“İrandakı aqressiv rejim çox məmnuniyyətlə Azərbaycanı vurardı. Çünki bu rejim 30 illik işğal dövründə, eləcə də 44 günlük müharibədə daima Azərbaycana zərər vurub, vətəndaşlarımızın ölümünə səbəbiyyət verib, sona qədər Qarabağ separatçılarını dəstəkləyib. Bu gün də fürsəti olsa, cəsarəti çatsa, Azərbaycana qarşı yenə aqressiv addımlar ata bilər. Ancaq məsələ bundadır ki, cəsarəti çatmaz. Güclü Azərbaycana qarşı İran əsla və əsla belə bir addım ata bilməz. Görünür, "İran Azərbaycanı vuracaq" mesajları da Azərbaycanı təhdid, qorxu altında saxlamaq məqsədilə verilir. Belə informasiyaların mənbəyi də İrandan gəlir. Ancaq diqqət etdinizsə, Yaxın Şərq müharibəsinin başlanması ərəfəsində Azərbaycanın müdafiə naziri hava hücumundan müdafiə sistemlərimizlə, qoşunlarımızla, texniki təchizatlarımızla yenidən tanış oldu. Azərbaycanın hava məkanı bütün növ təhlükələrə qarşı özünü müdafiə etməyə hazırdır. İstəyirik ki, bir gün nə vaxtsa İranda da belə sabitlik olsun. Orada yaşayan azərbaycanlılar da sabit, inkişaf edən bir ölkədə yaşasinlar”.
Bu sözləri Pravda.az-a açıqlamasında Milli Məclisin Müdafiə, təhlükəsizlik və korrupsiya ilə mübarizə komitəsinin üzvü Hikmət Babaoğlu deyib.
Deputat bildirib ki, İran qonşu ölkələri vurmaqla özünü yalnızlaşdırır, yəni təklənir: “Potensial müttəfiqləri olan, qonşu hesab olunan körfəz ölkələrinin hər birinin ərazisinə bu və digər səbəblə raketlər atan İran gələcək perspektivini də, qonşuluq siyasətini də itirir. Hətta özünü nə vaxtsa bu ölkələrin mümkün potensial cavabı üçün təhlükə altına qoymuş olur. Belə aqressiv siyasət, əlbəttə ki, nəticə verə, İranın, İran xalqının maraqlarını qoruya bilməz. Bu, sadəcə, İrandakı siyasi elitanın instinktiv olaraq öz mövcudluğunu qorumaq aqressiyasıdır. Bu da nəticədə iflasa uğrayacaq. Çünkü bütün dünyaya qarşı savaşmaq olmaz. Həm qonşularımıza, həm müsəlman ölkələrinə, həm də dünyanın ən güclü ordusuna, ən böyük hərbi-siyasi blokuna qarşı savaşmaq mümkün deyil. Yaxşı olar ki, İranın siyasi qərarverənləri bu gerçəkliyi nəzərə alsınlar, praqmatik nöqteyi-nəzərdən çıxış etsinlər”.
