Azərbaycan şou-biznesində televiziya verilişləri və sosial şəbəkə məşhurları mövzusu yenidən müzakirə olunur. Bu dəfə diqqət mərkəzində müğənni İlhamə Qasımovanın açıqlamalarıdır. Onun efirlərlə bağlı söylədiyi fikirlər təkcə şəxsi narazılıq deyil, həm də sənət və populyarlıq anlayışının dəyişməsi ilə bağlı daha geniş bir problemi ortaya qoyur.

Müğənni bildirib ki, televiziya verilişlərinə nadir hallarda qatılmasının əsas səbəbi efirdə yaşadığı narazılıqlardır. Onun sözlərinə görə, bəzi proqramlarda münasibət onu qane etmədiyi üçün bəzən bir ildən artıq müddətdə efirlərə çıxmır. İlhamə Qasımova deyir ki, sənətə uzun illər sərf etmiş ifaçılarla yeni populyarlıq qazananların eyni səviyyədə təqdim olunması onu narahat edir. Müğənni efirdə tez-tez “yeni ulduz” kimi təqdim olunmasına da ironiya ilə yanaşıb. Onun fikrincə, uzun illər səhnədə fəaliyyət göstərən sənətçini bu cür təqdim etmək düzgün deyil.

İfaçı açıqlamasında şəxsi həyatına və keçmişinə münasibətindən də danışıb. O bildirib ki, bəzi sənətçilər regiondan gəldiyini gizlətməyə çalışsa da, özü bunu heç vaxt problem hesab etməyib: “Kimsə kənddən gəlirdi, danırdı. Mən isə deyirdim kənddən gəlmişəm, bundan utanmıram”. Bu fikirlər sosial şəbəkələrdə də müzakirə mövzusuna çevrilib. Bir çox istifadəçi sənətçinin səmimi mövqeyini dəstəklədiyini yazıb.

Əslində İlhamə Qasımovanın dedikləri Azərbaycan şou-biznesində yeni mübahisə deyil. Son illərdə sosial şəbəkələrin təsiri ilə məşhurlaşan ifaçıların sayı artıb. Bəzi sənətçilər hesab edir ki, illərlə təhsil və səhnə təcrübəsi qazanmış ifaçılarla yalnız internet populyarlığı olanların eyni platformada qiymətləndirilməsi sənətə ədalətli yanaşma deyil.

Digər tərəfdən, televiziya və prodüserlər isə auditoriyanın marağını əsas götürdüklərini deyirlər. Sosial şəbəkədə məşhur olan simalar daha çox izləyici topladığı üçün efirlərdə tez-tez görünür.

İlhamə Qasımovanın açıqlaması bir daha göstərir ki, Azərbaycan şou-biznesində “sənət” və “populyarlıq” arasındakı balans hələ də mübahisəli mövzudur. Bir tərəfdə illərin zəhməti ilə səhnədə qalmağa çalışan ifaçılar, digər tərəfdə isə sosial şəbəkələrin sürətli şöhrət gətirdiyi yeni nəsil var.

Leyla Mirzə, Bizimyol.info