Elza Seyidcahan Azərbaycan Yazıçılar Birliyinə üzv olub. Xalq yazıçısı, AYB-nin sədr müavini Çingiz Abdullayev E.Seyidcahana üzvlük vəsiqəsini təqdim edib. Ara-sıra bayağı şeirlər yazan müğənninin AYB-yə üzv olması həm onu, həm də qurumu hədəfə gətirib. Bəzi qələm adamları Elzanın AYB-yə üzv olmasını Yazıçılar Birliyinə həqarət kimi də qiymətləndirirlər. Hətta buna görə AYB üzvlüyündən istefa verənlər də oldu. Belə ki, tanınmşı şair, publisist, 1994-cü ildən AYB-nin üzvü olan Mürvət Qədimoğlu Həkəri Azərbaycan Yazıçılar Birliyinin sədri Anar Rzayevə istefa ərizəsi ilə müraciət edib.
“Sizdən xahiş edirəm ki, Elza Seyidcahanın üzv olduğu Yazarlar Birliyində qalmağımı özümə, Azərbaycan ədəbiyyatına və Azərbaycan oxucusuna təhqir hesab etdiyimdən, məni AYB-nin üzvlüyündən azad edəsiniz”, - deyə ərizədə qeyd olunub.
Bununla belə, Elza Seyidcahanın üzvlüyünü dəstəkləyən yazıçı və şairlər də oldu.
Əməkdar incəsənət xadimi, tanınmış şair Baba Vəziroğlu Pravda.az-a deyib: “Azərbaycan Yazıçılar Birliyinin Nizamnaməsi var. Yaradıcılıqla məşğul olan hər bir kəs bu nizamnamənin tələblərini yerinə yetirirsə, AYB-yə üzv ola bilər. Ərizə yazır, anket doldurur, çap olunmuş kitabını, ona verilən üç zəmanəti, hətta üç-dörd ölkədə çəkilmiş fotolarını təqdim edir, AYB-nin Komissiyası baxır, səs çoxluğu ilə layiq bilirlər, onu AYB-nin sıralarına götürürlər. Burada qeyri-adi heç nə yoxdur. Elza Seyidcahan gedib faşistlər partiyasının, yaxud təbiəti məhv edənlər cəmiyyətinin üzvü olmayıb ki, AYB-nin üzvü olub də. Şeir yazır. Elza Seyidcahanın şeirləri kiminsə xoşuna gələ də bilər, gəlməyə də. Bu, normal bir şeydir.
Elza xanımın yazdığı şeirlər kimisə güldürürsə, deməli, yaradıcılıq var. Şeir budur ki, ya güldürməli, ya da ağlatmalıdır. Düşündürməli, kədərləndirməli, sevindirməlidir. Ən böyük dəhşət o olar ki, hamı o şeirə biganə qalar. Bu, faciədir. Onda həmin insan qələmi yerə qoymalı, ayrı işlə məşğul olmaldır. Amma bir insanın yazdığı bədii parçalar, şeirlər kimisə müxtəlif ovqatlara sala bilirsə, deməli, nəsə var. Elza Seyidcahanın şeirlərinə bəziləri qəzəblənir, əksəriyyəti gülür. Olsun də gülüş. Mirzə Ələkbər Sabirin şeirlərini oxuyub necə gülürdük?"
Şair Murada Köhnəqala isə qeyd edib: “Elza Seyidcahan AYB-yə üzv olub, hamı biri-birinə dəyib.
Niyə, a balam, nə olub? Elza xanım gözəl müğənni, talantlı bəstəkar olmaqla yanaşı, həm də yenilikçi şairdir. Şəxsən mən Elza xanımın şeirlərini çox sevirəm. Yazdıqları həmişə orijinal, maraqlı və pozitivdir. Onun avanqard imici isə həmişə mənə inqilabçı sənətkar təsiri bağışlayıb. Bu qədər bozluğun içində və bir belə tənənin qarşısında bir sənət bağçası yaratdığına görə Elza xanıma böyük hörmətim var. Elza xanımı bir novator kimi çox sevirəm".
Bəs Elza Seyidcahan hansı meyarlarla, hansı yaradıcılığına görə AYB-yə üzv olub? Onu qınayanlara cavabı nədir? Əməkdar artist Elza Seyidcahan Musavat.com-un bu və digər suallarını cavablandırıb:
- Elza xanım, hələ bir neçə il əvvəl AYB-yə üzv olmaq istəyirdiniz və nəhayət ki, bu arzunuza çatdınız...
- İstəyirdim deyəndə ki, mən sanki elə bil AYB-nin ağuşunda idim. Mən bəstəkar adamam, kimsə şairliyimə dəyər vermək istəyirsə, bəstələdiyim mahnılara baxsınlar, görsünlər ki, mən hansı şairlərin sözlərinə mahnılar bəstələmişəm. Mən Nəsiminin, Füzulinin, Əliağa Vahidin sözlərinə mahnılar bəstələmişəm. Mahnılarıma baxıb şairliyimə dəyər vermək olar.
İnsanlar mənə zəng edib deyirdilər ki, Elza xanım, siz ki bu cür gözəl şeirlər yazırsınız, niyə AYB-yə üzv olmursunuz? Hətta bu sualı yazıçı Anara da vermişdilər. Sualı o qədər vermişdilər ki, axırda Anar müəllim də demişdi ki, “Elza xanım bizə müraciət etməyib, edərsə, bu məsələyə baxarıq”. Rəhmətlik xalq şairi Fikrət Qoca da demişdi ki, “hələ pandemiyadır, sonra bu məsələyə baxacağıq”.
Beləliklə, kitabımı AYB-yə təqdim etdim, sənədlərimi hazırladım, təqdim etdim. Əlbəttə ki, tənqidlərlə də üzləşdim. Tənqid edənlərin arasında bizim əfsanəvi aktyorumuz Rasim Balayev də var idi. Amma bir çox ziyalılar onun qarşısında məni müdafiə etdilər, o cümlədən deputat, akademik, filologiya elmləri doktoru Nizami Cəfərov, Aqil Abbas və sair. Onlar özləri də poeziya aləminin insanıdır və bilirlər ki, kimi müdafiə etmək lazımdır, kimi yox.
Onu da qeyd edim ki, mən uşaqlıqdan şairliyə başlamışam, yəni bəstəkarlıqdan öncə. Artıq bundan sonra özümə həm də şairə deyəcəm və bu məsuliyyəti layiqincə daşıyacam. Yəni bəzilərindən fərqli olaraq bir ad alıb, arxayınlaşan deyiləm.
İlk zəng edib, təbrik edən Anar müəllim oldu. Daha sonra müşavirləri zəng edib, təbrik etdilər.
İki gün öncə zəlzələ oldu və mənim AYB vəsiqəsi almağım sanki bu zəlzələni insanlara unutdurdu.
- Sosial şəbəkədə yayılan fotolardan da görünür ki, Çingiz Abdullayev sizi çox xoş qarşılayıb.
- Çingiz Abdullayev kimi əfsanənin məni necə qəbul etməsini ömür boyu yadımdan çıxarmayacam. Görüş zamanı Çingiz Abdullayev mənə öz məsləhət və tövsiyələrini verdi. Səməd Vurğun haqqında xatirələrini bölüşdü. O, mənə “Çox xoşbəxt adamsınız ki, Səməd Vurğun kimi şairin iş otağında vəsiqəni qəbul edirsiniz, vaxtilə Heydər Əliyev də bu otaqda olub” dedi. Mən Çingiz müəllimin heyranıyam. O, İkinci Qarabağ müharibəsi zamanı bizi dünyada, Rusiyada dəfələrlə təbliğ etdi, bədnamların cavablarını verdi. Biz belə ziyalılarımızla hər zaman fəxr edirik.
- AYB-yə üzv olmaq üçün 15, yoxsa 150 manat ödədiniz?
- Xeyr, üzvlük haqqı nə qədərdirsə, o qədər ödədim və mənə dedilər ki, bir də gələn il ödəyəcəm.
- Sizi tənqid edənlərə cavabınız nədir?
- Tənqidlərə çox açığam, amma baxır kim tənqid edir. Mən o tənqidlərdən çox gözəl nəticələr çıxardıram. Hər kəsə təşəkkür edirəm ki, ötən gündən mənim telefonum susmur, hamı məni təbrik edir, sosial şəbəkələrdə də müzakirələr, hətta mübahisələr edilir.
Ümumiyyətlə, qeyd edim ki, məni hər zaman AYB-dəkilər çox sevib, hər zaman da deyirdilər ki, “biz Anar müəllimin qərarını gözləyirik, o, rəy verərsə, səni mütləq üzv qəbul edəcəyik”. Mənə rəy verənlər arasında Nizami Cəfərov, Cığatel də var. Həmçinin Seyran Səxavət, Sayman Aruz, Səlim Babullaoğlu, Rəşad Məcid, Qəşəm Nəcəfzadə məni təbrik etdilər. Mənə dedilər ki, “ailəmizə xoş gəldin”. Sağ olsun, Baba Vəziroğlu da mətbuata açıqlamasında barəmdə xoş sözlər deyib.
Hətta Bəstəkarlar İttifaqının sədri Firəngiz Əlizadə də məni təbrik etdi. Mən artıq önə baxıram, mənim işlərim var. Məni anlayanlara təşəkkür edirəm, inanıram ki, anlamayanlar da sonra anlayacaqlar.
Xatırlayırsınızsa, zamanında şair Şəhriyar Del Gelani məni studiyada görəndə salam vermədi və məni onun haqqında “Bığ” şeiri yazmağa məcbur etdi. İndi də məni müzakirə edənlər məni məcbur edir ki, onlara şeir yazım. Artıq onlar barəsində “Məni yazın, məndən yazın” adlı şeir yazmaq üçün mənə ilham gəlir. Yəni bu ilhamı mənə onlar verir... //musavat.com//
