Sabiq səhiyyə naziri Əli İnsanovun rəhbərlik etdiyi Haqq və Ədalət Partiyası (HƏP) Müvəqqəti Milli Etimad Hökuməti ideyası ilə çıxış edib. HƏP-in Ali Məclis sədri Zəlimxan Məmmədli Müvəqqəti Milli Etimad Hökumətinin ideya və məramlarını Qaynarinfo-ya açıqlayıb. DİA.AZ onunla müsahibəni təqdim edir:
- Son zamanlar Cənubi Qafqazda artan gərginlik görürük. Rusiya Ukraynada hərbi əməliyyatlarını davam etdirməklə müharibə coğrafiyasını genişləndirmək istəyir. Xüsusi ilə onun harada casus şəbəkəsi varsa, həmin yerlərdə gərginliklər yaratmaq istəyir. İstər Serbiya, istər Moldova, istər Gürcüstan, istərsə də Azərbaycanda.
Fikir verirsinizə, son zamanlar ölkədə "müharibə başlayır”, "sabah müharibədir” deyə müəyyən çağırışlar və kiberhücumlar var. Müharibə ritorikası ilə azərbaycanlıların emosiyasını qaldırmaq xətti var. Bu nədir? Rusiya prosesi Qafqaza daşımaq istəyir, xüsusi ilə də Azərbaycan birinci yerdə durur. Ona görə də biz indiki zamanda maksimum düşünüb daha ağıllı addımlar atmalıyıq. Siyasi sabitlik lazımdır, gərginliklərin mənbələrini aydın bilməliyik, siyasi təfəkkürümüz ona yetməlidir ki, hadisələrə emosional deyil, fundamental, strateji düşüncələrlə yaxınlaşaq. Bu bizə vəziyyəti daha da gərginləşdirmək üçün əsas olmamalıdır. Eyni zamanda Azərbaycanda Prezident hakimiyyəti də var. Yəni, o mütləq səlahiyyətlidir. O, müharibəni başlaya da, saxalaya da bilir. Saziş imzalaya da bilir. Bunu biz zaman-zaman da gördük.
"Milli Etimad Hökumətinin əsas vəzifəsi demokratiyaya keçid və o cümlədən xarici təhdidlərdən Azərbaycanı qorumaqdır"
Müvəqqəti Milli Etimad Hökumətinin fəlsəfəsində nə durur - "Milli qüvvələrlə hakimiyyətin resursunu milli maraqlarımız naminə birləşdirmək olarmı” sualı. Və bu sualın cavabında Prezident hakimiyəyti, yəni hakim komandanın başında duranla milli qüvvələrin müvəqqəti Milli Etimad Hökumətində əməkdaşlığının reallaşması durur. Bunun reallaşması HƏP-in əsas vəzifələrindən biridir. Bu Milli Etimad Hökumətinin əsas vəzifəsi demokratiyaya keçid və o cümlədən xarici təhdidlərdən Azərbaycanı qorumaqdır. Yəni, ictimaiyyəti, milli müqaviməti səfərbər etmək, doğru informasiya siyasəti yürütmək. İlk növbədə Azərbaycanın milli informasiya sistemini qurmaq. Təəssüflər olsun ki, bu, Azərbaycanda yoxdur. İxtiyari informasiya məkanı Azərbaycanda son zamanlar dominatlıq təşkil edə bilir. Demokratiyaya keçid mühüm vəzifələrdəndir. Demokratik seçkilərə gəlincə, biz artıq dünyanın sivil hissəsindən çox aralıyıq. Rusiya, İran çökəcək, biz dünyanın sivil hissəsinin dəstəyini qazanmalıyıq. Türkiyənin olduğu məkana inteqrasiya çox önəmlidir.
Növbəti prezident seçkilərinə qədər islahatlar paketini təsdiqləyib, parlament, bələdiyyə seçkiləri keçirilə bilər, cəmiyyətin hədəfli hissəsi dövlət quruculuğu işinə səfərbər ola bilər. Eyni zamanda prezident seçkilərində hər kəsin bərabər əsaslarla, o cümlədən mövcud hakim komandanın bərabər əsaslarla iştirakı ilə Prezident hakimiyyətinin də qurulması reallaşa bilər. Yeni hökumətin qurulması ilə Milli Etimad Hökuməti öz işini bitmiş hesab edər. Milli Etimad Hökmətinin əsas vəzifələrindən biri ictimai, hüquqi legitimləşmə, hakimiyyətin bütün strukturlarının xalqın iradəsi ilə formalaşmasıdır. HƏP bu ideyanı uzun zamandır hazırlayıb. Azərbaycan siyasi oryentasiyası aydın olmadıqca, sivil dünyanın yanında yer almadıqca, təhdid olunacaq. İstər İran, istərsə Rusiya tərəfindən. Onların yetişdirib, bölgəyə yerləşdirdiyi casus şəbəkələri tərəfindən təhdid olunacaq. Demokratiya və milli birlik Azərbaycanı tək alternativ çıxış yollarından biridir. HƏP bu məsələdə israrlıdır. Hansı qüvvələr bu ideyanı dəstıkləyəcəklər, onlar da bu hökumətdə təmsil olunacaqlar.
- Milli Etimad Hökuməti ilə bağlı partiyalarla müzakirə aparmısınız?
- Müəyyən danışıqlarımız olub.
- Nəticə nə yerdədir?
Ətraflı
- Onu layihə reallaşanda açıqlayacayıq. Reallaşmasa, bunun açılmasının mənası yoxdur. Həmin qüvvələr də hökumətdə təmsil olunacaqlar. Amma bütün hallarda Azərbaycanda ağlı başında olan hər kəs dərk edir ki, milli qüvvələr hakimiyyətdə, idarəetmədə yer almamış Azərbaycan daha böyük uçurumlara sürüklənə bilər.
"Bizim birincilik iddiamız yoxdur, etimad olacaqsa, bu, ayrı məsələ, kifayət qədər resursumuz var"
- Milli Etimad Hökuməti kimin rəhbərliyi altında fəaliyyət göstərəcək?
- Bu, artıq rəsmi strukturdur. Prezident və milli qüvvələr bir yol xəritəsi imzalayır. Hökumət müəyyən olunur, orada vəzifələr bölünür. Kimi Baş nazir, kimi nazir və s. Bunlar texniki məsələlərdir. Əsas bunun reallaşmasıdır, kimin hansı vəzifədə olmasının bizim üçün əhəmiyyəti yoxdur. Etimadlı insan müvəqqəti olaraq ağır yükün altına girəcək və hamının qəbul edəcəyi bir nəfər olacaq. Çox da inanmaq istərdim ki, bu baş tutsun. Amma indidən bizi ən çox parçalayan "Mən birinciyəm, zəhmət çəkib mənə birləşsinlər”, "hamı gəlib bizim saqqalın altından keçsin” və s. deyimləridir.
- AMİP lideri Etibar Məmmədovun koalisiya yaratması və bir çox partiyaların orada birləşməsi məsələsi ortaya düşən kimi siyasi arena çalxalandı, hamı bir-birinə dəydi. Orada təmsil olunacağı deyilən partiya sədrləri "biz birinciyik”, "mən heç kimin rəhbərliyi altında işləmərəm”, "onlar bizə birləşsin” deyə AMİP-ə "üsyan” etdilər. HƏP-in belə "qiyam”la üzləşəcəyi Əli İnsanovu qorxutmur?
- Partiyanın sədri Əli İnsanov kifayət qədər diqqət mərkəzindədir, uzun zaman da bunun haqqında fikirlər səslənəcək. Amma partiyada mövqe belədir - birincilik və axırıncılıq davamız yoxdur. Azərbaycan dövlətinin var olması və milli maraqlarımız var. Bizim üçün partiyanın balaca və böyük olması deyil, onun başında dayanan rəhbərin Azərbaycan cəmiyyətindəki çəkisi çox önəmlidir. Bizim birincilik iddiamız yoxdur, etimad olacaqsa, bu, ayrı məsələ, kifayət qədər resursumuz var. Həmin resurslarla Azərbaycana fayda verərik.
- Deyək ki, Etimad Hökumətini qurdunuz, amma bir də ruhdan düşən, müxalifətə qəti inamı qalmayan, mitinqlərə çıxmayan narazı elektrotat var... İtmiş bir inamı necə bərpa edəcəksiniz?
- Çoxlarının inanmadığı layihə reallaşsa, bu, cəmiyyətdə inamı itmiş insanlara stimul verəcək. Millətimiz dava istəmir, sabitlik istəyir. Mən bu milləti çox yaxşı tanıyıram. Bu millət haqq olan bir yerə canını qoymağa hazırdır. Bu baxımdan problem olmayacaq. Bu layihənin reallaşması üçün Prezidentin siyasi iradəsi çox önəmlidir. Əgər bu reallaşmasa, məsuliyyət bizim olmayacaq, əks tərəfin olacaq. İstəyirik ki, hakimiyyətdaxili savaşların zərbələrini dərk edək. Əgər layihə reallaşsa, bu, inqilabi yenilik olacaq.
