Neftçilərin Hüquqlarının Müdafiəsi Təşkilatının (NHMT) sədri, tanınmış hüquq müdafiəçisi Mirvari Qəhrəmanlı növbəti dəfə neft çalışanlarının şikayət dolu müraciətini ictimailəşdirib. "DİA-AZ" olaraq həmin açıqlamanı təqdim edirik...

M.Qəhrəmanlı SOCAR Neft Kəmərləri idarəsinin işçilərinin belə yazdığını açıqlayır:
"SOCAR Neft Kəmərlərinin Qaradağ İstehsalat Bölümünün Birləşdirilmiş Neftin Nəqli sahəsinin işçilərinə əvvəllər servis maşın verilirdi, indi verilmir. 3 sahənin neftini nəql edirik. Binəqədi, Bibiheybət və Lökbatan. Qalmışıq yollarda, maaşımızın çox hissəsi taksilərə, marşurutlara, yollara gedir. Amma Qaradağ İstehsalat Bölümü və Neft Kəməri İdarəsi bu problemi həll etmir. Səhər maşın aparir, amma axşam nə növbədən sonra aparır, nə də axşam növbəsinə gəlməli olan işçiləri gətirirlər. Üç sahəyə gedirik. Ümumiyyətlə, harada nəql varsa, gedirik...
Lökbatan sahəsi də dağın başıdir, düşüb qalxa bilmirik, yollar palçıq soyuq, itlər də bir tərəfdən... Qadın işçilər də var... qorxurlar... Dəfələrlə müdiriyyətə demişik, deyirlər qaraj rəhbərliyi deyir ki, 7-dən gec maşın qaraja daxil olmamalıdır. Ona görə də yollarda əsir-yesir qalmışıq. 3 sahə arasında sürünə-sürünə qalırıq. İş saatımız da 08:00-dan 20:00-ə qədərdir..."

Qeyd edək ki, NHMT sədri bu hileyi hüquqi baxımdan əsaslı hesab edərək əlaqədar qurum və şəxsləri tədbir görməyə çağırıb. M.Qəhrəmanlı yazır:

"SOCAR sahə üzrə məsul şəxslərin diqqətinə çatdırım ki, bu şikayətin araşdırılmasına ciddi ehtiyac duyulur. Qanun deyir ki,  (ARƏM Maddə 310) istər işçilər, istərsə işəgötürənlər, istərsə də başqa fiziki şəxslər bu Məcəllə ilə və əmək qanunvericiliyi sisteminə daxil olan digər normativ hüquqi aktlarla müəyyən olunmuş hüquqları pozmağa, onları hər hansı şərtlə və ya qaydada məhdudlaşdırmağa, habelə bu hüquqlardan sui-istifadə etməyə, əmək müqaviləsi ilə müəyyən edilmiş öhdəlikləri, vəzifə funksiyasını yerinə yetirməməyə görə qanunvericiliklə müəyyən edilmiş qaydada maddi, intizam, inzibati və cinayət məsuliyyəti daşıyırlar..."