm də Ermənistanın geosiyasi yönünün seçilməsi baxımından mühüm əhəmiyyət daşıyır. Bu günlərdə isə ölkə daxilində gərginliyi daha da artıran yeni bir təşəbbüs gündəmə gəlib: Ermənistan parlamentində müxalifət baş nazir Nikol Paşinyanın impiçmenti üçün tələb olunan səslərin demək olar ki, hamısını toplayıb. “Şərəfim var” partiyasının lideri Hayk Mamicanyanın verdiyi məlumata görə, artıq 34 deputat impiçment təşəbbüsünə qoşulub və səsvermənin başlanması üçün cəmi iki imza çatmır. “Ermənistan” partiyasının bütün 28 üzvü də təşəbbüsə dəstək verib. Qanunvericiliyə əsasən, impiçmentin baş tutması üçün 101 nəfərlik parlamentdə 54 deputatın lehinə səs verməsi tələb olunur. Bu dinamika ölkədə siyasi proseslərin sürətlə dəyişə biləcəyinə işarədir və qarşıdakı aylarda Ermənistanı daha mürəkkəb bir siyasi mənzərə gözləyir.
Politoloq Azad Məsiyev Sherg.az-a açıqlamasında Ermənistan cəmiyyətində hazırda ciddi təlatüm yaşandığını bildirib:
"Ölkədə siyasi qarşıdurma getdikcə daha da gərginləşir. 2026-cı ildə keçiriləcək parlament seçkiləri fonunda, həm hakimiyyət, həm də müxalifət düşərgəsi bu prosesə ciddi şəkildə hazırlaşır. Cəmiyyətdəki qarşıdurmanın əsas səbəblərindən biri, erməni diasporunun Rusiya və Qərb qanadları arasında yaranmış fikir ayrılığıdır. Bu qarşıdurmanın mərkəzində duran sual isə belədir: “Ermənistanın gələcək taleyi hansı qütbün təsiri altında formalaşacaq?” Tarixən Ermənistan heç vaxt tam müstəqil və suveren siyasət yürüdə bilməyib. Müxtəlif dövrlərdə böyük güclərin-istər Rusiya, istərsə də Qərb dairələrinin təsiri altında olaraq, regionda öz maraqları naminə istifadə olunan bir alətə çevrilib. Uzun illər Rusiya orbitində olan Ermənistan bu gün isə Qərbin, xüsusilə ABŞ-nin təsirinə düşüb. Baş nazir Nikol Paşinyanın rəhbərliyi ilə Ermənistan Qərbə inteqrasiya siyasəti yürütməyə çalışır və bu da ölkə daxilində parçalanmaya səbəb olur. Erməni cəmiyyətində və siyasi elitasında hazırda "Sorosçular" adlandırılan qrupun güclü təsiri hiss olunur. Bu qrup əsasən Qərb institutları ilə əlaqəli olub, dövlət strukturlarında mühüm mövqeləri tutur. Bu səbəbdən də Rusiyaya yaxın düşərgənin cəmiyyətdəki gücü zəif görünür. 2026-cı ildə keçiriləcək parlament seçkiləri öncəsi siyasi dinamika dəyişə bilər. Müxalifət Paşinyanın nüfuzuna zərbə vurmaq üçün təbliğat mexanizmlərini işə salmağa çalışır. Lakin indiki mərhələdə parlament seçkilərinin növbədənkənar keçirilməsi daha çox Paşinyanın maraqlarına cavab verir. Çünki hazırda bütün inzibati resurslar və struktur imkanlar hakim komandanın nəzarətindədir. Bu isə seçkilərin nəticələrinə təsir etmək potensialını artırır. Hakimiyyət daxilində də növbədənkənar seçkilərin keçirilməsi ilə bağlı fikirlər mövcuddur".
Ekspert qeyd edib ki, əgər Paşinyanın impiçment məsələsi gündəmə gətirilərsə və parlament bu istiqamətdə qərar qəbul edərsə, bu, seçki prosesini daha da tezləşdirə bilər:
"Lakin bütün bu daxili proseslərdən asılı olmayaraq, Ermənistan bölgədə dəyişən geosiyasi reallıqlarla hesablaşmaq məcburiyyətindədir. Azərbaycanın yaratdığı yeni reallıq-2020-ci ildən sonra formalaşan təhlükəsizlik və əməkdaşlıq şərtləri regionda əsas amilə çevrilib. Ermənistan, qonşuları ilə dinc və qarşılıqlı hörmətə əsaslanan münasibətlər qurmaq istəyirsə, ilk növbədə konstitusiyasında dəyişiklik edərək Azərbaycana qarşı ərazi iddialarından rəsmi şəkildə imtina etməlidir. Əgər erməni xalqı hələ də köhnə təfəkkür tərzindən əl çəkməsə, bu, yalnız Ermənistanın təcrid olunmasına və daha ağır nəticələrlə üzləşməsinə səbəb olacaq. Qarşı tərəf bunu dərk etməli və Azərbaycanın yaratdığı reallıqlarla hesablaşmalıdır".
