Prezident İlham Əliyev Hacıqabulda Şirvan-Muğan qrup su kəmərinin təməlqoyma mərasimində çıxışı zamanı bildirdi ki, son illər ərzində ölkəmizdə su və kanalizasiya layihələri icra edilir, bu proses geniş vüsət alıb: "Vəzifə qoyulmuşdur ki, bir neçə ildən sonra Azərbaycanın bütün su və kanalizasiya layihələri başa çatsın. Buna böyük ehtiyac var idi. Çünki bölgələrdə ümumiyyətlə su qıtlığı daim hökm sürürdü, kanalizasiya layihələri ümumiyyətlə yox idi.
Ancaq görülmüş tədbirlər nəticəsində və qəbul edilmiş proqramlar çərçivəsində bu layihələrin icrası nəzərdə tutulur. Bu işlərin içərisində infrastruktur layihələri birinci yerdədir və son illərdə bu istiqamətdə böyük işlər görülüb". Ölkə rəhbərliyi səviyyəsində su və kanalizasiya sistemlərinin ən mükəmməl şəkildə qurulmasına böyük diqqət göstərilir. Bu məqsədlə dövlət büdcəsindən "Azərsu" Açıq Səhmdar Cəmiyyətinə (ASC) ayrılan vəsaitlər bunu təsdiq edə bilər. Təəssüf ki, sözügedən qurumun sədri Qorxmaz Hüseynov və onun yüksək vəzifə ilə təmin etdiyi bəzi qohumları "Azərsu"nun fəaliyyətini iflic hala salıb. Son illər əhalinin içməli su ilə təminatının yaxşılaşdırılması əvəzinə, vətəndaşlar daha böyük problemlərlə üzləşmək məcburiyyətində qalıblar. Bu isə o deməkdir ki, ASC sədri ölkə başçısının onun qarşısında qoyduğu vəzifələri layiqincə icra edə bilmir.
6 milyona salınan park niyə çöküb?
"Azərsu" Açıq Səhmdar Cəmiyyətinin 2011-ci ildən, yəni Qorxmaz Hüseynovun sədr postuna təyin edilməsindən bu günə qədər olan fəaliyyəti barədə araşdırmalarımız davam edir. Xatırladaq ki, araşdırmaların bir hissəsini ötən saylarımızda dərc etmişik. Əldə etdiyimiz yeni məlumatlara görə, adıçəkilən dövlət qurumu tərəfindən həyata keçirilən daha bir layihədə ciddi qanun pozuntularına yol verilib. Bildiyiniz kimi, keçən ilin dekabr ayında prezident İlham Əliyev Bakıda "Azərsu" Açıq Səhmdar Cəmiyyətinin "+82 Qərb" su anbarının ərazisində yeni salınan "Yasamal" parkının açılışında iştirak etdi. Qeyd edək ki, parkın açılışında "Azərsu" ASC-nin sədri Qorxmaz Hüseynov parkın tikintisi ilə bağlı dövlətimizin başçısına məlumat verib. Çünki parkın qurulması xərcləri məhz "Azərsu" tərəfindən çəkilib. Rəsmi qaydada açıqlanmasa da, təxminən 6 milyon manatlıq vəsaitin xərcləndiyi iddia olunur: "Sözügedən park "Azərsu" ASC-nin "+82 Qərb" su anbarının ərazisində, Yasamal rayonunun Akim Abbasov və Zahid Xəlilov küçələrinin kəsişməsində salınıb. Park salınarkən su anbarlarının təhlükəsizliyi üçün əvvəlcədən bütün texniki tədbirlər görüldüyü iddia olunsa da və ən əsası bu barədə "Azərsu" ASC-nin sədri Qorxmaz Hüseynov tərəfindən ölkə rəhbərliyinə məruzə olunsa da, faktlar bunun tam əksini söyləyir. Aydın olur ki, sədr həqiqətə uyğun olmayan məlumatlar açıqlayıb.
Yeni salınmış park əslində su anbarının üzərində qurulduğundan və parkın altında böyük gölməçənin qalması səbəbindən xərclənən pulların həcminə baxmayaraq, qısa müddətdən sonra fəsadlar dərhal özünü göstərib. Açılışdan qısa müddət sonra parkın böyük bir hissəsi altının gölməçə olması səbəbindən çöküb". Məlumatlı mənbənin iddiasına görə, parkın tikintisi üçün ayrılan büdcə vəsaitləri məqsədyönlü şəkildə istifadə edilmədiyi üçün bu tip fəsadlar üzə çıxıb. Qorxmaz Hüseynov isə məharətlə parkın çökməsi məsələsini ictimaiyyətdən gizlətməyi bacarıb. Biz isə tam əminliklə deyə bilərik ki, ASC rəhbərinin iştirakı ilə həyata keçirilən qanundan kənar işlərin üstü nə vaxtsa açılacaq və o buna görə cavab verməli olacaq.
Arzuman Abbasovun işində dəfələrlə nöqsan aşkar edilib, amma hələ də vəzifədədir
"Azərsu"da problem yaradan şəxslərdən biri də Əsaslı Tikinti Departamentinin rəisi Arzuman Abbasovdur. Deyilənə görə, ASC-nin bu gün öz təyinatı üzrə maksimum gücü ilə işləyə bilməməsinin əsas səbəbkarlarından biri də bu şəxsdir. Araşdırmalar göstərir ki, sözügedən məmur indiyə qədər ASC-də iki rəis yola salıb. "Azərsu"ya Oqtay Əsədov və Nizaməddin Rzayevin rəhbərliyi dövrlərində də o rəis işləyirdi. Qorxmaz Hüseynov qurumun rəhbəri təyin olunandan sonra departament rəhbəri hansısa sehrli əllərin köməyi ilə postunda qalmağı bacarıb. Etibarlı mənbənin dediyinə görə, yuxarılarda kimlərəsə arxayın olan məmur qanunlara qarşı itaətsizlik sərgiləyərək rəhbər vəzifə tutduğu cəmiyyətdə xoşagəlməz işlərə əl atır: "Hesablama Palatasının 2012-ci ilə dair hesabatında ASC-də bir sıra korrupsiya hallarına yol verildiyi üzə çıxmışdı. Hazırlanan sənədə görə, "Azərsu" tərəfindən 2010-cu il üzrə dövlət əsaslı vəsait qoyuluşu hesabına tikintisi nəzərdə tutulmuş layihələrə dair təklif olunmuş büdcə proqnozlarının texniki hesablamaları aparılmayıb. Bu layihələr dövlət poqramları ilə tam əlaqələndirilmədən təqdim edilib. Bəzi obyektlər üzrə inşaat işlərinin birbaşa satın alınması müqaviləsi bağlansa da, müqavilənin dəyəri podratçı təşkilatlar tərəfindən təqdim edilən iş həcmləri və qiymət cədvəli əsasında müəyyən edilib. Yəni departament rəisi büdcədən ayrılan vəsaitlərin böyük bir hissəsini başqa məqsədlər üçün istifadə edib. Üstəlik, qurumda sədr dəyişikliyi reallaşandan sonra öz əməllərindən əl çəkməyib.
O öz maraqlarını hər şeydən üstün tutaraq həmin vəsaitlərin təyinatı üzrə sərf edilməsinə şərait yaratmayıb. Bunun nəticəsidir ki, hazırda vətəndaşların əksəriyyəti içməli su ilə bağlı sıxıntı yaşayır". Maraqlıdır ki, cəmiyyətin fəaliyyətini bərbad hala salan rəislə bağlı indiyə kimi heç bir ölçü götürülməyib. Deyilənə görə, hətta sədr belə ona söz keçirə bilmir. Mənbəmiz deyir ki, neçə illərdir rəis vəzifəsində çalışan Arzuman Abbasov qeyri-qanuni yollara baş vurmaqla maliyyə imkanlarını xeyli yaxşılaşdırıb. Onun nəzarətindəki biznes obyektləri haqda isə növbəti sayımızda geniş məlumat verəcəyik. Onu da bildirəcəyik ki, Arzuman müəllimin qardaşının həyat yoldaşı ermənidir və o ermənilərlə biznes elaqələrində bulunur.
Qorxmaz müəllim, əgər şəffaflıqdan söhbət edirsinizsə, gedin məmurların, varlı şəxslərin imarətlərindən də su pulu yığın
Heç kimə sirr deyil ki, hazırda ölkə əhalisinin içməli su ilə təminatı ürəkaçan səviyyədə deyil. Başqa sözlə desək, büdcədən ayrılan vəsaitlərlə həyata keçirilən tədbirlərin arasında ziddiyyət var. Bu isə "Azərsu"da mövcud olan yeyinti və mənimsəmə halları ilə bağlıdır. Gəlin açıq danışaq. Əgər ASC-nin rəhbər vəzifəli şəxsləri dövlət layihəsi üçün nəzərdə tutulan vəsaitin bir hissəsinə əl qoyursa, onda hansı keyfiyyətdən danışmaq olar? Ölkə rəhbərliyi qarşıya vəzifə qoyur ki, filan işlər filan qədər pulla həyata keçirilməlidir. Qorxmaz Hüseynov və ətrafındakı bəzi şəxslər isə həmin vəsaitlərdən öz bildikləri qaydada istifadə edirlər. Ki, nəticəsi göz qabağındadır. "Azərsu" tərəfindən icra edilən layihələrin əksəriyyəti özünü doğrultmayıb. Sədr vəzifəyə yeni təyin olunanda Bakının və rayonların kanalizasiya problemini qısa vaxt ərzində həll edəcəyinə söz vermişdi. Aradan 4 il vaxt keçsə də, ortada bir şey yoxdur. Olan isə dövlətin büdcəsinə, xalqa olur. Bu insanlar sanki qəsdən vətəndaşlara problem yaradırlar. "Azərsu"nun rəhbərliyindlə yer alan şəxslərin gücü ancaq sadə camaata çatır. Sıravi insanlar su pulunu bir gün gecikdirən kimi qurumun əməkdaşları onların suyunu kəsir. Halbuki, sədrin özünün və qohumlarının villası olduğu "Vorovski"də, Teymur Əliyev küçəsindəki "Milyonçular Məhəlləsin"də yaşayan insanların külli miqdarda borcu olduğu halda, suları heç vaxt kəsilmir. Nəyə görə? Onların sadə vətəndaşlardan nəyi artıqdır? Qorxmaz müəllim, əgər şəffaflıqdan, haqq-ədalətdən söhbət edirsinizsə, gedin məmurların, varlı şəxslərin imarətlərindən də su pulu yığın. Həmin şəxslərin borcunu yetim-yesirin belinə yıxmayın. Qanun təkcə kasıb üçündür? Demirsiniz ki, bir gün bu insanlar hər şeydən bezib sizə ən sərt formada etirazını bildirər? Axı nəyə görə insanların hissləri ilə oynayırsınız? Bizə verilən məlumatda deyilir ki, ASC sədrinin "Vorovski"də, daha dəqiq desək, Daxili Qoşunların Baş İdarəsi ilə üzbəüz yerləşən villasında suyun verilişində heç bir problem yoxdur. Hətta bütün ölkənin suyu kəsilsə də, bu villada daim su olar. Ümumiyyətlə, görəsən həmin villanın su sayğacı varmı? Qorxmaz müəllim, siz nəyi qoyub, nəyi axtarırsınız. Sizə yaxın olan insanların, məsələn "Birləşmiş Sukanal" MMC-nin sədri Etibar Məmmədovun, müavinləriniz Teyyub Cabbarovun, Köçərli Həsənovun, Binəqədi rayon Sukanal İdarəsinin rəisi Əhliman Mansurovun, Arzuman Abbasovun, Yaşar Kəlbiyevin, qardaşınız Məhəmməd Hüseynovun, qayınınız Namiq Cəbrayılovun və digərlərinin paytaxt ərazisində dəyəri milyonlarla ölçülən imarətləri var. Görəsən, onlar bahalı mülklərə hansı pullarla sahiblənib. Bax bu sualın cavabını şəxsən sizdən soruşuruq. Çünki hamısı siz sədr vəzifəsinə keçəndən sonra əmələ gəlib. Zəhmət olmasa, buyurun cavab verin.
Qorxmaz Hüseynovun DİN-ə qarşı savaşı nədən qaynaqlanır?
Araşdırmalara görə, Qorxmaz Hüseynov zaman-zaman bəzi yüksək vəzifəli şəxslərə savaş elan edib. Məsələn, keçən il "Azərsu" ASC Daxili İşlər Nazirliyinin tabeliyində olan iki quruma qarşı məhkəmə iddiası qaldırıb. Cəmiyyətin Daxili Qoşunlarla Polis Akademiyasına qarşı qaldırdığı borc tələbindən bəhs edən şikayətlərinə birinci məhkəmə instansiyalarında baxılıb. ASC Daxili Qoşunlardan istifadə etdiyi su və kanalizasiya borcu olaraq ümumilikdə 45830 manat pul tələb edib. Daxili Qoşunların Baş İdarəsinin hesabından tutulması tələb olunan bu məbləğə su təchizatı sistemindən su buraxılması və kanalizasiya xidmətlərinə görə 38822,51 manat məbləğində əsas borc, 6987,60 manat məbləğində penya və 20 manat dövlət rüsumu daxildir. Daxili İşlər Nazirliyinin Polis Akademiyasına qarşı verdiyi digər şikayət isə Bakı Apellyasiya Məhkəməsində hakim Səriyyə Seyidovanın sədrliyi ilə araşdırılıb. Hakim Səriyyə Seyidova isə mayın 20-də birinci məhkəmə instansiyasının qətnaməsini qüvvədə saxlayan qərar qəbul edib. 80 min manata yaxın borc mübahisəsi üzrə çıxarılan bu qətnamə "Azərsu" ASC-ni qane etməyib. Dövlət qurumlarının bir-birini məhkəməyə verməsi nadir hallarda rast gəlinən məsələdir. Görünür, Qorxmaz Hüseynov DİN-in tabeliyindəki qurumları məhkəməyə verməklə Daxili Qoşunların Baş İdarəsində kadrlar şöbəsinin müdiri işləyən qardaşı Nəsir Hüseynovun daha yüksək posta təyinatına nail olmaq istəyir. Yoxsa o qardaşının vəzifə tutduğu Daxili Qoşunların Baş İdarəsini nəyə görə məhkəməyə versin ki. Adama deməzlərmi ki, "Azərsu" dövlətə olan vergi borcunu ödəmədiyi halda, nə üzlə başqalarından su və kanalizasiya pulunu tələb edir. Deyərlər, lap o tərəfə də keçərlər. Bildiyimizə görə, digər dövlət qurumlarının da ASC-yə borcu var. Buna rəğmən, onların heç biri məhkəməyə verilməyib.
Müxalifətçilərin məskəninə çevrilən "Xudafərin" şadlıq sarayı Qorxmaz Hüseynovundur?
Əldə etdiyimiz başqa bir məlumata görə, "Azərsu"da çalışan işçilərin bir çoxunun "paket maaş"ı ləğv edilib. Bu barədə redaksiyamıza danışan mənbənin sözlərinə görə, qərar bir neçə ay öncə verilib: "Paket" sisteminin ləğvini maliyyə problemlərinin olması ilə əlaqələndirdilər. Buna baxmayaraq, sədrin "Azərsu"da işləyən yaxın qohumları hələ də "paket" alırlar. Maliyyə problemi mövcuddursa, onların "paket"i niyə ləğv edilmir? Demək ki, bu bəhanədir. Ümumiyyətlə, ASC-də kim sədrə yaxındırsa, onun qohumudursa, ona "yaşıl işıq"dır. Burda "paket" maaşları vəzifəyə, işə görə deyil, şəxsə görə də tətbiq etmək mümkündür. Yəni aşağı vəzifədə olub, daha yüksək "paket" almaq mümkündür". Araşdırmalar zamanı o da məlum oldu ki, paytaxtın Nizami rayonunun ərazisində yerləşən "Xudafərin" şadlıq sarayı və eyniadlı hotel də söhbətini etdiyimiz məmura məxsus imiş: "Bu şadlıq sarayı və hotel sədrin biznesinin ən gəlirli sahələri hesab edilir. "Xudafərin" şadlıq sarayında toy sarıdan heç bir sıxıntı olmur. Burda toy edənlərin əksəriyyəti isə müxalifətlə bağlılığı olan insanlardır. İsa Qəmbər və müxalifətin digər tanınmış simalarının qohumlarının toyu məhz burda təşkil edilib. Şadlıq evinin kağız üzərində müdiri Səyavuş Əsgərovdur. O cəmiyyət sədrinin biznesinin bir hissəsini idarə edir. "Xudafərin" hotelinin də ona məxsus olduğu bildirilir. Burda hansı işlərin cərəyan etməsi isə çoxlarına gün kimi aydındır". Hələ bu harasıdır ki, Qorxmaz müəllim. Tükürpədən faktlar bundan sonra olacaq. Növbəti sayımızda ASC sədrinin "Ekol Mühəndislik Xidmətləri" Qapalı Səhmdar Cəmiyyətində baş direktorun istehsalat üzrə müavini işləyən qardaşı Məzahir Hüseynov, Qorxmaz Hüseynovun oğlu Araz Hüseynovun xarici ölkələrə hansı işlər görməsi üçün getməsi, nə qədər xərcə düşməsi və Yusifəlinin atasının yas mərasimində hansı müxalifətçilərin iştirak etməsi barədə şok faktları açıqlayacağıq. Bizi izləməkdə davam edin.
Qəzət çapa gedərkən öyrəndik ki, Binəqədi Sukanal İdarəsinin rəisi Əhliman Mansurovu işdən azad ediblər. Bu haqda gələn sayımızda oxuyacaqsınız.
Yazıda adı qeyd olunan bütün şəxslərin cavab haqqını tanıyırıq.
"Gündəlik Bakı"nın araşdırma qrupu
DİA.AZ-dan: Bu arada qeyd edək ki, hələ iki il əvvəl Qorxmaz Hüseynovun "nurçu" cameəsinə aid türkiyəli iş ortaqlarından biri "Azərsu" şefi barəsində maraqlı bir ifadə işlətmişdi: "Fətullah Gülən hocamız Qorxmaz bəylə qürur duyur"... Olsun. Amma bir məsələ bizə görə daha önəmlidir. Qirxmaz Hüseynova Fətullah Gülənin yox, Azərbaycan xalqının rəğbəti daha çox önəm kəsb etməlidir. Çünki onu "Azərsu" rəhbərliyinə təyin edən prezidentimizin də ümidləri məhz bundan yana olub...
