“Psixoloji üstünlüyümüzü qorumaq üçün qətiyyən güzəştə getməməliyik. Hətta bir santimetr torpağa görə Ermənistana müharibə də elan edə bilərik. Biz öz qətiyyətimizi Ermənistanla yanaşı, dünyaya da göstərməliyik ki, güzəştə getməyəcəyik və güzəşt olmayacaq. Hər kəsə o mesajı verməliyik ki, yeri gəlsə, antiterror əməliyyatlarına başlayarıq, Ermənistana müharibə elan edib sərhədlərimizi bərpa edərik. Bu qətiyyət, birlik və siyasi iradə bizdə var”.
Ağ Partiyanın sədri Tural Abbaslının Teleqraf.com-a müsahibəsini təqdim edirik:
- Xarici təzyiqlərin olduğu bir vaxtda Azərbaycan siyasi iradə nümayiş etdirərək erməni terrorçularını mühakimə edir. Təzyiqlər bu prosesi dayandıra bilərmi?
- Biz hər sahədə - istər diaspor, istər diplomatiya, istərsə də digər sahələrdə mübarizəmizi davam etdirməliyik. Bu təzyiqlərə qarşı təsirli addımlar atmaq lazımdır. Təbii ki, biz hər tərəfdən Ermənistanla mübarizə aparırıq: həm sərhədlərimizi müəyyən etməyə, həm təxribatların qarşısını almağa və təhlükəsizliyimizi təmin etməyə çalışırıq – digər yandan da, ermənilərə himayədarlıq edən dünya ilə vuruşuruq. Biz erməniləri himayə edənlərin üzərində düşünməliyik. Yəni beynəlxalq siyasətdə də, özünümüdafiədən hücum siyasətinə keçməliyik.
Erməni lobbisinin üstünə getməliyik. Bura Fransa, ABŞ, Rusiya və digər ölkələrdəki erməni lobbiləri daxildir. Düşünürəm ki, erməni diasporu və lobbisinin apardığı kampaniyalara qarşı özünümüdafiədən hücum mövqeyinə keçməliyik.
Erməni lobbisi və diasporunun güclü olduğu Fransa, ABŞ, Rusiya, Hollandiya və sair kimi dövlətlərə özümüzə inandırmağı bacarmalıyıq. Məsələn, bunun üçün Fransanın siyasi partiyaları ilə təmaslar qurmaq olar. Yaxın günlərdə YAP-la Türkiyənin hakim partiyası (AKP) arasında belə təmaslar quruldu. Bunu Avropanın aparıcı dövlətləri ilə də etmək olar.
- Ermənistan cidd-cəhdlə Azərbaycana sərhədlərini müəyyənləşdirməsinə mane olmağa, xarici ölkələri də buna cəlb etməyə çalışır. Bu proseslə bağlı proqnozunuz nədir?
- Hərdən erməni hərbçiləri ərazilərimizə girməyə cəhdlər edirlər, əsgərlərimiz də onları təpiklə qovur. Ermənistana sual vermək lazımdır ki, sən 30 ildir işğalda saxladığın Qarabağı əldən çıxardın, bəs indi bu məsələ - 300-400 metrlik torpaq sənin üçün niyə “prinsipial” olub?
Əslində ermənilər başa düşürlər ki, burada söhbət 1-2 metr torpaqdan yox, psixoloji savaşdan gedir. Ermənilər bununla həm öz cəmiyyətlərinə, həm də Azərbaycana göstərmək istəyirlər ki, “biz hər santimetr uğrunda mübarizə aparırıq”. Bununla guya məğlub olmadıqlarını göstərməyə çalışırlar. Halbuki onlar kilometrlərlə işğal etdiyi əraziləri əldən çıxarıblar. İndi də guya "hər qarış uğrunda döyüşürlər”.
Biz bu məsələdə qətiyyən geri durmamalıyıq, bir santimetr də geri çəkilməməliyik. Çünki biz qalib dövlət, qalib ordu, qalib xalqıq. Buna görə də, ermənilərin psixoloji durumu dəyişdirməyə hesablanmış addımlarını da nəzərdən qaçırmamalıyıq, bunları doğru qiymətləndirməliyik.
Psixoloji üstünlüyümüzü qorumaq üçün qətiyyən güzəştə getməməliyik. Hətta bir santimetr torpağa görə Ermənistana müharibə elan edə bilərik. Biz öz qətiyyətimizi Ermənistanla yanaşı, dünyaya da göstərməliyik ki, güzəştə getməyəcəyik və güzəşt olmayacaq. Hər kəsə o mesajı verməliyik ki, yeri gəlsə, antiterror əməliyyatlarına başlayarıq, Ermənistana müharibə elan edib sərhədlərimizi bərpa edərik. Bu qətiyyət, birlik və siyasi iradə bizdə var.
- Bu proses də erməni təxribatları ilə müşayiət olunur. Sizcə, bu təxribatlar davamlı olsa, antiterror əməliyyatları yenidən başlaya bilərmi?
- Mesaj konkret belə olmalıdır ki, təxribatlar olsa, antiterror əməliyyatlarına başlayıb terror yuvasını neytrallaşdıracağıq. Yaxud belə bir mesaj verə bilərik ki, sərhədlərimizə bir də müdaxilə olsa, bunu Ermənistan tərəfdən müharibə elanı kimi qəbul edəcəyik. Gələcəkdə belə halların qarşısını almaq üçün addımlar indidən atılmalıdır. Yersiz yumşaqlıq daha böyük problemlər yarada bilər.
Prezident İlham Əliyev müharibə dövründə açıq şəkildə bildirdi ki, Ermənistan işğal etdiyi ərazilərimizdəki qüvvələrini çıxarmaq üçün konkret tarix və qrafik versin, əməliyyatlar dayandırılsın. Ermənistandan tələb olundu ki, rayonların qaytarılması üçün konkret cədvəl ver. İndi də elə olmalıdır.
Ermənilərdən konkret tarix tələb olunmalı, ardından da lazımi addımlar atılmalıdır. Yaxın zamanlarda Azərbaycan ordusu 15 günlük antiterror təlimləri keçirdi. Həmin vaxt ermənilər quzuya dönmüşdülər, çünki bu onlara bir mesaj idi. Bütün dünyaya mesaj verməliyik ki, tələblərimiz yerinə yetirilməsə, hər an müharibəyə başlaya bilərik.
- Rusiya Qarabağ məsələsində olduğu kimi, bu prosesdə də vasitəçiliyə səy göstərir. Rusiyanın buradakı iştirakı prosesin uzanmasına səbəb olmayacaqmı?
- Bu, nəinki prosesin uzanmasına, hətta dərinləşməsinə səbəb olacaq. Ruslar ora gəlsələr, bu məsələnin dalana dirənməsi üçün əllərindən gələni edəcəklər. Rusiya 30 ilə yaxındır ATƏT-in Minsk qrupunun həmsədri kimi, guya münaqişənin həllinə çalışırdı, əslində isə Ermənistana pulsuz silah verirdi. Çünki Ermənistanla güc balansının Azərbaycanın xeyrinə pozulmasını istəmirdi. Balans pozulanda da tərəflərdən biri güclü olana güzəştə getməyə məcbur olur.
Rusiya Azərbaycanın qarşısında zəif duruma düşməməsi üçün Ermənistan ordusuna milyardlarla pul xərclədi, silah-sursat verdi. Ona görə belə edirdi ki, Ermənistan Azərbaycanla eyni gücdə olsun və bu münaqişə uzansın. İndi də imkan verməməliyik ki, Rusiya hansısa formada sərhədlərin müəyyənləşdirilməsi prosesində iştirak etsin.
Biz suveren dövlətik, məsələlərimizi özümüz həll edə bilirik. Ərdoğan demiş, öz göbəyimizi özümüz kəsməliyik. Yəni Ermənistanla problemləri öz aramızda həll etməliyik. İndi Ermənistan kimisə öz sərhədlərini qorumağa dəvət edirsə, bu onların öz işidir.
- Ermənistan daxilində də maraqlı gəlişmələr gedir. Sabiq prezident Robert Köçəryan özündən əmin danışır, deyir ki, seçkilərin qalibi o olacaq. Bunun üçün Köçəryanın imkanları nə qədərdir?
- Düşünürəm ki, Köçəryanın nə legitim, nə də digər yollarla hakimiyyətə gəlməsi mümkündür. Bunun üçün Köçəryan nə xalqın legitim səsini ala biləcək, nə də “məxməri inqilab”la bunu edə bilər. Köçəryan bu resurslarını çoxdan tükədib. Sərkisyanın özü də... Erməni xalqı onlara nifrət edir, heç vaxt onları yenidən hakimiyyətə gətirməz.
İndi Rusiyanın orbitində olan hansısa qüvvələr Köçəryan və Sərkisyana dəstək verirlər, amma bu dəstək də məhduddur. Rusiyanın özü də Sərkisyan və Köçəryanın güclənməsində maraqlı deyil. Rusiya onların qalib gəlməyəcəyini bilir. Potensial qalibin Paşinyan olduğunu bildiyi üçün gərgin olan münasibətləri daha da gərginləşdirmək istəmir.
Rusiya üçün Qərbin layihəsi olan Paşinyanı əl meymununa çevirdikdən sonra onunla işləmək daha rahatdır, nəinki dünyanın avtoritar və qatil kimi tanıdığı Sərkisyan və ya Köçəryanla. Əslində, Paşinyan bu gün Rusiyanın dediyindən kənara çıxa bilməz. Çünki tam olaraq Rusiyadan asılıdır. Bir sözlə, düşünmürəm ki, Ermənistanda Paşinyandan başqa hakimiyyətə gəlmək üçün kiminsə şansı var.
Mənə elə gəlir ki, biz Ermənistanda kimin hakimiyyətə gəlib-gəlməyəcəyi məsələsinə lazımından artıq diqqət ayırırıq. Qənaətimə görə, Ermənistanda kimin hakimiyyətə gəlməsindən asılı olmayaraq, bu günki siyasi kurs dəyişməyəcək. Bu, mümkün deyil.
Ermənistan elə bir hərbi gücə malik deyil ki, yenidən müharibə etsin, Rusiya və ya Avropaya qarşı çıxsın. Yəni Köçəryanın özü seçilsə, nə dəyişəcək ki?.. Paşinyanın özü olsun, heç nə dəyişməyəcək. Buna görə də, Ermənistanda kimin hakimiyyətdə olub-olmaması Azərbaycan üçün maraqlı olmamalıdır, özləri bilər.
