“GünayBank”ın keçmiş sədr müavini növbəti dəfə hakim qarşısına çıxarılıb.
Musavat.com xəbər verir ki, Bakı Ağır Cinayətlər Məhkəməsində Emin Zeynalovun cinayət işi üzrə məhkəmə iclası davam etdirilib. Hakim Əfqan Hacıyevin sədrliyi ilə keçirilən məhkəmə iclasında zərərçəkmişlər məhkəməyə mülki iddialar təqdim ediblər. Məhkəmə mülki iddiaları icraata qəbul edib.
Emin Zeynalovun vəkilləri mülki iddiaların icraata qəbul edilməməsini istəyib. Amma təqsirləndirilən şəxs Emin Zeynalov mülki iddialara etiraz etməyib və icraata qəbul edilməsini istəyib. Bundan sonra vəkillər mövqelərini dəyişərək müdafiə etdikləri şəxslə razılaşdıqlarını bildiriblər.
Məhkəmənin davamında dövlət ittihamçısı ittiham aktını elan edib. İttihamda yazılır ki, Emin Zeynalov "GünayBank"da sədr müavini olan zaman müxtəlif şəxslərdən külli miqdarda pul alıb. Həmin şəxslərə vəd edib ki, bankdan kənar valyuta dəyişməklə qısa zamanda qazanc əldə edəcək, onlara da qazanc verəcək.
Bu məqsədlə Emin Zeynalov Rəşad Qəribovdan 200 min dollar, bacısının əri Fərid Məmmədov 1 milyon dollar, Tamerlan Şeyxzamanovdan 100 min dollar, M.Məmmədəliyevdən 2,5 milyon dollar, Əmrah İldırımzadədən 300 min dollar, Rövşən Əlizadədən 200 min dollar, Eldar Abbasovdan 600 min dollar, Rüfət Kərimovdan 1.4 milyon dollar, İlkin Nuriyevdən 750 min dollar, Orxan Vəliyevdən 4 milyon dollar, Vazeh Xələfovdan 20 min dollar, Elnur Talıbovdan 45 min dollar, Elgün Bağırovdan 1 milyon 850 min dollar, Türkiyə vətəndaşı Zivari Sərdar Mustafa oğlundan 4.5 milyon dollar, Araz Süleymanovdan 1.5 milyon dollar, Rahim Məmmədovdan 500 min dollar, Sahib Səfərovdan 3.5 milyon dollar, Tural Bağırovdan 1 milyon 460 min dollar, Heydər Süleymanovdan 134 min dollar alıb. Ümumi zərər 30 milyona yaxındır.
İş yoldaşı Xalidə Məmmədovanın isə evini satdığını və yeni ev almaq istədiyini bilib. Ona tanışları vasitəsi ilə sərfəli ev alacağını vəd edərək 143 min 700 dollar nağd pulunu ələ keçirib. Törətdiyi əmələ görə ona qarşı Cinayət Məcəlləsinin 178.4-cü maddəsi ilə ittiham irəli sürülüb. Emin Zeynalov elan olunmuş ittihamla özünü təqsirli bilməyib.
Məhkəmə istintaqı zərərçəkmişlərin dindirilməsi ilə davam etdirilib. İlk zərərçəkmiş kimi Emin Zeynalovun bacısının əri Fərid Məmmədov ifadə verib.
Fərid Məmmədov 19 ildir, bank sektorunda çalışdığını deyib. Bildirib ki, Emin Zeynalov ona valyuta dəyişmə məntəqələrinə dollar satmaq və qazanc əldə etmək vədi verib. O da buna inanıb və külli miqdarda pulunu ona verib. Fərid Məmmədov qeyd edib ki, bu proseslər gedən zaman "GünayBank"ın 3 saylı filialının müdiri olub.
Necə qazanc əldə ediləcəyini isə Fərid Məmmədov belə izah edib: "Emin dedi ki, "Kapital Bank"da da tanışları var. Dollar alıb-satmaq üçün maliyyə vəsaiti lazım olduğunu dedi. Dolları ucuz alıb baha satacaqdıq. Aradakı fərq isə bizim qazancımız olacaqdı. Əvvəlcə 400 min dollar vermişdim. Sonra da 600 min dollar verdim. Bir milyon dollara görə 300 min dollar qazanc vermişdi. Bu məbləğ mənim deyildi. Xalamdan almışdım. İş bu yerə gəlib çıxanda mən xalama pulu ödədim. Ona görə də zərərçəkmiş mənəm. Mən əvvəl Azərbaycan Beynəlxalq Bankının "Xaçmaz" və "Quba" filiallarında işləmişəm. Pulu da Qubada işləyəndə vermişəm. Sonra Bakıya qayıtmaq istədim. Bundan sonra "GünayBank"a qayıtdım".
Onun sözlərinə görə, Emin Zeynalovla danışıqları belə olub ki, pulun sahibi pulu tələb etdiyi halda əməliyyat dayandırılacaq: "Qazanc 300 min olub. Onu da xalama vermişəm. Xalam da müəyyən məbləği mənə verib. Amma əsas məbləğ olduğu kimi qalır".
Fərid Məmmədov deyib ki, dostu Elgünün 1 milyon 850 min dollarını da eyni məqsədlə Emin Zeynalova verib. Amma sonradan məbləği geri alıb: "Şübhələndiyim üçün Elgünün pulunu geri aldım. Amma bir müddət sonra qaytardım. İşlərin necə getdiyini soruşandan sonra Elgünün 850 min dollarını Eminə qaytardım. Sonra da Emin özü 1 milyonu Elgündən alıb. Mən Məkkədə olanda öyrəndim ki, Emin də yoxdur, pul da".
Emin Zeynalovun vəkili Fərid Məmmədova sual verib ki, 1 milyon dolları haradan alıb. Fərid Məmmədov söyləyib ki, Badamdar qəsəbəsində olan evini 1 milyon 500 min manata, "Mercedes" markalı maşınını isə 100 min dollara satıb. Özündə olan nağd məbləğlə birlikdə xalasının pulunu qaytarıb.
İttihama görə, Emin Zeynalov bankda qeyri-leqal pul dövriyyəsi sxemi qurub onlarla adamın milyonlarla pulunu mənimsəməkdə günahlandırılır. Bildirilir ki, Emin Zeynalov ötən ilin aprelində “GünayBank” ASC-nin idarə heyətinin sədr müavini təyin edilməsindən sonra banka uçota alınmayan on milyonlarla manat vəsait cəlb edib və bu qeyri-leqal depozitlərə görə sahiblərinə hər ay 1-3 faiz pul ödəyib. Lakin bir müddət sonra vəsaitlərlə birlikdə yoxa çıxan E.Zeynalovun pulları onlayn valyuta birjası yatıraraq ziyana düşdüyü məlum olub.
Onun bankın Müşahidə Şurasının sədri və səhmlərinin 90 faizə yaxınının sahibi Mahmud Məmmədova da milyonlarla manat borcu yaranıb. Zərərçəkənlər Zeynalovun barəsində hüquq-mühafizə orqanlarına müraciət ediblər.
Emin Zeynalov "Kapital Bank"ın (adı "BUSBank" olanda) keçmiş rəhbəri Zakir Zeynalovun oğludur. Z.Zeynalov 2000-ci ildə yaradılmış Birləşmiş Universal Səhmdar Bankı (BUS) İdarə Heyətinin Sədri vəzifəsinə təyin edilib. O, 4 avqust 2004-cü il tarixinə kimi həmin vəzifədə işləyib. Daha sonra “Finans Lizinq” ASC Müşahidə şurasının sədri vəzifəsində çalışıb. Hazırda Azərbaycan Dövlət İqtisad Universitetinin “Maliyyə və maliyyə institutları” kafedrasının dosentidir. Qeyd edilir ki, E.Zeynalovun pulunu mənimsədiyi şəxslər arasında yüksək vəzifəli məmurlar da var.
