Kommersant.az xəbər verir ki, ADSEA layihənin tikintisindən reklam xarakterli videorolik paylaşıb. Paylaşımda hər şey necə də gözəl, qaydasında və təmiz görünür. Amma reallıqda bir balaca başqa məqamlar da var.

28 kilometrlik kanalizasiya borularının çəkilişində xüsusi örtüklü borulardan istifadə edilir. Bu borular tırlarla tikinti sahəsinə danışır və yerində qaynaq işləri görülərək boruların çəkilməsi prosesi gedir. Bura qədər hər şey normaldır. Amma məsələ burasıdır ki, əraziyə daşınan boruların arasında heç bir xüsusi örtüyü olmayan, paslanmış borular da daşınıb və artıq bir qismi də istifadə olunub. İstifadə olunan borular arasında qiymət fərqi olduğu aşkardır. 179 milyon manatlıq müqavilədə paslanmış boruların qeyd olunduğunu da düşünmürük. Buna istinadən deyə bilərik ki, istifadə olunan materialların keyfiyyəti, saxlanma şəraiti və ya quraşdırma mərhələsində texniki standartlara uyğunluğu şübhə altındadır. Bu tip infrastruktur layihələrində boruların korroziyaya qarşı xüsusi örtüklə qorunması vacibdir. Əks halda, uzunmüddətli istismar zamanı nasazlıqların yaranması və əlavə xərclərin ortaya çıxması riski artır.

Eyni zamanda sözügedən ərazidə texniki binalar da tikilir. Hansı ki, eyni qaydalar bu binalar üçün də keçərlidir. Binanın tikintisində istifadə olunan armaturlar paslanıb və buna baxmayaraq yenə də istifadə olunub.