Sovet quruluşunun süqutundan artıq 34 il keçsə də, təəssüf ki, müasir Azərbaycan cəmiyyətinin bəzi fərdlərinin düşüncə və yaddaşlarında hələ də qırmızı sovet imperiyasının qanlı izləri qalmaqda davam edir. Onlar sovet dövrünün xiffəti ilə yaşayır və öz milli dövlətimizə qarşı əks təbliğat aparırlar. Sosial şəbəkələrdə kommunist ideologiyasının təbliği məqsədilə keçmiş SSRİ bayraqları ilə yürüş etməyə cəhd göstərən bir qrup şəxsin videogörüntülərinin yayılması da bu acı həqiqəti təsdiqləyir. İlkin istintaq zamanı müəyyən edilib ki, bu şəxslər başqa bir dövlətin dəstəyi ilə maliyyələşib, ofis icarəyə götürərək qrup halında fəaliyyət göstəriblər. Onların ofisində aparılan baxış zamanı sovet-kommunist ideologiyasının təbliğinə yönəlik çoxsaylı materiallar, bayraqlar, radikallığı təşviq edən kitablar, CD-disklər və elektron daşıyıcılar aşkarlanıb. Bütün bunlar onu göstərir ki, sözügedən şəxslər dövlətçiliyimizə qarşı planlı, sistemli iş aparmaq üçün formalaşdırılmış gizli mütəşəkkil dəstənin üzvləridir. Onlar keçmiş SSRİ-nin təbliği adı altında, əslində, hazırkı Rusiyanın geosiyasi maraqlarına xidmət etmək üçün cəlb olunublar. Vaxtında aşkarlanıb saxlanılmasaydılar, güman ki, onlar Azərbaycana qarşı müəyyən təxribatlar da həyata keçirəcəkdilər. Kreml Azərbaycana və digər postsovet ölkələrinə qarşı məhz bu cür təxribatçıların, "beşinci kolon" üzvlərinin vasitəsilə "hibrid müharibə" əməliyyatları həyata keçirməyə çalışır. Bir müddət əvvəl İmişli rayonunun Sarıxanlı kəndində 9 May Qələbə günü tədbiri zamanı da SSRİ bayrağı qaldırılmış və həmin tədbirdə çıxış edən rayon Ağsaqqallar Şurasının sədri Saleh Səmədovla yanaşı, bir sıra digər şəxslər yaxalarına çar Rusiyasının işğalçılıq rəmzi olan “Georgi lenti” taxmışdılar. O hadisədən sonra Saleh Səmədov vəzifəsindən uzaqlaşdırıldı və onun barəsində cinayət işi başlanıldı.
Dövlət İdarəçilik Akademiyasının rektorunun müşaviri, Bakı Politoloqlar Klubunun sədri Zaur Məmmədov Sherg.az-a deyib ki, maraqlı məqam rəsmi məlumatda keçən "başqa bir dövlətin dəstəyi və ayırdığı maliyyə hesabına" ifadəsidir. Ekspertə görə, burada söhbətin hansı dövlətdən getdiyi birmənalı aydındır: "Hansı dövlət Azərbaycanda SSRİ və kommunist ideologiyasının təbliğində maraqlı ola bilər? Hazırda mediada müzakirə olunan 2013-cü il "Milyarderlər İttifaqı" ilə müxalifətin təmsil olunduğu "Milli Şura" arasında sıx əlaqələr məsələsini, həmçinin bir müddət əvvəl Azərbaycanla Rusiya arasında müşahidə olunan siyasi böhranı da nəzərə alsaq, burada söhbətin hansı dövlətdən getdiyi heç bir şübhə doğurmur. Başqa bir məqam həmin qrupun kim tərəfindən və necə maliyyələşdirilməsi məsələsidir. Artıq heç kimə sirr deyil ki, dövlətə xəyanət, hakimiyyəti ələ keçirmək kimi ağır ittihamlarla barəsində həbs qərarı verilmiş Ramiz Mehdiyev Rusiyanın Azərbaycandakı "beşinci kolonu"nun başında dayanan, vaxtilə yaradılmış "Milyarderlər İttifaqı" ilə müxalifətin birləşdiyi "Milli Şura" arasında əlaqələri tənzimləyən şəxsdir. Buna görə də R.Mehdiyevin Azərbaycanda dövlət çevrilişi ssenarisini nəzərdə tutan məktubunun ələ keçirilməsi və ictimailəşdirilməsindən sonra onun Rusiyanın adamı olması və bu ölkənin Azərbaycanla bağlı planlarında aparıcı rolu, o cümlədən onun SSRİ-ni təbliğ edən və digər qrupların fəaliyyətini əlaqələndirməsi və maliyyələşdirilməsi tam real görünür".
