Ermənistan Baş naziri Nikol Paşinyan beynəlxalq səviyyədə tanınmış ərazi bütövlüyünü qorumaq hüququ və bu çərçivədə yeni Konstitusiyanın qəbulunun zəruriliyindən danışıb. Paşinyan deyib ki, o, yeni Konstitusiyanın qəbulu ilə ifadə edilməli olan daxili legitimliyi gücləndirməyi fundamental hesab edir.

Baş nazir ölkədə Konstitusiya referendumunun 2026-cı il parlament seçkilərindən sonra baş tutacağını bildirib. Onun sözlərinə görə, seçkilərdən sonrakı proses siyasi qüvvələrə Konstitusiya ilə bağlı mövqelərini cəmiyyətə təqdim etmək imkanı verəcək. Sonda çoxluq qazanan siyasi qüvvənin mövqeyi yeni Konstitusiya layihəsinin formalaşmasında həlledici rol oynayacaq. "Tasnim" agentliyi yazıb ki, Ermənistanın Baş naziri Nikol Paşinyan Konstitusiya referendumunu 2026-cı il seçkilərinə qədər təxirə salmaqla Azərbaycanla sülhə hüquqi maneələri aradan qaldırmağa çalışır. Nəşr bildirib ki, Paşinyan seçkidə qələbəsini təmin edib, daha sonra konstitusiyaya dəyişikliklər etməklə ərazi iddiaları ilə bağlı müddəaları sənədlərdən çıxarmağı düşünür. Bununla o, sözügedən addımın xalqın iradəsi olduğunu əsaslandıracaq. Nəşr yazıb ki, dəyişikliklər Azərbaycan və Türkiyənin iradəsi ilə həyata keçirilir. Qeyd olunub ki, N.Paşinyan Konstitusiya referendumuna getməklə "Böyük Ermənistan" xülyasından və ermənilərin iddia etdikləri "tarixi ərazilərdən" imtina edəcək.

Millət vəkili Zaur ŞükürovSherg.az-a deyib ki, Ermənistan Konstitusiyasında Azərbaycana və qardaş Türkiyəyə ərazi iddialarının yer alması bilavasitə Ermənistanın gələcək dövlətçiliyi üçün bir təhlükədir. Deputatın sözlərinə görə, Ermənistan rəsmilərinin Konstitusiya dəyişikliyini Azərbaycanın tələbi ilə icra etdiklərini etiraf etməmələri təbiidir:

"Ancaq beynəlxalq platformalarda həm ölkə rəhbərliyi, həm də digər rəsmilər tərəfindən davamlı olaraq vurğulanır ki, sülhün qarşısındakı əsas maneə məhz Ermənistan Konstitusiyasında, onun Preambulasında yer almış ərazi iddialarıdır. Bunlar mütləq aradan qalxmalıdır. Nikol Paşinyan Konstitusiya dəyişikliyinin 2026-cı ildə seçkilərdən sonra keçiriləcəyini deyir və bu, mümkündür. Paşinyan hökuməti seçkidə qələbə qazanarsa, referendum keçirməklə Konstitusiya dəyişikliyinə gedə bilər. O zaman sadəcə Azərbaycanın Konstitusiyada ərazi iddiaları ilə bağlı tələbi aradan qaldırılmaz, eyni zamanda Paşinyanın "daxili legitimliyi gücləndirməsi" məsələsi də həll olunar. Ola bilsin, Konstitusiyada Paşinyan iqtidarının gələcəkdə daha rahat şəkildə fəaliyyətinə maneə törədə bilən hansısa müddəalar var. Məsələn, Erməni Apostol Kilsəsi ilə bağlı Konstitusiyanın 7 və 8-ci maddələrində bəzi məqamlar əks olunub. 7-ci maddədə qeyd olunur ki, "Ermənistan dövləti dindən ayrıdır", 8-ci bənddə isə vurğulanır ki, "Erməni Apostol Kilsəsi erməni vətəndaşların mədəni inkişafında və onların milli identikliyinin qorunmasında mühüm rol oynayır". Konstitusiyanın digər müddəasında Ermənistan dövləti və Kilsə tərəf kimi qeyd olunur. Bu da Kilsənin nüfuzundan və gələcəkdə proseslərə təsir göstərmək gücündən, imkanından xəbər verir".

Parlamentari qeyd edib ki, Kilsə erməni cəmiyyətinin yönləndirilməsində mühüm rola sahib olub: "Ermənistandakı revanşist qüvvələrin aktivləşməsində, cəmiyyətin beyninin yuyulmasında əsas missiyanı məhz Kilsə oynayıb. Ona görə də Paşinyan iqtidarı Kilsəni özünə ciddi maneə görür və Konstitusiya dəyişikliyində sözügedən müddəaların müəyyən qədər yumşaldılması nəzərdə tutulur. Təbii ki, digər məsələlərdə də dəyişiklik ehtimalı var. Ancaq ilk növbədə Ermənistan dövlətinin təhlükəsizliyinə ciddi təhdid sayılan ərazi iddiaları ilə bağlı müddəaların aradan qaldırılması zəruridir. 8 avqustda Vaşintonda keçirilən görüşdən və imzalanmış sənədlərdən sonra ABŞ prezidentinin bu məsələni daim diqqətdə saxladığı, nəzarət etdiyi şübhəsizdir. ABŞ rəsmilərinin regiona səfəri də Vaşinqtonun sülh prosesində ciddi olduğuna dəlalət edir. Paşinyan hökumətinin bunu nəzərə alaraq Konstitusiyada dəyişiklik etməsi zəruridir ki, paraflanmış sülh sazişi imzalansın".