Musavat.com xəbər verir ki, Ermənistanın baş naziri Nikol Paşinyan bir daha “xəyali vətən” anlayışını rədd edərək, ölkəsinin gələcəyini “29 min 743 kvadrat kilometr ərazisi olan, beynəlxalq səviyyədə tanınmış sərhədləri daxilindəki dinc, demokratik və hüquqi dövlət” kimi təsəvvür etdiyini bildirib.
Bu fikirləri o, İT mütəxəssisləri ilə görüşdə səsləndirib:
“Xəyali vətən axtarışını dayandırmalıyıq, çünki Ermənistan Respublikası bizim xəyallarımızın, arzularımızın vətənidir. Başqa vətən axtarmağa ehtiyacımız yoxdur. Vətən arzusunda olanda onu itiririk, amma artıq arzumuza çatdığımızı anlayanda sakitləşib diqqətimizi işimizə yönəltməliyik.”
Paşinyan bu fikri ilk dəfə səsləndirmir
Bu, Paşinyanın “xəyali vətən” ideyasına qarşı çıxış etdiyi ilk bəyanat deyil. O, son bir il ərzində bir neçə dəfə eyni mövqeni müxtəlif platformalarda təkrarlayıb — həm hökumət iclaslarında, həm də ictimai tədbirlərdə bu fikri açıq şəkildə dilə gətirib.
Baş nazirin məqsədi artıq aydındır: Erməni cəmiyyətində dərin kök salmış “böyük Ermənistan” mifini dağıtmaq, reallığı qəbul etdirmək və ölkəni iki yüzillik utopiyalardan uzaqlaşdırmaq.
Bu dəfə isə o, texnoloji çevrənin nümayəndələrinə – İT mütəxəssislərinə müraciət edərək, yeni nəsil üçün “xəyalpərvər millətçilik” yerinə modern dövlətçilik təfəkkürünü təbliğ edib.
“Beş il əvvəl bunu desəydi, onu linç edərdilər”
Paşinyanın bu kimi sözləri beş-altı il əvvəl səslənsəydi, Ermənistan cəmiyyəti onu “xain” elan edər, qətlə yetirərdi. Çünki o zaman erməni ideologiyasının əsası “dənizdən-dənizə Ermənistan”, “Miatsum”, “Arsax” kimi xülyalar üzərində qurulmuşdu.
Erməni siyasətində “böyük Ermənistan” ideyası həm kilsənin, həm də Rusiyanın manipulyasiya aləti idi. Amma Azərbaycan Ordusunun 2020-ci ildə 44 günlük Vətən müharibəsindəki qələbəsi bu mifləri dağıtdı.
“Dəmir yumruq” reallığı erməni cəmiyyətini ayıltdı və onları reallığa baxmağa məcbur etdi.
2019-cu ildə “Qarabağ Ermənistandır” deyən Paşinyan, indi…
Paşinyanın 2019-cu ildə “Qarabağ Ermənistandır, nöqtə!” ifadəsini işlətməsi onun keçmiş ritorikasını göstərirdi. Lakin bu gün o, artıq tam fərqli bir xətt izləyir – reallığı qəbul edən, sərhədlərlə barışan və sülhə yönələn bir xətt.
Bu, həm Rusiya və kilsənin təsirindən çıxmaq, həm də Türkiyə və Azərbaycanla münasibətləri normallaşdırmaq istəyinin göstəricisidir.
Rusiya və Kilsəyə ünvanlanan açıq mesaj
Paşinyanın bu açıqlamaları, əslində, Rusiyaya və onun əlindəki ideoloji vasitəyə – Erməni Kilsəsinə açıq mesajdır. O, demək istəyir ki, Ermənistanın gələcəyi artıq imperiya himayəsində və dini fanatizmdə deyil, rasional siyasətdədir.
Bu, həm də Kremlin manipulyasiya etdiyi “anti-Azərbaycan” və “anti-Türkiyə” ritorikasına dolayısı ilə etirazdır.
Ermənistanın gələcəyi – Türk dünyası ilə sülhdə
Paşinyan getdikcə daha çox anlayır ki, Ermənistanın gələcəyi Azərbaycan və Türkiyə ilə münasibətlərin normallaşmasından keçir.
Çünki real Ermənistan – Paşinyanın dediyi kimi 29,7 min kvadrat kilometrlik ərazi – iqtisadi inkişaf və regional təhlükəsizlik üçün Türk Dövlətləri Təşkilatının yaratdığı iqtisadi və nəqliyyat məkanına inteqrasiya etmədən yaşaya bilməz.
Paşinyanın erməni kilsəsinə aid “xəyali vətən” ideyasını təkrar-təkrar rədd etməsi artıq təsadüfi bəyanat deyil – yeni erməni siyasi düşüncəsinin formalaşmasının göstəricisidir.
Bu, həm Azərbaycanın 44 günlük qələbəsinin, həm də reallığın məcburedici gücünün nəticəsidir.
İndi məsələ ondadır ki, Paşinyan kimi düşünənlərin sayı Ermənistan cəmiyyətində artsın – çünki bölgədə sülhün açarı xəyallardan deyil, reallıqdan keçir.
Musavat.com
