Gündəmin sensasiyalı xəbərlərindən biri də Nəcməddin Sadıkovun Türkiyədə dindirilməsi barədədir. Bu haqda "Middle East Eye" nəşrinin müxbiri Ragib Soylu yazıb.

Ragib Soylunun yazdığına görə, 2020-ci ildə Azərbaycan Respublikası müdafiə nazirinin birinci müavini-Silahlı Qüvvələrin Baş Qərargah rəisi, general-polkovnik Nəcməddin Sadıkovu Türkiyə hərbçiləri saxlayaraq, Ankaraya aparıb, orada dindiriblər. Soylunun yazdığına görə, buna səbəb Azərbaycan ordusunda Rusiyaya bağlı şəxslərin kimliyinin ortaya çıxarılması olub.

Sözün doğrusu, bu, heç də yeni söhbət deyil; 44 günlük müharibənin ilk günlərində Füzuli istiqamətində ağır döyüşlər getdiyi vaxt Türkiyə generallarının Nəcməddin Sadıkovu Ankaraya apardığı haqda qeyri-rəsmi məlumatlar yayılmışdı. Ancaq indiki kimi o zaman da bu məlumatlar rəsmən təsdiq və ya təkzib olunmamışdı. Ancaq bu söhbətin yenidən indi gündəmə gəlməsi xüsusi maraq və xeyli suallar doğurur.

Nəcməddin Sadıkovun Rusiya xüsusi xidmət orqanlarına, konkret olaraq, Rusiya Silahlı Qüvvələri Baş Qərargahının Baş Kəşfiyyat İdarəsinə bağlı olduğu haqda xeyli əvvəldən qeyri-rəsmi məlumatlar yayılırdı. Qarabağ müharibəsinin birinci fazasında ard-arda ağır məğlubiyyətlərə, torpaqların itirilməsinə baxmayaraq, Nəcməddin Sadıkovun sürətli və triumfal karyera yüksəlişi hər kəsi həmişə təəccübləndirirdi. Kəlbəcərin işğalı zamanı da Sadıkovun "yüksək performansı" hamının yadındadır.

Çoxları bilməsə də, məlumatlı, diqqətli oxuculara məlumdur ki, Azərbaycanın rayonlarının işğalında rus hərbçiləri, zabitlər, təlimatçılar, snayperlər çox sayda və fəal iştirak edirdilər. Müxtəlif vaxtlarda müdafiə naziri, müdafiə nazirinin müavini, Baş Qərargah rəisi vəzifəsindən üzü aşağı əsas komandirlərin xeyli hissəsi Rusiyaya bağlı olub. Siyasi hakimiyyətlər dəyişsə də, orduda keçmiş Sovet, yəni rus hərbi kəşfiyyat elementlərini təmizləmək axıra qədər mümkün olmamışdı. Nəcməddin Sadıkovla da bağlı belə bir problem vardı. Bunu çoxları bilirdi, kuluarlarda söhbətlər gedirdi. Ancaq hər hansı rəsmi təsdiq və ya təkzib yox idi.

Əsas sual isə budur: bəs bu məlumat niyə məhz indi açıq-aşkar Türkiyə mediasına sızdırılıb?

Bu suala, əlbəttə, Türkiyə hərbi və kəşfiyyat strukturları cavab verə bilər. Amma bəzi ehtimalları irəli sürmək mümkündür.

İstisna deyil ki, bu, Azərbaycanla Ermənistan arasında imzalanmış Vaşinqton razılaşmalarından sonra Rusiyanın bu iki Cənubi Qafqaz ölkələrinə qarşı təxribat törətmək cəhdləri ilə bağlıdır. Rusiya bölgədə Türkiyənin güclənməsindən narahatlığını xüsusi olaraq gizlətmir. Hətta Kreml öz propoqandistləri vasitəsilə Türkiyənin Azərbaycan ərazisində hərbi baza qurmaq ehtimalına qarşı sərt mövqeyini zaman-zaman dilə gətirib. Görünür, bu məlumatı mediaya sızdırmaqla Türkiyənin xüsusi rəsmi məqamları Rusiyaya çəkindirici mesajlar göndərirlər və Rusiyanın Cənubi Qafqazda nələr etdiyinə dair müfəssəl məlumatlı olduqlarını anladırlar.

Əlbəttə, bunlar, sadəcə, ehtimallardır. Hər bir halda məlumatın mediaya atılmasının özü xüsusi məqsəd daşıyır.

Seyid Əhmədli, Bizimyol.info