DİA.AZ: - “Korrupsiya və Cəmiyyət” qəzetinin baş redaktoru Məmməd Əhmədoğlu prezident İ.Əliyevə, Prezident Administrasiyasının rəhbəri R.Mehdiyevə, Milli Təhlükəsizlik naziri E.Mahmudova, H.Əliyev Fondunun prezidenti Mehriban xanım Əliyevaya, Neft Şirkətinin prezidenti R. Abdullayevə, “Şəffaflıq Azərbaycan” Korrupsiyaya Qarşı Mübarizə İB-nin sədri xanım R. Səfərəliyevaya, Avropa Şurasının Bakı ofisinin rəhbəri K.Qorokstopulosa, ATƏT-in bakı ofisinin rəhbəri K.Tarqaya, Avropa Birliyi Bakı ofisinin rəhbəri R.Kobiaya, ABŞ-ın Azərbaycandakı səfiri R. Mornigstara bə bir sıra qurumlara müraciət edib. Bir nüsxəsi də DİA.AZ-a daxil olan mrüaciətin mətnində deyilir:
“Biz, müstəqil mətbuat olaraq peşə borcumuzu yerinə yetirərək son illər adları korrupsiyada daha çox hallanan, insan hüquqlarını kobud formada pozan, ali rəhbərin fərman və sərəncamlarına zidd hərəkətlərə yol verən məmurlarımızın fəaliyyətini monitoriq edərək əldə olunan məlumatları aidiyyatı instansiyalara və ictimaiyyətə təqdim edirik. Apardığımız növbəti monitoriqdə “Azəriqaz” ASC-nin sədri Əkbər Hacıyevin, Bakı şəhər İcra Hakimiyyətinin başçısı H.Abutalıbovun və Suraxanı rayon İcra Hakimiyyətinin başçısı İlqar Abbasovun son illərdəki ölkə mətbuatında dəfələrlə yazılan qanunazidd hərəkətləri və dövlət başçısına qarşı göstərdikləri sayğısızlıqları barədə məlumat verməyi və seçki ərəfəsində lazımi tədbirlərin görülməsini xahiş edir və əvvəlcədən minnətdarlığımızı bildiririk.
1. “Azəriqaz” ASC-nin sədri Əkbər Hacıyev 1993-cü ildə 4 il müddətinə qurtardığı Sankt-Petrburq İnşaat –Mühəndislər İnstitutunun diplomunu (belə bir ali təhsil ocağı mövcud olmayıb) Azərbaycanda tanınması və şəhadətnamə alınması üçün nədənsə AR Təhsil Nazirliyinin Ekspert Qrupuna bu günədək təqdim etməmişdir. ( diplomun saxtalığının üzə çıxmasından ehtiyatlanmışdır)
“Neftyağ” zavodunda rəhbər olduğu 3 il müddətində Azərbaycanın digər regionlarından olan ixtisaslı kadrların əksəriyyəti( YAP üzvləri olan) ixtisasları uyğun olmayan Naxçıvan əsilli qohum- qardaşları ilə əvəz etmiş və həmin kadrları sonradan özü ilə bərabər “Azəriqaz” ASC-nə müxtəlif vəzifələrə gətirmişdir. Nəticədə bu sahədə aparılması nəzərdə tutulan islahatların heç biri indiyədək həyata keşməmişdir. Törətdiyi korrupsiya əməllərinin isə sayı-hesabı yoxdur.
2. Bakı şəhər İcra Hakimiyyətinin başçısı H.Abutalıbov- Bakı merinin son 13 ildə törətdiyi qanunazidd hərəkətləri barəsində ölkə KİV-i kifayət qədər məlumatı ictimaiyyətə təqdim etmişdir.Onun uzun illər törətdiyi qanunazidd hərəkətlər içərisində bir məsələnin özəl yeri vardır: Cənab prezidentin qəbul etdiyi və 2013-cü ilin yanvarın 1-dən qüvvəyə mindiyi yeni Şəhərsalma və Tikinti Məcəlləsini H.Abutalıbov öz korporativ maraqları naminə on minlərlə insanın bu mütərəqqi qanundan istifadə etməsinə qəsdən imkan vermir və nəticədə rüşvət verməyə imkanı olmayan minlərlə insanın hüquqları pozulur. Daha doğrusu, cənab Abutalıbov açıq-aşkar Dövlət başçısının siyatəsinə qarşı çıxır onu nüfuzdan salır.
3. Suraxanı rayon İcra Hakimiyyətinin başçısı cənab İlqar Abbasov Suraxanı rayonuna rəhbərlik etdiyi 8 il ərzində bol torpaq sahələri olan rayon ərazisini qanunsuz sərəncamlar verməklə imkanlı şəxslərə “hədiyyə” etmişdir. 20 iyun 2013-cü ildə İcra Hakimiyyəti başçısının müavininin qəbuluna gəlmiş Hövsan sakini, 80 yaşlı Sabir kişi yaşadıqları ərazidəki torpaqların kütləvi surətdə son illər Naxçıvanın Şərur rayonundan gələnlərə paylanmasına etriraz olaraq foyedə səs-küy qaldırmışdır.
1970-ci illərin əvvəllərində Bakı-Aeroprt yolunun sol tərəfində (316 saylı orta məktəb istiqamətində) Ulu öndər Heydər Əliyevin şəxsi təçəbbüsü və iştirakı ilə salınmış 6 ha meşə zolağı 2004-2013-cü illər ərzində Yasamal rayon sakinlərinin adından torpaq sahələrinin ayrılması xahişilə 1998-1999-cu il tarixlərində kiril əlifbasıilə yazılmış ərizələri nədənsə Suraxanı İcra Hakimiyyəti başçısının arxa tarixli saxta sərəncamları ilə fərdi ev tikintisi adı altında paylanmışdır. Amma bir məsələ unudulmuşdur ki, kiril əlifbasında yazılan ərizələr 2001-ci ilin yanvarın 9-dan sonra latın qrafikası ilə hazırlanmış möhürlərlə təsdiq edilmişdir. (halbuki, 2000-ci ildən sonra rayon İcra başçıları tərəfindən torpaqların hər hansı istifadəsi barədə sərəncam vermək səlahiyyəti yox idi və bu səlahiyyət yerli bələdiyyələrə verilmişdir.) Digər tərəfdən meşə zolağı dövlət torpağı olsa da ağacların hamısının məhv edilməsi hesabına yerli bələdiyyə sədri, Suraxanı İH-nin məsul işçisini qardaşı və digər məmurlar və onların ailə üzvlərinin adından yazılmış ərizələr əsasında bölüşdürülmüşdür. Qarabağ müharibəsi veterenları isə 20 ildə 1 kv.m torpaq ala bilmədiklərindən mətbuata verdikləri müsahibəyə görə torpaq uğrunda erməniyə qarşı vuruşmağa peşiman olublar.
İcra başçısı İ.Abbasovun fəaliyyəti qəzetlərdə sənədlər əsasında çap edilmiş faktlarla və Hesablama Palatasının tərtib etdiyi aktlarlaa göz qabağındadır.
Cənab İ. Abbasovun fəaliyyəti Cənab Prezidentin Nazirlər Kabinetində keçirdiyi son müşavirədə dedikləri ilə tam ziddiyət təşkil edir.
Hörmətli diplomatik nümayəndəliklərin rəhbərləri!
Artıq ikinci dəfədir ki, Sizlərə müraciət edərək ölkəmizdə insan haqlarına sayğısız yanaşan, ayrıseşkilik prizması ilə öz korporativ maraqları naminə minlərlə insanı sründürməçiliyə salan, adı dəfələrlə korrupsiyada hallanan məmurların monitorinqini keçirməklə əldə etdiyimiz nəticələri Sizlərə təqdim edirik. Biz mətbu orqan olaraq Sizlərdən xahiş edirik ki, hətta prezidentin ölkədə islahatların keçirilməsi istiqamətində verdiyi sərəncam və fərmanlara qarşı çıxan, ictimaiyyətdə dövlət başçısını öz əməllərilə nüfuzdan salan, insan haqlarını hər addımda pozan adları ölkə mətbuatında korrupsiyada hallanan adları qeyd edilən məmurlarımıza qarşı “Maqnitski qanunu”na uyğun olaraq sanksiya tətbiq edilməsini və beləliklə onların Avropa ölkələrinə girişinə məhdudiyyət qoyulması, bank hesablarının dondurulması xahiş olunur.
Hörmətli KİV rəhbərləri!
Dəyərli həmkarlarım, düşünürəm ki, müstəqil dövlətimizin qorunub saxlanması, cəmiyyətimizin sağlamlaşdırılması, tüğyan edən korrupsiyanın cüzi də olsa aradan qaldırılması istiqamətində ölkə mətbuatı öz peşə borcunu yerinə yetirərək müstəqil mövqeyini ortaya qoymağının zamanıdır.
Ölkəmizdə baş verən və davam etməkdə olan İqtisadi tənəzzülün, infilyasiyanın, işsizliyin, boşanmaların, cinayətlərin artımının, sosial ədalətsizliyin, talançılığın, quldurluğun, harınlığın hamısının bir səbəbi vardır-
korrupsiya. Vəzifəsindən süi-istifadə edərək “taksi sürücüsü” kimi aylıq planı hər vəclə yerinə yetirməyə məhkum olmuş korrupsioner dəstə özlərini planı yerinə yetirməkləri müqabilində cəzasızlıq mühitində yaşayacaqlarına zəmanət almış ünsürlər kimi etdikləri qanunsuz hərəkətlərilə bütün qırmızı və qara xətti keçmişlər. Ölkə mətbuatının “satqın” hissəsi belə ünsürlərə qarşı mübarizə aparmaq kimi vəzifə borclarını unutmuşlar. Yalnız vicadının səsilə qələmini öz xalqının xidmətinə həsr etmişlərin sayəsində müsbət nəyəsə nail olmaq olar.
Əsas sosial bəla hesab etdiyimiz ölkə korrupsionerlərinin ifşası istiqamətində araşdırmalarımızı davam etdirmək, hər bir özbaşına məmur haqqında alınan nəticələri və son illər toplanmış materiallarla birlikdə mütəmadi olaraq ölkəmizdə fəaliyyət göstərən beynəlxalq təşkilatlara və səfirliklərə təqdim edərək insan haqlarını hər addımda pozan adları ölkə mətbuatında korrupsiyada hallanan məmurlarımıza qarşı “Maqnitski qanunu”na uyğun olaraq sanksiya tətbiq edilməsini və beləliklə onların Avropa ölkələrinə girişinə məhdudiyyət qoyulması, bank hesablarının dondurulması xahiş edək.
Hərhalda, düşünürəm ki, bu addımlarımız ənənə halını alarsa tezliklə öz real nəticələrinə də verəcəkdir. Hər birimizə uğurlar”.
Bütün tərəfləri dinləməyə hazırıq…
