Ermənistan parlamentinin spikeri Alen Simonyan bildirib ki, ölkə hakimiyyəti “Azərbaycanda saxlanılan bütün erməni əsirlərin azad olunması üçün əlindən gələni edir”. Simonyan əminliklə iddia edib ki, Ermənistan hakimiyyətinin atdığı addımlar nəticəsində bütün “əsirlər” vətənə qaytarılacaq.
“Hazırda Azərbaycanda 23 təsdiqlənmiş “əsir” saxlanılır, halbuki 2020-ci il müharibəsindən sonra onların sayı 200-ə çatırdı”, – “Armenpress” Simonyandan sitat gətirir.

“Gözləyək. Mən əminəm ki, bu addımlar sayəsində həmin əsirlərin sayı sıfıra enəcək və onların hamısı qayıdacaq. Qarabağın o vaxtkı liderləri də, əsir götürülmüş və bu gün oradakı həbsxanalarda saxlanılan bütün o adamlar da qayıdacaqlar. Hökumətimiz bütün vətəndaşlarımızın ayrı-seçkilik olmadan Ermənistan Respublikasına qaytarılması hər şeyi edib və edəcək”, – Simonyan bildirib.

Spikerin sözlərinə görə, onun nikbinliyi həm əvvəlki təcrübəyə, həm də davam edən işlərə əsaslanır.
“Mən deyirəm ki, müharibədən sonra təsdiqlənmiş məhbuslarımızın sayı 200-ə qədər idi, bu gün isə 23 nəfərdir. On dəfə az. Bu, mənim əsaslana biləcəyim bazadır. Və mən bilirəm ki, hökumət, mən özüm və xarici işlər naziri hansı səyləri göstəririk”, – spiker əlavə edib.

İki il əvvəl “Dağlıq Qarabağ Respublikasının dövlət naziri” Ruben Vardanyan Azərbaycan hüquq-mühafizə orqanları tərəfindən həbs olunub. Erməni “əsirlərin” Avropa İnsan Haqları Məhkəməsindəki nümayəndəsi Siranuş Saakyan iddia edib ki, Vardanyan və Bakıda saxlanılan digər “əsirlər” ancaq “erməni olduqları üçün günahkardırlar”.

Sözsüz ki, əvvəlcə terminologiyada dəqiqləşmə aparmaq lazımdır. Ermənistan KİV-ləri, siyasətçiləri və cəmiyyəti Qarabağ ərazisində saxlanılan şəxsləri inadla “əsir” adlandırırlar. Amma onlardan heç biri döyüş zamanı, əllərində silah, cəbhədə əsir alınmayıb. Onlar separatçı hərəkatın və qeyri-qanuni hakimiyyətin rəhbərləri olublar və ərazilər işğaldan azad olunandan sonra həbs olunublar.

Bununla belə, bütün saxlanılan “prezidentlərin”, “komandirlərin” və digər “DQR rəsmilərinin” taleyinin necə olacağı maraqlıdır. Onlar həbsdə qalacaqlarmı, yoxsa rəsmi Bakının separatçı liderləri azad etməyə razı ola biləcəyi variantlar var? Məsələn, onlar nəyin müqabilində azad edilə bilərlər? Digər tərəfdən, bu şəxslər hansı yüksək dəyərə malikdirlər ki, Paşinyan komandası Azərbaycanla hansısa dəyiş-düyüşə getməyə razı olsun?

Bununla bağlı Pressklub.az-a danışan müstəqil siyasi ekspert Nəsimi Məmmədli qeyd edib ki, bir sıra beynəlxalq təşkilatlar mütəmadi olaraq erməni məhbusların azad olunmasına çağırış edir.

Görürük ki, Bakıda mühakimə olunan ermənilərin azad olunması məsələsi nə Vaşinqtonda paraflanmış sənədin mətnində, nə də danışıqlar prosesində aktualdır. Məncə, Paşinyan hökumətinin və digər dövlət rəsmilərinin bu mövzuda vaxtaşırı səsləndirdiyi fikirlər erməni cəmiyyətinin tələblərinə hesablanmış addımlardır. Ermənistan bu şəxslərin dərhal azad olunması üçün xüsusi heç bir addım atmır. Mənim fikrimcə, bu şəxslərin indi azad olunması Paşinyanın yox, revanşist müxalifətin mövqelərinə müsbət təsir göstərə bilər”, – analitik bildirib.

Onun sözlərinə görə, rəsmi Bakı erməni məhbusların hüquqlarının təmin edilməsinə ciddi maneələr yaratmır. “Azərbaycan qanunvericiliyinə uyğun olaraq həbsxanalarında və təcridxanalarda tətbiq olunan normalar bu məhbuslara da şamil olunur.

Nəzərə almaq lazımdır ki, məhkəmə qarşısına bu məhbuslar çox ciddi ittihamlarla çıxarılıblar. Rəsmi Bakının xarici təzyiq altında onların vaxtından əvvəl azad olunmasına razılaşacağına inanmaq çətindir. Hərbi əsirlərin azad olunması ilə bu məsələnin heç bir əlaqəsi yoxdur.

Bundan əlavə, hakimiyyət bu mövzunu uzun müddət daxili siyasi maraqlar üçün istifadə etməkdə maraqlıdır. Məhbuslar bir müddət Bakıda qalacaqlar. Düşünürəm ki, bu məsələ Ermənistan və Azərbaycan arasında sülh müqaviləsi imzalandıqdan sonra ayrıca müzakirə ediləcək. Və istisna deyil ki, gələcəkdə humanitar mülahizələrlə onların mərhələli şəkildə təhvil verilməsi mümkündür”, – Məmmədli qeyd edib.