Pensiya və təqaüdlərin verilməsi ilə bağlı daim problemlər mövcuddur. Belə ki, kimsə xəstə olduğu halda pensiya ala bilməməsindən, digəri uzun illər işləməsinə baxmayaraq, artan pensiya bazasından şikayətçidir. Qeyd edək ki, “Hürriyyət”ə müraciət edən Nərimanov rayonu, Kaveroçkin küçəsi 34, mənzil 35-də yaşayan Məhəmməd İsa oğlu Hüseynov isə repressiya qurbanlarının övladları üçün nəzərdə tutulan 10 faiz pensiya artımını ala bilməməsindən şikayət edir.
“Cavab gəldi ki, atam günahsız tutulub”
“1940-cı ildə Ermənistan Respublikasının Qarakilsə şəhərində anadan olmuşam. Atam İsa Hüseynov 1911-ci ildə Azərbaycan Respublikasının Gəncə şəhərində anadan olub. 1941-ci ildə atam Kirovakan şəhərində Xalq Komissarları idarəsində müfəttiş işləyib. Gözlənilmədən Ermənistan NKD-si tərəfindən atam siyasi məhbus kimi tutulub, İrəvan şəhərinə aparılıb. İrəvan şəhərindən sonra isə o, Rusiyanın Kirov vilayətinə sürgün olunub” deyən M.Hüseynovun sözlərinə görə, atası tutulandan sonra onu nənəsi kəndə gətirib: “Spitak rayonunun Saral kəndində orta məktəbə getmişəm. Sonradan mən Bakıya gəlib peşə məktəbində oxumuşam, ondan sonra Türkmənistanda, Rusiyada işləmişəm. Ondan sonra isə gəlib Bakıda "Politexnik" universitetinə girmişəm. O vaxtı mən artıq atamı axtarmağa başladım. Ermənilər Qarakilsənin adını dəyişib Kirovokan qoyublar. Mən birinci dəfə Kirovakan şəhərinə getdim, şəhər icra aparatından arayış aldım. Düzdür, onu erməni dilində yazmışdılar. Həmin arayışla İrəvan şəhərinə getdim, dövlət təhlükəsizlik orqanına müraciət etdim. Onlar mənə dedilər ki, sən ünvanını qoy, get, biz cavab göndərərik. Sonradan cavab gəldi ki, mənim atam doğurdan günahsız tutulub. Ermənistan Ali Məhkməsi ona bəraət verib”.
“Yaxşı ki, o vaxt atam haqqında sənədlər yığırdım”
M.Hüseynov nəzərə çatdırdı ki, 2000-ci ildə o, Represiyya Qurbanları Cəmiyyətinin üzvü olub: "Bu cəmiyyətə həmişə gedib, gəlirdim. Əvvəllər oranın sədri Əşrəf Mehdiyev idi. İndi Məhəmməd Əmin Rəsulzadənin nəvəsi Rəis Rəsulzadədir. O vaxtı getdim orada işləyən xanım mənə dedi ki, sənin xəbərin varmı ki, Heydər Əliyev bir qanuna qol çəkib, qanunla sənin pensiyana 10 faiz artım düşür. Dedim, xəbərim yoxdur. O, mənə arayış verdi. O arayışla Nərimanov Rayon Sosial Müdafiə Fonduna getdim. Orada dedilər ki, sən prokurorluqdan da arayış gətirməlisən. Təzədən Repressiya Qurbanları Cəmiyyətinə gedim. Oradan sənəd hazırladılar. O sənədləri Respublika Prokurorluğunun poçt qutusuna saldım. Aradan 15 gün keçmişdi, mənə məktub gəlid ki, aparılan axtarışlar nəticəsində Azərbaycan Respublikasının Dövlət Təhlükəsizlik Xidmətində və Daxili İşlər Nazirliyində atanızın adı yoxdur. Yaxşı ki, o vaxt atam haqqında sənədlər yığırdım. O vaxt Ermənistan Ali Məhkəməsinə müraciət etdim ki, atam haqqında nə bilirsiniz. Onlar cavab yazıb göndərdilər ki, bizdə olan məlumata görə, sizin atanız 1911-ci ildə Azərbaycan Respublikasının Gəncə şəhərində anadan olub”.
“Avdıyenko tərəfindən göndərilən məktubda mənim, anamın, nənəmin də adı yazılıb”
“Eyni zamanda mən SSRİ-nin Kirov vilayətində atam oturan türmənin rəhbəri Avdıyenko tərəfindən məktub aldım. O da yazır ki, bizdə olan məlumata görə, sizin atanız 1911-ci ildə Azərbaycan Respublikasının Gəncə şəhərində anadan olub, tutulanda da Ermənistan Respublikasının Kirovakan şəhərində işələyirdi. Hətta Avdıyenko tərəfindən göndərilən məktubda mənim, anamın, nənəmin də adı yazılıb. Mən bu sənədlərin hamısının surətini çıxartdım, respublikanın baş prokoruru Qaralova göndərdim ki, bu mənim sənədlərimdir. Sənədlər təsdiq edir ki, atam Gəncədə anadan olub. Eyni zamanda, sənədləri ölkə başçısı İlham Əliyevə də göndərdim”,-deyə şikayətçi əlavə etdi. M.Hüseynov qeyd etdi ki, onun pensiyasına 11 manat artım olmalıdır: “Hazırda mən 240 manat pensiya alıram. Baxmayaraq ki, mənim 47 illik iş stajım var. Özü də 7 il Sibirdə şaxtaçı olmuşam. Ona baxmayaraq, 11 manat artımı mənə çox görürlər. Bu, mənim atamın qan puludur. Mənim də hüququmdur. Mən dövlətin cibinə girmirəm, dövlətdən nəsə istəmirəm. Bir də mən heç 11 manata da möhtac deyiləm. Söhbət qanunun aliliyindən gedir. Mən hansı ölkədə yaşayıram?! Mən hansı dövlətin vətəndaşıyam?! Əgər dövlət mənim hüququmu qorumursa, mən bu dövlətdən nə gözləyim?! Mənim bütün sənədlərim var. 1964-cü ildə Gəncə şəhərinin arxivinə də getdim, orada işləyən bir qadın məni arxiv deyilən bir otağa apardı. Orada bir qalaq kağız var idi. Dedi ki, oğlum, bunlar ərəb əlifbası ilə yazılıb, Gəncənin qədim arxividir. Əgər səni maraqlandıran nəsə axtarmaq istəyirsən get, məscidin qabağına, ərəb dilini bilən adam tap, gətir. Mən dedim, ay xanım, bu sənədləri aramaq üçün bir adam yox, 20 adam gətirməlisən. Mən də prezidentə yazdım ki, atam filan tarixdə Gəncə anadan olub, amma arxivdə yoxdur. Ona görə də Daxili İşlər Nazirliyində və Dövlət Təhlükəsizlik Nazirliyində atam haqqında sənəd yoxdur”.
“1996-cı ildən bəri mənə düşən 10 faiz artımı tələb edirəm”
Şikayətçi diqqətə çatdırdı ki, 15 mart 1996-cı il tarixində “Siyasi Repressiya Qurbanlarına Bəraət verilməsi” haqqında Azərbaycan Respublikasının qanunu var: “Bu qanuna əsasən pensiyama 10 faiz artım düşür. Mən onu tələb edirəm. Mənim qan pulumu versinlər. 1996-cı ildən bəri mənə düşən 10 faiz artımı tələb edirəm”. Hüseynov onu da vurğuladı ki, atası tutulandan 2 ay sonra müharibə başlayıb: “Aləm bir-birinə qarışıb. Atamın nəyə görə tutulduğunu bilmirəm. Bu gözlənilmədən olub. Anam, nənəm bu barədə bir söz deməyib. Ermənilərin bu işdə əli olduğunu da deyə bilmərəm”.
