Məlumdur ki, 09 oktyabr 2018-ci il tarixdə Nazirlər Kabinetinin 2018-ci ilin doqquz ayının sosial-iqtisadi inkişafının yekunlarına və qarşıda duran vəzifələrə həsr olunmuş geniş iclası keçirilir və həmin iclasda Prezident İlham Əliyev paytaxt Bakı şəhərində, həmçinin digər şəhər və rayonlarda həyata keçirilən qanunsuz tikinti işləri ilə bağlı iclasda iştirak edənlərə ciddi tapşırıqlarını verir. Ölkə rəhbəri tikinti işləri ilə bağlı Sərəncam imzaladığını bir daha iclas iştirakçılarının diqqətinə çatdırır və onu da vurğulayır ki, “Tikinti işləri Dövlət Şəhərsalma və Arxitektura Komitəsinin icazəsi olmadan həyata keçirilə bilməz. Əgər kimsə verilmiş qaydaları pozarsa, o halda qaydanı pozanlar həm cinayət məsuliyyətinə cəlb olunacaqlar, həm də qanunsuz inşa olunan tikililər dərhal söküləcək”. Cənab Prezidentin tikinti işləri ilə bağlı imzaladığı Sərəncamdan, həmçinin Nazirlər Kabinetində keçirilən iclasda verdiyi tapşırıqlardan sonra hər kəs düşünürdü ki, ölkəmizin tikinti sahəsində baş alıb gedən qanunsuzluqlara son qoyulacaq, eyni zamanda ictimai nəzarət daha da artırlacaq.
Bundan əlavə, 11 mart 2022-ci il tarixdə isə Bakı Şəhər İcra Hakimiyyətində (BŞİH) geniş müşavirə keçirilir və qanunsuz tikililərlə bağlı icra başçılarına ciddi xəbərdarlıqlar da olunur. Yəni, Bakı şəhəri ərazisində qanunsuz tikintilərlə bağlı vəziyyət və bu kimi halların qarşısının alınması məsələləri icra hakimiyyəti başçılarının, müvafiq təsərrüfat strukturları rəhbərlərinin, Dövlət Şəhərsalma və Arxitektura Komitəsi yanında Bakı Şəhər Memarlıq və Şəhərsalma Baş İdarəsi və Fövqəladə Hallar Nazirliyinin nümayəndələrinin iştirakı ilə keçirilən müşavirədə geniş müzakirə olunur. Müşavirədə BŞİH-nin başçısı Eldar Əzizov, Prezident İlham Əliyevin Bakı şəhərində qanunsuz tikintilərlə bağlı bildirdiyi iradlar, həmçinin digər neqativ halların qarşısının alınması yöndə verdiyi tapşırıqlar barədə müşavirə iştirakçılarını ətraflı məlumatlandırır. Müşavirədə Eldar Əzizov qeyd edir ki, “Son illər qanunsuz tikililərlə bağlı RİH-nin başçılarına mübarizə tədbirlərinin gücləndirilməsi məqsədilə tapşırıqlar verilsə də, bəzi icra başçıları, onların aparatının məsul əməkdaşları bu məsələni diqqətdə saxlamayıblar və hətta onlar qanunsuz tikintilərin geniş vüsət almasına şərait də yaradırlar”.
Bütün bunlara baxmayaraq, bu gün də Bakı şəhəri, Yasamal rayonu ərzisində həyata keçirilən tikinti işləri ilə bağlı qol qoyulan qanunsuzluqların əhatə dairəsini müəyyən etmək olduqca müşkül məsələdir. Məsələn, adicə bir faktı qeyd edək ki, Yasamal rayonu, Zivər bəy Əhmədbəyov küçəsi 6 e ilə Əli bəy Hüseynzadə küçəsinin kəsişməsində yerləşən obyektin sahibi Teymurov Fəxrəddin İbrahim oğlu Deryaz.az-ın əməkdaşına verdiyi açıqlamasında qeyd edir ki, “Obyektimizin zirzəmisində başqa bir obyekt fəaliyyət göstərir. Həmin obyektin sahibi xeyli vaxtdır ki, bizim obyektə məxsus giriş qapısının 2 metr hissəsini zəbt etmiş və orada özləri üçün əlavə sahə yaratmışlar. Bundan əlavə, obyektimizin giriş qapısını 3 metr hündürlüyündə dəmir konstruksiya ilə də bağlamışdır. Belə bir qanunsuzluq işləri ilə bağlı Bakı Şəhər İcra Hakimiyyətinə, Yasamal Rayon İcra Hakimiyyətinə, Fövqəladə Hallar Nazirliyinə, Dövlət Şəhərsalma və Arxitektura Komitəsinə, Bakı Şəhər Prokurorluğuna,Yasamal Rayon Prokurorluğuna və aidiyyatı üzrə digər dövlət qurumlarına həm yazılı, həm də şifahi formada şikayətlərimizi çatdırsaq da, təəssüflər olsun ki, indiyə kimi bu yöndə lazımi tədbir görülməmişdir.
Qeyd edim ki, bizim obyektin zirzəmisindəki obyekt sahibinin atdığı addımların varlığı səbəbindən, obyektimizin giriş qapısı tamamilə bağlanmışdır, ümumi görüntü məhdudlaşdırılmışdır, binanın ön hissəsinin görüntüsü də bağlanmışdır. Bundan əlavə, həmin obyektin sahibi binanın çöl hissəsində, hansı ki, piyadaların gəlib-keçdikləri səkinin 2 metr hissəsini də zəbt etmişdir. Ümumiyyətlə, layihə planında zirzəmidəki obyektə dair giriş qapısı nəzərdə tutulmayıb. Faktdır ki, görülən işlərə dair heç bir rəsmi sənəd yoxdur və bunların hamısı qeyri-qanuni işlərdir. Bəli, ünvanladığımız şikayətimizlə bağlı əraziyə baş çəkən Yasamal RİH Aparatının Əhməd adlı əməkdaşı da, görülən işlərin qeyri-qanuni işlər olduğunu bildirdi. Hal-hazırda obyek sahibi qeyri-qanuni tikinti işlərini davam etdirməkdədir. Dövlət Şəhərsalma və Arxitektura Komitəsi yanında Bakı Şəhər Memarlıq və Şəhərsalma Baş İdarəsi əməkdaşı da görülən işlərin qeyri-qanuni olduğunu, bu haqda Yasamal RİH Aparatı tərəfindən lazımi tədbirlərin görəcəyini vurğulasa da, hələ də həmin obyektin sahibinə bir kimsə “qaşın üstə qara var” demir, yaxud da deməyi bacarmır”. Bu da bir çox şübhələrin baş qaldırmasına yollar açır.
Bütün bunlar onu söyləməyə əsas verir ki, cənab Elşad Həsənovun icra başçısı olduğu Yasamal rayonu ərazisində, ələlxüsus Zivər bəy Əhmədbəyov küçəsi ilə Əli bəy Hüseynzadə küçəsinin kəsişməsində qanunsuz tikinti işlərinin davam etdirilməsi, həmçinin bəzi vəzifə sahiblərinin şəxsi maraqların təmin olunması, bu gün də Yasamal RİH Aparatının əməkdaşları üçün daha əhəmiyyətli addım hesab olunur.
Yasamal rayon İcra Hakimiyyətinin açıqlamasında bildirmişdi ki, qonşu, şikayətçi ilə ya razılaşmalı, ya da quraşdırdığı dəmir konstruksiyanı sökməlidir. Əks təqdirdə tikinti dayandırılacaq. Təssüf ki, cənab başçının dediyi sözlərdən bir həftə keçməsinə baxmayaraq nə qonşu, şikayətçi ilə barışıb, nə də ki, dəmir konstruksiya sökülüb. Əksinə, təmir- tikinti işləri davam etdirilir. Belə yerdə deyirlər ki, torbada pişik var.
Əgər bu belə olmasaydı, o halda ölkə rəhbərinin Bakı şəhəri ərazisində qanunsuz tikinti işlərinin qarşısının alınması ilə bağlı imzaladığı Sərəncamdan irəli gələn tələblərə lazımi səviyyədə əməl olunardı. Deməli, ….
Mövzuya qayıdacağıq.
Deryaz.az
