Ermənistanda parlament seçkiləri yaxınlaşdıqca Baş nazir Nikol Paşinyana qarşı təzyiqlərin artması müşahidə olunur.

Son günlər təbliğat-təşviqat kampaniyası çərçivəsində seçicilərlə keçirilən görüşlər zamanı Nikol Paşinyana qarşı bir neçə etiraz və hücum cəhdləri baş verib. Baş nazirə yönəlik əsas ittihamlar isə onun 44 günlük müharibədə ciddi itkilər verərək məğlub olması və Qarabağı itirməsi ilə bağlıdır.

Lakin diqqəti çəkən mühüm məqam Paşinyana yönəlik təhdidlərin məhz əsasən 2023-cü ildə Qarabağdan könüllü köçərək Ermənistana getmiş ermənilər tərəfindən törədilməsi ilə bağlıdır. Onlar Paşinyanın xəyanətkar, satqın olduğunu və 5 min erməni hərbçini qurban verdiyini deyirlər.

Bütün bu ittihamların qarşılığında isə Ermənistanın Baş naziri qışqıraraq onu tənqid edənlərdən müharibədə nə üçün döyüşmədiklərini, niyə ölmədiklərini, Qarabağı nəyə görə tərk etdiklərini soruşub.

Maraqlıdır ki, Paşinyan bu suallara cavab ala bilməyib. Çünki Paşinyandan Qarabağı tələb edənlərin heç biri əslində, nə özləri, nə də oğullarının müharibəyə getməsini istəyir.

Seçki kampaniyası çərçivəsində Baş nazirə qarşı təhdidlərin Qarabağ ləhcəsində danışan ermənilər tərəfindən edilməsi xüsusi diqqət çəkib. Paşinyan Qarabağ ləhcəsində danışan bu adamların kimlərinsə tərəfindən məqsədyönlü şəkildə onun üzərinə göndərildiyini deyib.

Hətta Nikol Paşinyan əsəbiləşərək onlardan ləğv edilmiş qondarma rejimin keçmiş rəhbəri Şahramanyanın, Qarabağdakı “parlament”in deputatlarının müharibədə nə üçün döyüşüb ölmədiklərini soruşub. Sonra əsəbiləşən Paşinyan “Sizin hamınızı məhv edəcəm”-deyə cavab verib.

Xatırladaq ki, mayın 18-də buna bənzər daha bir hadisə baş verib. Özünü “Artsax İnqilab Partiyası” adlandıran qurumun rəhbəri Artur Osipyan Paşinyanı təhqir edərək ona barmaq silkələyib və şillə ilə vurmaq istəyib. Hüquq-mühafizə orqanları Osipyanı saxlayıb və xuliqanlıq hərəkətlərinə görə barəsində iki ay müddətinə həbs qətimkan tədbiri seçilib.

“Qarabağ klanı” üzə çıxır

Bütün bu hadisələr son vaxtlar Qarabağdan olan erməniləri təşkilatlandırılaraq məqsədyönlü şəkildə kənar qüvvələr tərəfindən Paşinyanın üzərinə göndərildiyini göstərir. Yəni seçkilərdə Ermənistan hakimiyyəti əleyhinə “Qarabağ kartı”ndan istifadə edildiyini görmək olar. Ancaq bu təxribatın hansı siyasi mərkəzdən idarə olunduğunu müəyyən etmək çətin deyil.

İlk növbədə seçki prosesinin Paşinyanın timsalında Qərbyönümlü qüvvələrlə Rusiyadan idarə olunan revanşist müxalifət arasında getdiyini nəzərə alsaq, baş verən hadisələrin əsas səbəbkarının Moskva olduğu aydın olar.

Bu baxımdan, istər Ermənistan sosial mediasında, istərsə də xarici mətbuatda yayılan məlumatlar qeyd edilən faktı bir daha təsdiq edir. “Bagranyan 26” teleqram kanalında dərc olunmuş “Kreml şantajı davam etdirir” başlıqlı yazı sözügedən proseslərin Rusiyadan idarə olunduğunu təsdiq edir.

“Biz dəfələrlə xəbərdarlıq etmişik ki, Ermənistandakı seçkilər ərəfəsində Kreml təhdid, şantaj, dezinformasiya və qorxutma yolu ilə Ermənistandakı seçkilərin nəticələrinə təsir göstərmək və öz agentlərini - üçbaşlı müharibə və casuslar partiyası olan Köçəryan-Karapetyan-Tsarukyanı hakimiyyətə gətirmək üçün əlindən gələni edəcək! İndi onlar artıq başa düşürlər ki, agentlərini hakimiyyətə gətirə bilməyəcəklər.

Əsas məqsəd onları parlamentə daxil etmək, dezinformasiya yaymaqla seçkiləri qeyri-legitimləşdirmək və mümkün olduqda Ermənistanda qeyri-sabit vəziyyət yaratmaqdır ki, öz agentlərinin uğursuzluğunu Moldovada etdikləri kimi ictimaiyyətə guya hakimiyyət tərəfindən seçki saxtakarlığı kimi təqdim edə bilsinlər! Ermənistanla Azərbaycan arasında sülh bərqərar olub və Kreml Ermənistanı təcavüzlə şantaj etmək qabiliyyətini itirib.

Kremlin qalan silahları dezinformasiya, kiberhücumlar, iqtisadi şantaj və s.-dir. İndi isə “Rosselxoznadzor” elan edib ki, 22 may 2026-cı il tarixindən etibarən istixana yoxlamaları və nəticələrin təhlili başa çatana qədər Ermənistandan gətirilən və göndərilən gül məhsullarının idxalına müvəqqəti məhdudiyyətlər tətbiq edəcək.

Dəfələrlə vurğuladığımız kimi, Kreml 7 iyuna qədər əlindən gələni edəcək və bütün iqtisadi təzyiqləri göstərəcək. Lakin bütün bunlar 8 iyunda, agentləri tarixin zibil qutusuna atılan kimi qəfil sona çatacaq. Çünki Ermənistana qarşı istənilən iqtisadi sanksiyalar Kremlin ayağına dəyən zərbədir!

Kremlin bu cür qanunsuz qərarlarla Avrasiya İqtisadi Birliyini farsa çevirdiyini, bu təşkilatın bütün mümkün norma və təməllərini pozduğunu bir daha təkrarlamayacağıq. Amma bir daha vurğulayacağıq ki, bütün bunlar düz 18 gün sonra, 8 iyunda başa çatacaq”,-deyə məqalədə qeyd edilir.

Təhdidlər artacaq

Bu yazının adı anonim saxlanmış rəsmi mənbədən göndərildiyini görmək olur. Yəni Ermənistan hakimiyyəti bütün təzyiqlərə baxmayaraq, Rusiyanın təhdidləri qarşısında geri çəkilməyəcəyini nümayiş etdirir. Lakin bu məlumatlar səsvermə günü yaxınlaşdıqca, Kremlin Paşinyana siyasi təhdidlərinin artacağını deməyə əsas verir.

Paşinyana qarşı hücumlarda Rusiyanın Qarabağdan getmiş separatçılardan və “Qarabağ klanı”nın qalıqlarını istifadə etmək planlarından xəbər verir. Nikol Paşinyanın Qarabağdan getmiş qadınla mübahisəsi zamanı “Mən Köçəryanı həbsə atdıracağam” deməsi də məhz bu məqamla bağlıdır. Çünki Baş nazir bu təxribatın arxasında Moskvanın və eks-prezident Robert Köçəryanın dayandığını yaxşı bilir.

Bu arada “The Insider” nəşri Federal Təhqiqatlar Bürosu, Rusiya Baş Hərbi Kəşfiyyat İdarəsi-“QRU” və digər qurumların agentlərinin Ermənistana Baş nazir Nikol Paşinyana qarşı çıxmaq üçün göndərildiyinə dair məqalə yayıb. Rusiya Xarici İşlər Nazirliyinin Mətbuat Xidmətinin “Telegram” kanalı məqaləyə etiraz mətni yayımlayaraq təkzib verib.

Lakin son günlər Ermənistanın Avropa İttifaqına üzvlük siyasətinin Avrasiya İqtisadi Birliyinə zidd olması ilə bağlı Rusiyadan ardıcıl gələn etiraz bəyanatları iki ölkə arasındakı münasibətləri kifayət qədər gərginləşdirib.

Kreml Paşinyanı avrointeqrasiya kursundan döndərə bilmədiyinə görə Ermənistanı öz təsir zonasında saxlamaq üçün iyunun 7-də keçiriləcək seçkilərə hakimiyyət dəyişikliyinə nail olmaq fürsəti kimi baxır.

Seçkilərdən sonra Nikol Paşinyanın Avropa İttifaqına üzvlük məsələsini yeni konstitusiyaya daxil edəcəyi, Azərbaycanla sülh müqaviləsi imzalayıb, Türkiyə ilə sərhədlərin açılmasına nail olaraq Moldova modeli əsasında Qərbə daha sıx inteqrasiya kursu yürüdəcəyi gözlənilir.

Paşinyana sui-qəsd?

Bu isə Ermənistanın Kollektiv Təhlükəsizlik Müqaviləsi Təşkilatı, Avrasiya İqtisadi Birliyi və Müstəqil Dövlətlər Birliyi kimi qurumlardan çıxması ilə nəticələnə bilər. Ermənistanda radikal müxalifətin reytinqi zəif olduğundan, seçkilərdə qalib gəlmək şansı görünmür.

Ona görə də Rusiya Paşinyanı Baş nazir postundan uzaqlaşdırmaq üçün başqa vasitələrə əl ata bilər. Son günlər baş verən hadisələr Qarabağdan getmiş ermənilərdən bu məqsədlə alət kimi istifadə ediləcəyini təsdiq edir.

Onların arasında terrorçuların, hərbi cinayətkarların olduğunu nəzərə alsaq, Paşinyanın həyatına sui-qəsd törədə biləcək adamlar da az deyil. Hazırda Paşinyana qarşı edilən etirazlar, təhdidlər daha çox xəbərdarlıq məqsədi daşıyır. Əgər münasibətlərdə yumşalma və ya hər hansı konsensus tapılmasa, o zaman Rusiya daha sərt tədbirlərə əl atmağa çalışacaq.

Müşfiq Abdulla
"Cebheinfo.az"