ATƏT məlumat verib ki, Minsk qrupunun fəaliyyəti 2025-ci il dekabrın 1-də rəsmi olaraq başa çatdırılacaq. Bu barədə Ermənistanın “Past” nəşri yazıb. Nəşrə görə, qurumun nümayəndələri bildiriblər: “2025-ci il sentyabrın 1-də Nazirlər Şurasının qəbul etdiyi qərara əsasən, Minsk prosesinin dayandırılması istiqamətində addımlar atılır”. KİV bildirib ki, qrupa aid bütün strukturların fəaliyyəti həmin tarixdən etibarən tamamilə dayandırılacaq: "Minsk qrupunun ləğvi Azərbaycanın əsas tələblərindən biri idi. Bakı bununla Qarabağ məsələsini bağlamağa və Ermənistanın gələcəkdə Qarabağla bağlı məsələ qaldırmaq imkanını aradan qaldırmağa çalışırdı. Ermənistan hakimiyyəti uzun müddət bu mövzuya reaksiya vermədi, lakin daha sonra tərəddüd etmədən İlham Əliyevin tələbinə razılıq verdi. Avqust ayında Vaşinqtonda keçirilən imzalama mərasimində Ermənistan və Azərbaycan nümayəndə heyətləri Minsk qrupunun ləğvinə dəstək verəcəklərini, müvafiq sənəd təqdim edəcəklərini bəyan etdilər. Ermənistan müxalifəti və hüquq müdafiəçiləri kəskin bəyanatlar yayırdı, lakin aydın görünürdü ki, Minsk qrupunun üzv ölkələri də bu nəticədə maraqlı idilər, Qarabağ məsələsini birdəfəlik bağlamaq və bu “baş ağrısı”ndan qurtulmaq istəyirdilər".
Politoloq Turan Rzayev Sherg.az-a deyib ki, bu, faktiki olaraq həm Azərbaycanın mühüm tələblərindən birinin yerinə yetirilməsi, həm də keçmiş Dağlıq Qarabağ münaqişəsinin sonuncu simvolunun aradan qalxması deməkdir. Ekspertin sözlərinə görə, prinsipcə, Minsk qrupunun fəaliyyətinin dayandırılmasının siyasi nəticəsi azdır: "Çünki bu qurum uzun illər mövcud olsa da, ortaya ciddi nəticələr qoya bilmədi. Azərbaycan və Ermənistan arasında münaqişənin həllinə dair konkret addımlar, sərt qərarlar və ya tərəfləri razılığa gətirəcək təsirli vasitəçilik göstərməyə nail olmadı. Nəticədə münaqişə müharibə mərhələsinə keçdi.
Bu təşəbbüs müharibədən sonra da fəaliyyətsizliyi ilə seçilirdi. Lakin yeni tendensiya həm də tərəflərin təşkilata ehtiyac görməməsi idi. Ermənistan və Azərbaycan ikitərəfli danışıqlar aparmağa başladı və bu təcrübə qısa zamanda öz bəhrəsini verdi. Məsələn, artıq iki ölkənin liderləri qatıldıqları əksər müxtəlif beynəlxalq tədbirlərdə bir araya gəlir, səmimi və konkret müzakirələr aparırlar.
Vaşinqton görüşündə faktiki olaraq sülh sazişi paraflandı. Bu isə göstərir ki, proses artıq tərəflərin birbaşa iradəsi və diplomatik addımları ilə irəliləyir".
T.Rzayevə görə, Minsk qrupunun dekabrın 1-də fəaliyyətini dayandırması sülh prosesində əhəmiyyətli dəyişiklik yaratmır: "Yəni qrupun bağlanması hazırda sadəcə formal bir addımdır. Əsas məsələ Azərbaycan və Ermənistanın birbaşa dialoqu, qarşılıqlı səfərlər və səmimi danışıqların olmasıdır. Prosesin həlledici mərhələsi olaraq 2026-cı ildə sülh sazişinin imzalanması mümkündür".
