ABŞ və onun müttəfiqləri Müstəqil Dövlətlər Birliyinə (MDB) üzv ölkələrdə vəziyyəti gərginləşdirmək üçün genişmiqyaslı işə başlayıb. DİA.AZ-ın məlumatına görə, belə bir iddia ilə Rusiya Federal Təhlükəsizlik Xidmətinin (FTX) direktoru Aleksandr Bortnikov çıxış edib. Bortnikov deyib ki, ABŞ və onun müttəfiqləri MDB məkanında siyasi böhranlara ilkin şərtlər və “rəngli inqilab” ssenarilərinin həyata keçirilməsi üçün lazımi şərait yaratmağa çalışır. Bortnikov əlavə edib ki, beynəlxalq vəziyyət xeyli mürəkkəbləşib: “Bu da MDB məkanında əsas problemlərin nəzərəçarpacaq dərəcədə kəskinləşməsinə və yeni təhlükələrin yaranmasına səbəb olub”.
Onun sözlərinə görə, ABŞ və onun müttəfiqləri MDB ölkələrində vəziyyəti sarsıtmaq, arzuolunmaz dövlətlərə sanksiya təzyiqi göstərmək, logistik marşrutları bağlamaq, yeni nəqliyyat dəhlizləri yaratmaq və bununla da qlobal iqtisadi böhranın mənfi nəticələrini artırmaq istəyirlər.
Bortnikov bildirib ki, kollektiv Qərb beynəlxalq hüququn müəyyən edilmiş normalarına məhəl qoymayaraq, şantaj və müxalifləri qorxutmağın ən təsirli formalarını axtarır, MDB ölkələri ilə onların qonşuları arasında mövcud dostluq münasibətlərinə zərbə vurur: “Qərblilərin xüsusi səyləri nəzarətsiz dövlətlərarası birlikləri məhv etməyə və onların iştirakçılarını alternativ formatlara cəlb etməyə yönəlib ki, bu da qurulmuş ticarət, iqtisadi, siyasi, mədəni və tarixi əlaqələri kəsir”. FTX rəhbərinin fikrincə, Qərb öz kəşfiyyat xidmətləri, eləcə də idarə olunan qeyri-hökumət təşkilatları və media vasitəsilə MDB ölkələrində etnik və dini ədavətin və silahlı münaqişələrin qızışdırılmasına çalışır, bununla da siyasi böhranlar üçün ilkin şərtlər və siyasi böhran üçün lazımi şərait yaradır. Bortnikov əlavə edib ki, kollektiv Qərb MDB məkanında “rəngli inqilab” ssenarilərinin həyata keçirilməsinə çalışır. Bundan əvvəl Gürcüstan DTX-sı iddia etmişdi ki, USAİD “rəngli inqilab”a sponsorluq edir. Bu təşkilatın Sorosla ciddi əlaqələri var.
Ümumiyyətlə, postsovet məkanında “narıncı” inqilabları, “məxməri” inqilabları, Maydan hərəkatını Qərb fondları təşkil edib. Lakin son illərdə bu regionda siyasi çevrilişlər üçün cəhdlər yoxdur. Çünki hakimiyyət dəyişikliklərinin yerini münaqişələr, strateji mübarizələr tutub: Ukrayna müharibəsi, Ermənistan uğrunda strateji savaş, Qərb-Rusiya qarşıdurması... Bütün bunlar həmin inqilabların ardınca davam edən geopolitik toqquşmaların ardıdır. Amma Rusiyanın ciddi həyəcanı hiss olunur. FTX rəhbərində Qərbin bölgədə dəyişikliklərə hazırlıqla bağlı kəşfiyyat informasiyaları ola bilər. Qeyd edək ki, MDB Dövlətlərinin Təhlükəsizlik və Xüsusi Xidmət Orqanları Rəhbərləri Şurasının Bakıda iclası keçirilib. Həmin toplantında Rusiya Federasiyası Federal Təhlükəsizlik Xidmətinin direktoru Bortnikov da iştirak edib. Bortnikov MDB Dövlətlərinin Təhlükəsizlik və Xüsusi Xidmət Orqanları Rəhbərləri Şurasının sədridir. Güman edilir ki, bu toplantıda da Bortnikovun Bakıya gəlməzdən öncə səsləndirdiyi bu iddialarla bağlı müzakirələr aparılıb.
REAL Partiyasının Siyasi Komitəsinin üzvü Natiq Cəfərlinin qəzetimizə dediyinə görə, belə açıqlamalar əvvəllər də olub. Onun fikrincə, Gürcüstan, Ukrayna hadisələrindən sonra belə fikirlər tez-tez səslənirdi: “İrəvanda Paşinyan hakimiyyətə gəldikdən sonra yenə bu iddialar irəli sürüldü. Belə çıxır ki, Rusiya məlumatlı olur, amma qarşısını ala bilmir. Bütün hallarda xalqlar öz seçimini edir. Paşinyan iki dəfə seçkidə qalib gəlib, Tiflisdə də Saakaşvili iki dəfə seçkini udub, seçki ilə də iqtidardan gedib, Ukrayna haqda da bu fikirləri söyləmək olar. FTX rəhbəri isə görünür ki, daxili auditoriyaya hesablanmış çıxış edib. Yəni başqa dövlətlərdə qarışıqlıq olur, Rusiyada isə sabitlikdir. Həmçinin, onun sözləri Mərkəzi Asiya dövlətlərinə bir işarədir”. N.Cəfərli hesab edir ki, Azərbaycanda xalq tərəfindən dəstəklənən prezident var, seçkilər keçirilirsə, qalib gələr: “Əslində bir sıra ölkələrdə rəngli inqilabları Rusiya özü edib. Bundan əlavə, Rusiya narahatdır ki, postsovet məkanında ölkələr Qərbə inteqrasiya edir, müstəqil addımlar atır. Xüsusən də Rusiyanın Qazaxıstanla bağlı narazılığı var, Tokayev hökumətinin bəzi addımları onun xoşuna gəlmir”.
Siyasi analitik Azad Məsiyev “Yeni Müsavat”a bildirdi ki, Rusiya-ABŞ arasında diplomatik, siyasi-hərbi savaş gedir. Ekspert vurğuladı k, Birləşmiş Ştatlar Rusiyanı dünyanın siyasi arenasından bir supergüc kimi silmək üçün onun ətrafında demokratiya bayrağı altında hakimiyyət çevrilişləri edib: “Ukraynada bunun daha böyük nəticəsini gördük və Kiyev klounlaşdırıldı. Bununla məqsəd Rusiyanın çevrəsində qaynar ocaqlar yaratmaqla onun təsir dairəsini kiçiltməkdir. Soros bu prosesdə xüsusi iştirak edir. Bu gün Ukrayna ilə yanaşı Ermənistan üzərindən də Rusiya əleyhinə siyasət aparılır”. A.Məsiyev bildirdi ki, Azərbaycanda da vaxtilə Soros fondu olub: “Bu təşkilatın fəaliyyəti anti-Rusiya mühiti yaratmaq, qərbpərəst güclərlə ölkədə dəyişiklik etmək olub. Eyni zamanda Orta Asiyada Rusiyanın təsirlərini azaltmaq istiqamətində addımlar atılıb. Amma Rusiya xarici siyasətində dönüş edə bilib. Əvvəllər siyasi müstəvidə idisə, indi iqtisadi prizmadan məsələlərə yanaşır. Bu gün Rusiya Türkiyə ilə birgə iqtisadi maraqlarını reallaşdırmağa çalışır. Yəni Rusiyanın yeni siyasi doktrinası bundan ibarətdir”.
