Bakı şəhəri, Sabunçu rayonu, Zabrat qəsəbəsinin sakini Dadaşov Kamil Qabil oğlu tərəfindən “Hürriyyət”in redaksiyasına şikayət məktubu daxil olub. Şikayətçi bildirir ki, atası Dadaşov Qabil Kabir oğlu ağır vəziyyətdə olsa da, ona 1-ci və ya 2-ci qrup əlillik verilmir:
“Mən, Dadaşov Kamil Qabil oğlu, yazaraq xahiş edirəm ki, müraciətimizi işıqlandırasınız.
Bildirim ki, atam Dadaşov Qabil Kabir oğlu çox ağır vəziyyətdədir. 1982-ci ildə Maştağada - 3 saylı xəstəxanada yatıb. İllərdir ağır psixotrop iynə-dərman qəbul edir.
2000-ci ildə 1-ci qrup əlillik təyin olunmuşdu.
Anam da ağır xəstədir. Hər iki valideynimin baxıma ehtiyacı var.
Atamın vəziyyəti isə olduqca ağırdır. Özünü bilmir, hüşü gedir. Bir tikə yemək yedizdirən kimi qaytarır. Hər işini özümüz görürük. Daima baxıma ehtiyacı olan xəstədir.
İyul ayında əlillik alması üçün şəhər poliklinikasında yoxlanışdan keçirdik. Belə xəstəni yoxlanışa aparmağın özü də zülmdür. Daha sonra Psixonevroloji şöbəsində yoxlanışdan keçdi. Orada da həkim qeyd etdi ki, xəstənin vəziyyəti olduqca ağırdır. Reabilitasiya mərkəzinə göndərildi. Lakin yenidən 3-cü qrup təyin etdilər.
Müayinə edən bütün həkimlər deyirlər ki, bu adama 1-ci qrup əlillik verilməlidir. Amma həkimlər qərəzli şəkildə dedikləri diaqnozu sənədə yazmırlar. Sözdə “ağırdır” desələr də, sənəddə elə yazırlar ki, ancaq 3-cü qrup əlillik təyin olunur.
Belə bir xəstəni heç kəs işə götürə bilməz. Nə yeməyini bilir, nə içməyini. Ayaq yoluna belə, özü tək gedə bilmir. Aparat sənədlərində beyninin yarısı qaralıb. Bizə qarşı haqsızlıq edilir”.
Məsələ ilə bağlı Əmək və Əhalinin Sosial Müdafiəsi Nazirliyinin tabeliyində olan Dövlət Tibbi-Sosial Ekspertiza və Reabilitasiya Agentliyindən bildirdilər ki, Bakı şəhər sakini 1968-ci il təvəllüdlü Dadaşov Qabil Kabir oğlu 12.03.2025-ci il tarixdə Dövlət Tibbi-Sosial Ekspertiza və Reabilitasiya Agentliyində əyani müayinə edilib: “Vətəndaşın müayinə nəticələrinə əsasən, qanunvericiliyə uyğun olaraq onun hazırki sağlamlıq vəziyyətinin üçüncü dərəcə müddətsiz əlillik təyinatına əsas verməsi barədə qərar qəbul edilib.
Qabil Dadaşov hazırda buna uyğun olaraq müvafiq sosial ödənişlərlə təmin olunur”.
